CAB. IV

1Myr shen hyndaa mee, as smooinee mee er ooilley’n tranlaase t’er ny yannoo fo’n ghrian: as cur-my-ner ny jeïr ocsyn va tranlaasit, as cha row oc fendeilagh; as er cheu ny tranlaasee oc va pooar, agh ocsyn cha row fendeilagh. 2Shen-y-fa dooyrt mee, dy row stayd ny merriu ta hannah er gheddyn baase, ny share na’n stayd ocsyn ta foast bio. 3Dy jarroo ny share na ad ny-neesht, t’eshyn nagh vel foast er ve, nagh vel er vakin yn drogh obbyr t’er ny yannoo fo’n ghrian.

4Reesht smooinee mee er ooilley tooilleil dooinney, as er dy chooilley obbyr yeeragh, eer son shoh dy vel e naboo troo mysh. Ta shoh myrgeddin fardail, as seaghney cree. 5Ta’n ommydan filley e laueyn dy cheilley, as gee yn eill echey hene. 6Ny share ta lane doayrn lesh fea, na daa lane doayrn lesh tooilleil as seaghney cree.

7Eisht hyndaa mee, as honnick mee fardail fo’n ghrian. 8Ta ayn fer ny-lomarcan, as cha vel echey sheshey; dy jarroo chamoo t’echey lhiannoo ny braar: ny-yeih cha vel jerrey er ooilley e hooilleil, chamoo ta e hooill jeant magh lesh berchys; chamoo t’eh gra, Quoi son ta mee tooilleil, as gobbal gerjagh da my annym? Ta shoh myrgeddin fardail, dy feer te obbyr seaghnagh.

9Ta jees ny share na unnane; son ta leagh smoo oc son nyn obbyr. 10Son my huittys fer jeu, coonee’n fer elley lesh e heshey: agh smerg dasyn ta ny-lomarcan tra huittys eh: son cha vel fer elley echey dy chooney lesh. 11Reesht, my ta jees lhie cooidjagh, eisht ta chiass oc; agh kys oddys fer ve cheh ny-lomarcan? 12As my ta fer goaill mainshtyraght er dooinney, nee jees cur eddin da; as cha vel coyrd three-filley dy leah er ny vrishey.

13Ny share ta lhiannoo boght as creeney, na shenn ree ommijagh, nagh bee arragh er ny choyrlaghey. 14Son ass pryssoon t’eh cheet dy reill, as t’eshyn ta ruggit ayns e reeriaght cheet gys boghtynid. 15Smooinee mee er slane stayd sheelnaue fo’n ghrian, as er yn eirey hig nyn yeï. 16S’coan ta jerrey er anvea yn phobble, dy jarroo myr nagh row orroosyn va rhymboo; cha jean adsyn myrgeddin, ta cheet nyn yeï, boggey y ghoaill ayn: son shickyrys ta shoh myrgeddin fardail, as seaghney cree.