CAB. V

1Jeeagh gys dty raaidyn, tra t’ou taaghey thie Yee, as bee ny s’arryltagh dy chlashtyn na dy hebbal oural yn ommydan: son cha vel toiggal echey, dy vel eh jannoo dy olk. 2Ny bee siyragh lesh dty veeal, as ny lhig da dty chree fockley-magh nhee erbee gyn-tort fenish Yee: son ta Jee ayns niau, as uss er y thalloo; shen-y-fa lhig da dty ghoan ve beggan. 3Son tra dreamal cheet trooid ymmodee kiarail, as coraa yn ommydan er ny chronnaghey liorish mooarane branlaadee. 4Tra t’ou jannoo breearrey gys Jee, ny lhig shaghey dy chooilleeney eh: son cha vel taitnys erbee echeysyn ayns ommydanyn; eeck shen ny t’ou er vreearrey. 5Ny share te, nagh jinnagh oo breearrey, na oo dy vreearrey, as dyn cooilleeney. 6Ny lhig da dty veeal ve oyr peccah da dty chorp; chamoo abbyr roish chaghter Yee, She marranys ve: cre’n-fa yinnagh oo Jee y vrasnaghey lesh dty ghoan, dy stroie obbyr dty laueyn? 7Son ayns ymmodee dreamallyn as mooarane goan, ta myrgeddin niart fardail: agh gow uss aggle roish Jee.

8My hee oo tranlaase jeant er y voght, as laue lajer jeant er briwnys as cairys ’sy cheer, ny gow yindys jeh’n chooish: son ta eshyn, ta erskyn y fer syrjey, cur tastey, as ta ny syrjey ayn na adsyn.

9Ny-sodjey, ta vondeish y thallooin cour dy chooilley ghooinney: ta’n ree hene er ny hirveish veih’n vagher. 10Cha bee eshyn ta sondagh er argid jeant magh lesh argid; ny eshyn ta shleeuit er cosney lesh cheet-stiagh vooar: ta shoh myrgeddin fardail. 11Tra ta cooid bishaghey, t’adsyn er nyn mishaghey ta dy vaarail ad: as cre’n vondeish t’ec mainshteryn ooilley’n verchys shoh, agh shilley jeu lesh nyn sooillyn! 12Ta cadley yn labree kiune, my s’beg ny s’mooar e lhongey: agh cha lhig palchey yn verchagh da dy ghoaill fea. 13Ta olk vooar ta mee er vakin fo’n ghrian, eer berchys freilt gys yn assee ocsyn by-lhieu ad. 14Agh ta’n verchys cheddin cherraghtyn liorish drogh harrooghys; as t’eh geddyn mac as cha vel nhee erbee ny laue. 15Rooisht myr haink eh magh ass breïn e vayrey, hed eh roish, dy gholl myr haink eh, as cha vel nhee erbee jeh cooid e gheinys, ver eh lesh ersooyl ny laue. 16As ta shoh myrgeddin olk trome, er dy chooilley aght myr haink eh, shen myr hed eh: as cre’n vondeish t’echeysyn t’er laboraght son y gheay? 17Ooilley e laghyn myrgeddin, goaill e veaghey ayns dorraghys, as t’echey mooarane trimshey, as sou-aigney lesh e hingys.

18Cur-my-ner, shen ny ta mee er vakin: te mie as feudagh son peccagh dy ee as dy iu, as dy ghoaill soylley jeh foays ooilley e laboraght, t’eh dy ghoaill fo’n ghrian, ooilley laghyn e vea: son shoh’n cronney ta Jee fordrail da. 19Dy chooilley ghooinney myrgeddin, da ta Jee er choyrt berchys as cooid, as slaynt dy yannoo ymmyd jeh, as dy yannoo mooar jeh hene, as dy ghoaill boggey ayns e laboraght; ta shoh neesht gioot voish Jee. 20Son cha gooinee eh cooid vooar er laghyn e heihll: er-yn-oyr dy vel Jee dy ansoor eh ayns eunys e chree.