CAB. VI

1Ta olk ayn ta mee er vakin fo’n ghrian, as cadjin mastey deiney. 2Dooinney ta Jee er choyrt da berchys, as cooid, as ooashley, myr shen nagh vel eh feme nhee erbee jeh slane yeearree e annym; ny-yeih cha vel y gioot echey veih Jee dy yannoo ymmyd jeh; agh ta joarree goaill y soylley jeh: ta shoh neesht fardail, as doghan treih.

3Ga dy jinnagh dooinney keead lhiannoo y gheddyn, as e vea dy ve beayn son ymmodee bleeantyn, as ga dy darragh eh gys eash as ooashley yn chanstyr; ny-yeih mannagh vel yn annym echey jeant magh lesh foays e laboraght, as nagh vel wheesh boayl-oanluckee echey; ta mee gra, dy vel lhiannoo ruggit roish e hraa ny share na eh. 4Son haink eh stiagh ’sy theihll ayns fardail, as t’eh gimmeeaght ersooyl ass ayns dorraghys, as bee’n annym echey er ny yarrood ayns dorraghys. 5Chamoo t’eh er vakin y ghrian, ny ennaghtyn echey jeh mie ny sie: ta fea smoo ec y derrey yeh na’n jeh elley.

6Eer abbyr, dy beagh e vea daa housane bleïn, foast cha vel eh er ghoaill gerjagh e chooid-seihlt: nagh vel ooilley goll gys yn un voayl? 7Ta ooilley laboraght dooinney son e veeal, as ny-yeih cha vel e vian dy bragh jeant magh. 8Son cre’n vondeish smoo t’ec y dooinney creeney na’n ommydan? ny cre t’ec y voght, ta gymmyrkey eh-hene dy feudagh ’sy theihll?

9Ny share ta shen ta roish dty hooillyn, na shaghrynys yn yeearree: ta shoh myrgeddin fardail, as seaghney cree. 10Shen ny ta er ve, te hannah enmyssit, as s’mie fys nagh vel eh agh dooinney: chamoo oddys eh streeu rishyn ta ny s’niartal na ’hene.

11Fakin dy vel ymmodee reddyn ta bishaghey fardail, cre-woad share ta dooinney? 12Son quoi ec ta fys, cre ta mie da dooinney ’sy vea shoh, ooilley laghyn e vea varvaanagh, t’eh dy cheau myr scadoo? son quoi oddys ginsh da dooinney, cre vees ny lurg fo’n ghrian!