CAB. VII

1Ta goo mie ny share na ooil chostal: as laa yn vaaish ny share na’n laa ruggyr oo.

2Te ny share dy gholl gys thie ny trimshee, na gys thie ny cuirraghyn; son shen jerrey dy chooilley ghooinney, as gowee yn vio shoh gys e chree. 3Ta trimshey ny share na garaghtee: son liorish trimshey yn eddin, ta’n cree er ny lhiasaghey. 4Ta cree yn dooinney creeney ayns thie ny trimshee: agh ta cree yn ommydan ayns thie yn rouanys. 5Te ny share dy chlashtyn oghsan dooinney creeney, na son dooinney dy chlashtyn arrane brynneragh ny mee-hushtee. 6Son myr frapperaght drineyn lostey fo pot, shen myr ta garaghtee’n ommydan: ta shoh myrgeddin fardail.

7Ta tranlaase son shickyrys cur dooinney creeney ass e cheeayl; as ta gioot cur yn cree er-shaghryn. 8Ta jerrey’n chooish ny share na’n toshiaght: as ta’n cree surransagh ny share na’n chree mooaralagh. 9Ny cur raad da corree siyragh ayns dty chree: son ta corree tannaghtyn ayns cleeau yn ommydan. 10Ny abbyr uss, Cre’n-oyr dy vel laghyn y chenn earish ny share na ny laghyn t’ayn nish? son cha vel oo briaght dy creeney ’sy chooish shoh.

11Ta creenaght cha mie as eiraght; as liorish ta vondeish ocsyn ta fakin y ghrian. 12Son ta creenaght ny endeilagh, as ta argid ny endeilagh: agh te foays mooar tushtey, dy vel creenaght cur bea dauesyn ta bannit lesh. 13Smooinee er obbyr Yee: son quoi oddys shen y yannoo jeeragh, t’eshyn er n’yannoo cam? 14Ayns y laa dy vaynrys gow boggey; agh ayns y laa dy heaghyn smooinee ort hene; ta Jee myrgeddin er hoiaghey yn derrey yeh noi’n jeh elley, nagh beagh oyr plaiynt ec dooinney erbee. 15Ooilley ny reddyn shoh ta mee er vakin ayns laghyn my ardail: dy vel dooinney cairal cherraghtyn ayns e chairys, as dy vel drogh ghooinney beayn ayns e vee-chraueeaght. 16Ny shass gys y lhome-leigh; chamoo gow ort hene dy ve ro chreeney; er-aggle dy duitt oo ayns ribbey. 17Ny cur rouyr raad gys mee-chraueeaght, chamoo bee dty ommydan: er-aggle dy jean oo giare jeh dty laghyn hene. 18S’mie dy goghe oo greme er shoh; veih shoh myrgeddin ny tayrn dty laue: son nee eshyn, ta goaill aggle roish Jee, shaghney ooilley ny huilk shoh. 19Ta creenaght niart smoo da’n dooinney creeney, na jeih treanee caggee ayns ard-valley. 20Son cha vel dooinney cairal er yn ooir cha mie shen, nagh vel jannoo peccah. 21Myrgeddin, ny cur geill da dy chooilley ockle t’er ny loayrt; er-aggle dy glin oo dty harvaant loayrt dy olk jeed. 22Son s’mie fys ec dty chree hene, dy vel uss myrgeddin dy mennick er oltooan dty naboo.

23Ooilley shoh ta mee er phrowal liorish creenaght: dooyrt mee, Bee’m creeney; agh ve foddey voym. 24Shen ny ta foddey jeh, as erskyn-towse dowin, quoi oddys y gheddyn magh? 25Hyndaa mee my chree dy hoiggal, as dy vriaght, as dy hirrey magh creenaght, as bun dy chooilley nhee, as dy hoiggal olkys mee-hushtey, eer ommijys as mee-cheilid. 26As hooar mee ny shirroo na’n baase yn ven ta’n cree eck ribbaghyn as lieenteenyn, as e laueyn myr geulaghyn: quoi-erbee ta dy wooiys Jee shaghnys ee, agh bee’n drogh-yantagh goit lioree. 27Cur-my-ner, shoh ta mee er gheddyn, ta’n preachoor dy ghra, goll harrish as harrishdoo, dy yannoo seose yn coontey. 28Shen ta my annym dy yeearree, agh cha jig eh lhiam: un dooinney mastey thousane ta mee er gheddyn: agh ben, mastey ooilley’n earroo shoh, cha vel mee er gheddyn: 29Cur-my-ner, shoh ynrycan ta mee er gheddyn, dy vel Jee er n’yannoo dooinney cairal; agh t’eh dy voirey eh-hene ayns ymmodee cooishyn kialgagh.