CAB. IX

1Son ooilley shoh smooinee mee ayns my chree, dy jarroo dy hoilshaghey magh shoh ooilley, dy vel yn ynrick, as y creeney, as ny obbraghyn oc ayns laue Yee: cha nhione da dooinney erbee chamoo graih ny myskid, liorish ooilley ny ta kiongoyrt roo. 2Ta dy chooilley nhee cheet co-laik er ooilley: ta’n un red taghyrt er yn ynrick, as er y neu-ynrick; er mie as sie; er y ghlen, as y neu-ghlen; ersyn ta ouralley, as ersyn nagh vel ouralley: myr ta’n dooinney mie, myr shen ta’n drogh-yantagh; as eshyn ta loo, myr eshyn ta ayns ammys e loo. 3Ta shoh neesht mastey ny huilk smessey ta fo’n ghrian, dy vel yn taghyrt cheddin cheet er ooilley: ta creeaghyn cloan gheiney myrgeddin lane dy olk, as ta mee-hushtey ayns nyn gree choud as t’ad bio, as shoh myr t’ad geddyn baase.

4Son choud as ta dooinney bio, ta treishteil jeh: son ta moddey bio ny share na lion marroo. 5Son ta fys ec ny bioee dy vow ad baase; agh cha vel fys ec y varroo er nhee erbee, chamoo ta leagh sodjey oc, son ta’n imraa oc jarroodit. 6Myrgeddin nyn ghraih, nyn myskid, as nyn droo, ta nish er herraghtyn; chamoo ta nhee erbee sodjey oc dy yannoo ayns cooish erbee fo’n ghrian.

7Immee royd, ee dty arran lesh boggey, as iu dty eeyn lesh cree gennal, son ta Jee nish jannoo soiagh jeh dty obbraghyn. 8Lhig da dty gharmadyn ve kinjagh gial; as ny lhig da dty chione ve laccal ooil. 9Jean beaghey dy gerjoil marish y ven shynney lhiat, ooilley laghyn dty vea varvaanagh, t’eh fordrail dhyt fo’n ghrian, ooilley laghyn dty ardail: son shen dty chronney ’sy vea shoh, as ayns dty obbyr t’ou dy ghoaill fo’n ghrian. 10Cre-erbee t’ou goaill ayns laue dy yannoo, jean eh lesh dty niart, son cha vel veg yn obbyr, ny saase, ny tushtey, ny creenaght, ayns yn oaie raad t’ou goll.

11Ghow mee smooinaght elley, as honnick mee fo’n ghrian, nagh row yn race lesh y vieau, ny’n caggey lesh y niartal, ny foast arran ec deiney creeney ny foast berchys ec deiney tushtagh, ny foast foayr ec deiney schleioil; agh ta traa as taghyrt cheet orroo ooilley. 12Son ec dooinney myrgeddin cha vel fys er e hraa hene; myr ny eeastyn t’er ny hayrtyn ayns lieen baasoil, as myr ny eeanlee ta goit ’sy ribbey: shen myr ta cloan gheiney geulit ayns earish ghoogh, tra te tuittym doaltattym orroo.

13Yn chreenaght shoh myrgeddin ta mee er vakin fo’n ghrian, as s’mooar ren mee coontey jeh. 14Va balley-beg as earroo fardalagh dy gheiney ayn; as haink ree mooar n’oï, as chruinnee eh stiagh eh, as hrog eh tooryn ard n’oï: 15Nish va er ny gheddyn ayn dooinney boght creeney, as ren eshyn liorish e chreenaght yn balley y livrey; ny-yeih, cha chooinee peccagh erbee er y dooinney boght cheddin. 16Eisht dooyrt mee, Ta creenaght ny share na niart: agh ny-yeih, s’beg ta soit jeh creenaght yn dooinney boght, as cha vel e ghoan er nyn glashtyn. 17Ta geill smoo er ny choyrt da goan deiney creeney ayns meenid, na da’n veealeraght echeysyn ta reill mastey ny mee-cheeayllee. 18Ta creenaght ny share na greïnyn-caggee: agh ta un drogh-yantagh cur naardey saase mie ny ghaa.