CAB. II

1As shiuish t’eh er vioghey, va marroo ayns loghtyn as peccah. 2Ayndoo ren shiu gimmeeaght ayns y traa t’er n’gholl shaghey cordail rish cliaghtey yn theihll shoh, cordail rish prince pooar yn aer, yn spyrryd ta nish gobbraghey ayns y chloan dy vee-viallys: 3Ayndoo shoh ren shin ooilley myrgeddin baghey roish nish, ayns sayntyn ny foalley, cooilleeney yeearreeyn yn eill, as yn aigney: as va shin liorish dooghys nyn gloan dy yymmoose, dy jarroo myr feallagh elley. 4Agh Jee, ta berchagh ayns myghin, er e ghraih vooar liorish bynney lesh shin, 5Dy jarroo tra va shin marroo ayns peccaghyn, t’eh er vioghey shin cooidjagh marish Creest (liorish grayse ta shiu er nyn sauail) 6As t’eh er hroggal shin seose cooidjagh, as er hoiaghey shin cooidjagh ayns ynnydyn flaunyssagh ayns Creest Yeesey. 7Ayns ny earishyn ta ry-heet dy voddagh eh soilshaghey berchys erskyn-towse e ghrayse, ayns e chenjallys dooinyn, trooid Creest Yeesey. 8Son liorish grayse ta shiu er nyn sauail, trooid credjue; as shen cha nee j’iu hene: she gioot Yee eh: 9Cha nee liorish obbraghyn, nagh jinnagh dooinney erbee boggyssagh: 10Son ta shin yn obbyr echeysyn, er nyn groo ayns Creest Yeesey gys obbraghyn mie, ta Jee er n’oardaghey ro-laue dy jinnagh shin gimmeeaght ayndoo. 11Shen-y-fa cooinee-jee myr va shiu ayns traa dy row Ashoonee ayns yn eill, ta enmyssit an-ghiarey-chymmylt, liorish shen ta enmyssit giarey-chymmylt ayns yn eill jeant liorish laueyn; 12Dy row shiu ec y traa shen fegooish Creest, fegooish cairys gys vondeishyn lught-thie Israel, as joarreeyn da conaantyn y ghialdyn, gyn veg y treishteil, as fegooish Jee ayns y theihll: 13Agh nish ayns Creest Yeesey, shiuish va keayrt dy row foddey jeh, ta shiu nish er-gerrey liorish fuill Chreest. 14Son eshyn nyn shee, t’er n’yannoo shin ny-neesht unnane, as er lhieggal sheese yn voalley-vean va eddyr shin; 15Coyrt naardey ayns yn eill echey hene yn noidys, dy jarroo leigh ny saraghyn, va shassoo ayns oardaghyn, son dy yannoo ayn hene jeh jees, un dooinney noa, myr shen jannoo shee; 16As dy voddagh eh ad ny-neesht y hayrn gys shee rish Jee ayns un chorp liorish y chrosh, liorish shoh stroie yn noidys: 17As haink eh, as ren eh preacheil shee diuish va foddey jeh, as dauesyn va er-gerrey. 18Son ny hrooidsyn ta kied ain ny-neesht dy hayrn er-gerrey gys yn Ayr liorish un Spyrryd. 19Cha vel shin nish er-y-fa shen ny sodjey nyn yoarreeyn as jeh cheer whuaagh, agh sheshey-cummaltee marish ny nooghyn, as jeh lught-thie Yee; 20As troggit er undin ny ostyllyn as phadeyryn, Yeesey Creest hene yn ard chlagh-chorneilagh; 21Ersyn ta’n slane troggal, dy stoamey er ny choyrt cooidjagh, gaase dy ve ny hiamble casherick son y Chiarn; 22Aynsyn ta shiuish myrgeddin troggit son ynnyd-vaghee dy Yee trooid y Spyrryd.