CAB. III

1Son yn oyr shoh, ta mish Paul, pryssoonagh Yeesey Creest er y choontey euish Ashoonyn-quaagh; 2My she shen dy vel shiu er chlashtyn jeh’n phooar t’er ny choyrt dooys dy hirveish erriu grayse Yee. 3Kys liorish ashlish ren eh soilshaghey dooys yn folliaght (myr scrieu mee roïe ayns focklyn giarey. 4Lioroo tra ta shiu lhaih foddee shiu toiggal my hushtey’s ayns folliaght Chreest) 5Nagh row ayns eashyn elley er ny hoilshaghey da cloan gheiney, myr te nish er ny ashlaghey da e ostyllyn casherick as e adeyryn liorish y Spyrryd; 6Dy row ny Ashoonyn-quaagh dy ve co-eiraghyn, as jeh’n un chorp, as dy ghoaill ayrn cooidjagh jeh e ghialdyn ayns Creest, liorish y sushtal: 7Jeh va mish jeant my hirveishagh, cordail rish gioot grayse Yee v’er ny choyrt dooys liorish obbragh breeoil e phooar. 8Dooys, ta’n fer sloo jeh ooilley ny nooghyn, ta’n ghrayse shoh er ny choyrt, dy beign’s dy phreacheil mastey ny Ashoonyn-quaagh berchys Chreest nagh vod ve ronsit magh; 9As dy hoilshaghey dy foshlit da dy chooilley ghooinney, cre ta commeeys y folliaght ta er ve er dy hoshiaght y theihll keillit ayns Jee, ren dy chooilley nhee y chroo liorish Yeesey Creest: 10Dy voddagh nish v’er ny hoilshaghey da ny ard-reillyn as pooaraghyn ayns ynnydyn flaunyssagh liorish yn agglish ymmodee-filley creenaght Yee, 11Cordail rish e phointeil ro-laue chiare eh er-dy-rieau ayns Creest Yeesey nyn Jiarn: 12Ny hrooid ta daanys ain as kied dy hayrn er-gerrey da lesh shickyrys liorish y chredjue t’ain aynsyn. 13Shen-y-fa ta mee guee erriu ny lhig shiu nyn gree veue; son ny ta mish dy uilliaghtyn ayns y lieh euish, ta shoh yn ghloyr eu. 14Son yn oyr shoh ta mee croymmey my ghlioonyn gys Ayr nyn Jiarn Yeesey Creest, 15Jehsyn ta’n slane lught-thie ayns niau as er y thalloo er ny enmys. 16Dy jinnagh eh coyrt diuish, cordail rish berchys e ghloyr, dy ve er nyn niartaghey lesh pooar liorish e Spyrryd ayns y dooinney er cheu-sthie; 17Dy vod Creest baghey ayns ny creeaghyn eu liorish credjue; dy vod shiuish liorish ve fraueit as gruntit ayns graih, 18Ve abyl dy hoiggal marish ooilley ny nooghyn, cre ta’n lheead, as y lhiurid, as y diunid, as yn yrjid; 19As dy hoiggal graih Chreest, ta erskyn tushtey, dy vod shiu ve jeant magh lesh ooilley laanid Yee. 20Nish huggeysyn ta abyl dy yannoo foddey erskyn ooilley ny ta shin geearree ny smooinaghtyn, cordail rish y phooar ta gobbraghey dy niartal aynin, 21Huggey dy row gloyr ayns yn agglish liorish Creest Yeesey, trooid magh dy chooilley eash, seihll gyn jerrey. Amen.