CAB. IV

1Tra cheayll Mordecai kys myr ve kiarit, raip Mordecai e choamrey: as hug eh er aanrit-sack lesh leoie, as hie eh magh gys mean yn ard-valley, as cheayn eh lesh coraa ard as sharroo. 2As haink eh roish giat y ree: son cha row unnane erbee dy gholl stiagh er giat y ree ayns aanrit-sack. 3As ayns dy chooilley heer, raad erbee dy daink oardagh y ree, va dobberan trome mastey ny Hewnyn, as trostey, as keayney, as yllaghey, as lhie ymmodee ayns aanrit-sack as leoie.

4Er shoh haink sharvaantyn Esther, as ny shamyrderyn eck, as dinsh ad shoh jee: eisht va’n ven-reïn erskyn-towse seaghnit, as hug ee coamrey dy chur er Mordecai, as dy ghoaill jeh yn aanrit-sack: agh cha ghow eh eh. 5Eisht deïe Esther son Hatach fer jeh shamyrderyn y ree, va pointit dy hirveish urree, as hug ee lesh chaghteraght gys Mordecai, dy gheddyn fys kys va shoh, as cre’n-fa ve. 6Er shoh hie Hatach magh gys Mordecai, ayns straid yn ard-valley, va roish giat y ree. 7As dinsh Mordecai dasyn ooilley ny v’er daghyrt da, as mychione yn sym dy argid yiall Haman dy eeck stiagh gys tashtaghyn y ree, son kied dy stroie ny Hewnyn. 8Hug eh da myrgeddin copy jeh’n oardagh v’er ny choyrt ec Shushan dy stroie ad, dy yeeaghyn eh da Esther, as dy choyrt jee toiggal jeh, as dy churmal ee dy gholl stiagh gys y ree, dy yannoo aghin huggey, as dy ghuee son foayr ayns lieh yn pobble eck. 9As haink Hatach, as dinsh eh da Esther goan Vordecai.

10Reesht loayr Esther rish Hatach, as hug ee eh er chaghteraght gys Mordecai; 11Ta fys ec ooilley sharvaantyn y ree, as pobble cheeraghyn y ree, quoi-erbee, lhig da ve dooinney ny ben, hig fenish y ree gys y chooyrt sodjey stiagh, gyn ad ve eït, ta un leigh ayn dy chur ad gy-baase, er-lhimmey jeusyn huc nee yn ree sheeyney magh yn lorg airh reeoil, dy choyrt e vioys da: agh cha vel mish er ve eït dy heet fenish y ree rish jeih laghyn as feed. 12As dinsh ad da Mordecai goan Esther. 13Eisht doardee Mordecai dy ansoor Esther, Ny smooinee rhyt hene, dy jean uss scapail ayns thie yn ree veg share na ooilley ny Hewnyn. 14Son my vees oo ooilley-cooidjagh dty host ec y traa shoh, eisht nee feaysley as livrey-ys da ny Hewnyn troggal veih boayl elley, agh bee uss as thie dty ayrey er nyn stroie: as quoi ec ta fys, nagh vel oo er jeet gys y reeriaght, cour lheid y traa shoh?

15Eisht doardee Esther daue dy chur yn ansoor shoh da Mordecai. 16Immee as chaggil cooidjagh ooilley ny Hewnyn t’ayns Shushan, as trosht-jee er my hon’s, as ny jean-jee gee ny giu son three laa, oie ny laa: neem’s as my vraane aegey myrgeddin trostey, as eisht hem stiagh gys y ree, red nagh vel cordail rish y leigh: as my ta mee kiarit son cherraghtyn, lhig dou cherraghtyn. 17Er shoh hie Mordecai roish, as ren eh cordail rish ooilley ny va Esther er harey eh.