CAB. I

1Nish, shoh enmyn chloan Israel haink sheese gys Egypt; dy chooilley ghooinney as e lught-thie haink marish Jacob. 2Reuben, Simeon, Levi as Judah. 3Issachar, Zebulun, as Benjamin. 4Dan as Naphtali, Gad as Asher. 5As va ooilley ny anmeenyn haink veih meeghyn Yacob, three-feed as jeih: son va Joseph hannah ayns Egypt. 6As hooar Joseph baase as ooilley e vraaraghyn, as yn slane sheeloghe shen.

7As va cloan Israel sluightoil, as ren ad bishaghey dy mooar, as daase ad ayns earroo, as haink ad dy ve erskyn-towse pooaral: as lhieen ad y cheer. 8Nish, hrog ree noa ayns Egypt, nagh row enney echey er Joseph. 9As dooyrt eh rish e phobble, Cur-my-ner ta pobble cloan Israel ny shlee, as ny s’pooaral na shinyn. 10Tar-jee; lhig dooin dellal roo dy tastagh: er-aggle dy jean ad bishaghey, as dy jig eh gy-kione, tra nee caggey brishey magh, dy shassee ad lesh nyn noidyn, as dy jean ad caggey nyn ’oï, as myr shen dy jean ad cosney roue ass y cheer. 11Ren ad, er-y-fa shen, soiaghey harrystoo oaseiryn, dy reayll ad fo lesh erraghyn. As ren ad troggal da Pharaoh ard-valjyn gour tashtaghyn-caggee, Pithom as Rahamses. 12Agh myr smoo v’ad freilt fo, wheesh shen smoo vishee ad, as daase ad ayns earroo. As v’ad seaghnit mychione cloan Israel. 13As dreill ny Egyptianee cloan Israel fo shirveish dewil. 14As hug ad orroo dy ve skee jeh nyn mioys lesh bondiaght creoi, ayns morter, as ayns brick, as ayns dy chooilley cheint dy obbyr vagheragh; dy chooilley vonney dy hirveish chiangle ad orroo, ve lesh dewlys.

15As loayr ree Egypt rish ny mraane-reaylt Hebrewnagh (va ennym y derrey yeh Shiphrah, as ennym y jeh elley Puah.) 16As dooyrt eh, Tra ta shiu livrey mraane ny Hebrewnee, as ad er jeet gys y traa; my she lhiannoo-mac t’ayn, marr-jee eh; agh my she inneen, freill-jee bio ee. 17Agh va ny mraane-reaylt ayns aggle Yee, as cha ren ad myr doardee ree Egypt daue, agh haue ad ny lhiennoo-mec bio. 18As hug ree Egypt fys er ny mraane-reaylt, as dooyrt eh roo, Cre’n-fa ta shiu er n’yannoo myr shoh, as er hauail bio ny lhiennoo-mec? 19As dooyrt ny mraane-reaylt rish Pharaoh, Er-yn-oyr nagh vel mraane ny Hebrewnee goll-rish mraane ny Egyptianee: son t’ad bioyr, as t’ad livreit roish my ta ny mraane-reaylt roshtyn. 20Ren Jee, er-y-fa shen ny mraane-reaylt y vannaghey; as ren y pobble bishaghey, as daase ad feer phooaral. 21As haink eh gy-kione, er-yn-oyr dy row ny mraane-reaylt ayns aggle Yee, dy ren eh yn lught-thie oc y vannaghey. 22As hug Pharaoh currym er ooilley e phobble, gra, Dy chooilley lhiannoo-mac hig son y theihll nee shiu ceau ’syn awin, agh dy chooilley inneen nee shiu sauail bio.