CAB. X

1As dooyrt y Chiarn rish Moses, Immee gys Pharaoh: son ta mee er chreoghey yn cree echey, as cree e harvaantyn; dy voddin ad shoh my chowraghyn y hoilshaghey kiongoyrt rish: 2As dy vod uss ginsh ayns clashtyn dty vac, as cloan dty chlienney, cre ny reddyn yindyssagh ta mee er n’obbraghey ayns Egypt, as my chowraghyn ta mee er hoilshaghey ny mast’ oc, dy vod fys ’ve euish, dy nee mish y Chiarn. 3As haink Moses as Aaron stiagh fenish Pharaoh, as dooyrt ad rish, Myr shoh ta’n Chiarn, Jee ny Hebrewnee gra, Caïd nee oo gobbal d’injillaghey oo hene kiongoyrt rhym? lhig y raad da my phobble, dy vod ad mish y hirveish. 4Er-nonney, my obbys oo dy lhiggey yn raad da my phobble, cur-my-ner, mairagh ver-yms lhiam stiagh ny locustyn ayns dty ardjyn. 5As nee ad coodaghey eaghtyr y thallooin, nagh vod fer cronnaghey yn thalloo, as nee ad stroie yn fooilliagh shen t’er scapail, shen ny t’er-mayrn diuish veih’n sniaghtey-garroo, as ver ad naardey dy chooilley villey ta gaase diuish ’sy vagher. 6As lhieenee ad ny thieyn ayd’s, as thieyn dty harvaantyn, as thieyn ooilley ny Egyptianee; lheid nagh vaik rieau dty ayraghyn, ny dty henn-ayryn, veih’n traa ruggyr ad gys y laa t’ayn jiu. As hyndaa eh mygeayrt, as hie eh magh veih Pharaoh. 7As dooyrt fir-oik Pharaoh rish, Caïd vees y dooinney shoh ny ribbeh dooin? lhig y raad da ny deiney, dy vod ad shirveish y Chiarn y Jee oc; nagh vel fys ayd foast, dy vel Egypt mow? 8As va Moses as Aaron er nyn goyrt lhieu reesht fenish Pharaoh: as dooyrt eh roo, Immee-jee, shirveish-jee yn Chiarn y Jee eu: agh quoi ad ta ry-hoi goll? 9As dooyrt Moses, Nee mayd goll lesh nyn mooinjer aegey as shenn; lesh nyn mec as nyn inneenyn; lesh nyn shioltaneyn as lesh nyn shellooyn nee mayd goll; son shegin dooin feailley y reayll gys y Chiarn. 10As dooyrt eshyn roo, Myr shen dy row’n Chiarn mêriu, my lhig-yms y raad diuish as da’n vooinjer veggey eu: jeeagh-jee reue, son ta olk rhymbiu. 11Cha nee shen myr vees eh: immee-jee nish shiuish ta nyn gheiney, as shirveish-jee yn Chiarn; son shen va nyn aghin. As v’ad er nyn eiyrt magh veih kionfenish Pharaoh.

12As dooyrt y Chiarn rish Moses, Sheeyn magh dty laue harrish cheer Egypt son ny locustyn, dy jig ad seose er cheer Egypt, as dy der ad naardey ooilley glassyraght y cheer, eer ooilley ny ta’n sniaghtey-garroo er n’aagail. 13As ren Moses e lorg y heeyney magh harrish cheer Egypt, as hug y Chiarn lesh geay-niar er y cheer fey-ny-laa, as fud-ny-hoie shen; as tra va’n moghrey er jeet rish, hug y gheay-niar lesh ny locustyn. 14As hie ny locustyn seose harrish ooilley cheer Egypt; as lhie ad er ooilley ardjyn Egypt: v’ad erskyn earroo, as dewil: roue cha row rieau lheid ny locustyn, chamoo vees nyn lheid nyn yeï. 15Son choodee ad ooilley eaghtyr y thallooin, myr shen dy row’n cheer fo dorraghys, as d’ee ad ooilley lossreeyn y cheer, as ooilley mess ny biljyn va’n sniaghtey-garroo er n’aagail; as cha row glassyraght erbee er-mayrn er ny biljyn, ny ayns lossreeyn y vagheragh, trooid ooilley cheer Egypt.

16Er shoh hug Pharaoh fys dy siyragh er Moses as Aaron; as dooyrt eh, Ta mee er n’yannoo peccah noi’n Chiarn y Jee eu, as noi eu hene. 17Leih nish er-y-fa shen, ta mee guee ort, my pheccah agh yn un cheayrt shoh: as guee-jee gys y Chiarn nyn Yee, dy gow eh ersooyl voym yn kerraghey baasoil shoh, ny-lomarcan. 18As hie eh magh veih Pharaoh, as ren eh guee gys y Chiarn. 19As hyndaa yn Chiarn yn gheay mygeayrt gys y neear, feer lajer as niartal, ren sheebey ersooyl ny locustyn, as ad y cheau ayns yn Aarkey Jiarg: cha row un locust faagit ayns ooilley ardjyn Egypt. 20Agh ren y Chiarn cree Pharaoh y chreoghey, myr shen nagh lhiggagh eh yn raad da cloan Israel.

21As dooyrt y Chiarn rish Moses, Sheeyn magh dty laue lesh niau, dy vod dorraghys ’ve harrish cheer Egypt, eer dorraghys dullyr oddys v’er ny ennaghtyn. 22As heeyn Moses magh e laue lesh niau: as va dorraghys trome dullyr er ooilley cheer Egypt son three laa. 23As cha b’leayr yn derrey yeh yn jeh elley, chamoo dirree fer veih e ynnyd son three laa: agh va soilshey ec ooilley cloan Israel ayns nyn gummallyn.

24As hug Pharaoh fys er Moses, as dooyrt eh, Immee-jee, shirveish-jee yn Chiarn: ynrycan lhig da nyn shioltaneyn, as nyn shellooyn ve faagit: lhig da’n vooinjer veggey eu myrgeddin goll mêriu. 25As dooyrt Moses, Shegin dhyt myrgeddin cur dooin ourallyn as chebballyn-losht, dy vod mayd ouralley gys y Chiarn y Jee ain. 26Shegin da’n maase ain myrgeddin goll mârin: cha bee yngyn faagit nyn yeï: son jeu shen shegin dooin goaill, dy hirveish y Chiarn y Jee ain; as cha vel fys ain cre lesh shegin dooin shirveish y Chiarn, derrey nee mayd roshtyn gys shen.

27Agh ren y Chiarn cree Pharaoh y chreoghey, as cha lhiggagh eh yn raad daue. 28As dooyrt Pharaoh rish, Ass my hilley, jeeagh dhyt hene, ny tar m’enish arragh: son er y laa shen hig oo m’enish, bee oo er dty choyrt gy-baase. 29As dooyrt Moses rish, S’mie t’ou er loayrt; dt’eddin cha vaik-ym arragh.