CAB. XII

1As loayr y Chiarn rish Moses as Aaron ayns cheer Egypt, gra, 2Bee’n vee shoh toshiaght ny meeaghyn, bee eh yn chied vee jeh’n vleïn diu.

3Loayr-jee rish slane chaglym-cooidjagh Israel, gra, Er y jeihoo laa jeh’n vee shoh, nee ad goaill daue hene eayn: dy chooilley ghooinney cordail rish lught-thie nyn ayrey, eayn son thie. 4As my vees y lught-thie beggan son yn eayn, lhig dasyn as e naboo-dorrys ’ghoaill eh, cordail rish earroo ny anmeenyn; nee dagh dooinney rere myr t’eh goaill ayrn jeh, coontey son yn eayn. 5Bee’n eayn fegooish lheamys, oasht fyrryn: nee shiu goaill eh veih ny kirree, ny veih ny goair. 6As nee shiu freayll eh seose derrey’n chiarroo laa yeig jeh’n vee cheddin: as nee slane chaglym-cooidjagh Israel y varroo eh ’syn astyr. 7As nee ad goaill jeh’n uill, as spreih eh er y daa essyn, as er linteyryn-dorrys ny thieyn, raad nee ad gee eh. 8As nee ad gee yn eill ’syn oie shen, roast lesh aile, as lesh arran gyn soorit, as lesh lossreeyn sharroo nee ad gee eh. 9Jeeagh nagh n’ee oo jeh aw, ny broit er aght erbee ayns ushtey, agh roast lesh aile; e chione lesh e chassyn, as shen ny ta bentyn daue. 10As cha vaag shiu veg y fooilliagh jeh derrey’n voghrey: agh cre-erbee’n fooilliagh vees er-mayrn derrey’n voghrey, nee shiu lostey lesh aile.

11As shoh myr nee shiu gee eh; lesh nyn meeghyn cryssit, nyn mraagyn er nyn gassyn, as y lorg eu ayns nyn laue: as nee shiu gee eh ayns siyr; eayn-caisht y Chiarn eh. 12Son hem’s trooid cheer Egypt yn oie noght; as nee’m bwoalley ooilley’n chied er ny ruggey ayns cheer Egypt, chammah dooinney as baagh: as noi ooilley 12:12 Ard-gheiney,jeeghyn Egypt neem’s briwnys y chooilleeney: mish y Chiarn. 13As bee’n uill diuish son cowrey er ny thieyn raad ta shiu: as tra hee-yms yn uill, hem shaghey, as cha bee’n chramp erriuish dy stroie shiu, tra nee’m bwoalley cheer Egypt. 14As bee’n laa shoh eu ayns cooinaghtyn kinjagh; as nee shiu freayll eh feailley gys y Chiarn, trooid nyn sheelogheyn: nee shiu freayll eh feailley, liorish oardagh son dy bragh. 15Shiaght laa nee shiu gee arran gyn soorit: er yn eer chied laa ver shiu soorit magh ass nyn dhieyn: son quoi-erbee ee-ys arran veih’n chied laa derrey’n chiaghtoo laa, bee’n annym shen giarit jeh veih Israel. 16As er y chied laa bee chaglym-cooidjagh casherick, as er y chiaghtoo laa bee eu chaglym-cooidjagh casherick: cha bee monney erbee dy obbyr jeant orroo, er-lhimmey jeh ny shegin da dy chooilley ghooinney gee, shen ny-lomarcan ta lowit diu dy yannoo. 17As nee shiu dy tastagh freayll feailley yn arran gyn soorit; son corrym rish yn eer laa shoh, ta mish dy choyrt lhiam ny sheshaghtyn-caggee eu magh ass cheer Egypt: shen-y-fa ver shiu tastey da’n laa shoh trooid nyn sheelogheyn, liorish oardagh son dy bragh.

18Ayns y chied vee, er y chiarroo laa yeig jeih’n vee, ’syn astyr, nee shiu gee arran gyn soorit, derrey’n un laa as feed jeih’n vee ’syn astyr. 19Son shiaght laa cha bee soorit ry-gheddyn ayns nyn dhieyn: son quoi-erbee ee-ys shen ny ta soorit, bee’n eer annym shen giarit jeh veih slane sheshaght Israel, edyr eh ve ny yoarree, ny ruggit ’sy cheer. 20Cha jean shiu gee veg ta soorit ayn: ayns ooilley nyn gummallyn nee shiu gee arran gyn soorit.

21Eisht hug Moses fys er ooilley shanstyr Israel, as dooyrt eh roo, Reih shiu magh, as gow-jee eayn cordail rish nyn gummallyn, as marr-jee yn eayn-caisht. 22As nee shiu goaill dhoss dy hyssop, as y hummey eh ’syn uill t’ayns y taagh, as nee shiu spreih yn ard-dorrys, as y daa essyn lesh yn uill t’ayns y taagh: as cha jed unnane eu magh er dorrys e hie derrey’n voghrey. 23Son hed y Chiarn trooid dy woalley ny Egyptianee; as tra hee eh yn uill er yn ard-dorrys, as er y daa essyn, nee’n Chiarn goll shaghey yn dorrys shen, as cha jean eh surranse yn stroider dy heet stiagh ayns ny thieyn euish, dy nyn mwoalley. 24As ver shiu tastey da’n red shoh son oardagh, dhyt hene, as da dty vec son dy bragh. 25As hig eh gy-kione, tra vees shiu er jeet gys y cheer nee’n Chiarn y choyrt diu, cordail rish e yialdyn, dy jean shiu freayll yn chirveish shoh. 26As hig eh gy-kione, tra nee nyn gloan gra riu, Cre ta shiu dy hoiggal liorish y chirveish shoh? 27Dy jir shiu, Shoh oural-caisht y Chiarn hie shaghey thieyn cloan Israel ayns Egypt, tra woaill eh ny Egyptianee, as ren eh ny thieyn ainyn y livrey. As chroym yn pobble nyn ghing, as ren ad ooashlaghey. 28As hie cloan Israel rhymboo, as ren ad myr va’n Chiarn er harey da Moses as Aaron; shen myr ren ad.

29As haink eh gy-kione, ec y vean-oie, dy ren y Chiarn bwoalley lesh baase ooilley’n chied-ruggit ayns cheer Egypt, veih’n chied-ruggit jeh Pharaoh, va soie er e stoyl-reeoil, gys y chied-ruggit jeh’n chappee va ’sy phryssoon; as ooilley’n chied er ny vrey jeh’n ollagh. 30As dirree Pharaoh ’syn oie, eh hene as ooilley e harvaantyn, as ooilley ny Egyptianee; as va eam atchimagh ayns Egypt: son cha row thie raad nagh row fer marroo.

31As deïe eh er son Moses as Aaron er yn oie, as dooyrt eh, Trog-jee erriu, as cosne-jee magh veih mastey my phobble, chammah shiuish, as cloan Israel; as immee-jee, shirveish-jee yn Chiarn, myr ta shiu er ghra. 32Myrgeddin gow-jee nyn shioltaneyn as nyn shellooyn, myr ta shiu er ghra, as fow-jee reue; as bannee-jee mish myrgeddin. 33As ren ny Egyptianee chionney er y pobble dy gheddyn ad dy tappee ersooyl ass y cheer; son dooyrt ad, Deiney marroo shin ooilley. 34As ghow’n pobble yn theayst oc roish my ve soorit, lesh nyn siyn fuinnee kianlt seose ayns nyn eaddagh er nyn geayltyn. 35As ren cloan Israel cordail rish sarey Voses: as deeasee ad veih ny Egyptianee jewellyn argid, as jewellyn airh, as coamrey. 36As hug y Chiarn foayr da’n pobble ayns shilley ny Egyptianee, myr shen dy dug ad daue lheid ny reddyn as hir ad. As spooill ad ny Egyptianee.

37As ghow cloan Israel nyn yurnah veih Rameses gys Succoth, mysh shey cheead thousane coshee va deiney abyl, cheu-mooie jeh cloan. 38As hie ymmodee dy leih elley ren lhiantyn huc seose myrgeddin mâroo; as shioltaneyn, as shellooyn, eer niart maase. 39As ren ad berreenyn jeh’n theayst hug ad lhieu magh ass Egypt: son cha row eh slane fuinnit; er-yn-oyr dy row ad eiyrit magh ass Egypt ayns siyr, as cha row tra oc son fuirriaghtyn, chamoo v’ad er n’aarlaghey daue hene veg y veaghey gour nyn yurnah.

40Nish va 12:40 Tra nyn gummal,joarreeaght chloan Israel ayns Egypt, kiare cheead as jeih bleeaney as feed. 41As ve myr shen, ec kione ny kiare cheead as jeih bleeaney as feed, eer er y laa cheddin haink eh gy-kione, dy jagh ooilley sheshaghtyn-caggee yn Chiarn magh ass cheer Egypt. 42Te oie feer feailley dy ve freilt gys y Chiarn, son coyrt lesh magh ad veih cheer Egypt: shoh’n oie shen gys y Chiarn ta dy ve freilt feailley, liorish ooilley cloan Israel ayns nyn sheelogheyn.

43As dooyrt y Chiarn rish Moses as Aaron, Shoh oardagh yn chaisht. Cha jean joarree erbee gee jeh. 44Agh sharvaant dy chooilley ghooinney ta kionnit lesh argid, tra t’ou er yiarey-chymmylt eh, eisht foddee eh gee jeh. 45Cha jean joarree, ny sharvaant failt gee jeh. 46’Syn un thie vees eh er ny ee; cha der oo lhiat veg jeh’n eill magh ass y thie: chamoo nee shiu craue jeh y vrishey. 47Nee slane sheshaght Israel freayll eh. 48As tra nee joarree beaghey mayrt, as eh aignagh dy reayll caisht y Chiarn, lhig da ooilley ny fyrrynee echey v’er nyn yiarey-chymmylt, as eisht lhig da cheet as freayll eh; as bee eh myr fer ruggit ayns y cheer: son cha negin da persoon chymmyltagh erbee gee jeh. 49Yn un leigh vees ny chour-syn ta ruggit ny mast’ eu, as da’n joarree ta beaghey mêriu. 50Shoh myr ren ooilley cloan Israel; myr hug y Chiarn sarey da Moses as Aaron, myr shen ren ad. 51As haink eh gy-kione er yn eer laa cheddin, dy dug y Chiarn lesh cloan Israel magh ass cheer Egypt, liorish nyn sheshaghtyn-caggee.