CAB. XIII

1As loayr y Chiarn rish Moses, gra. 2Jean ooilley yn chied er ny ruggey y chasherickey dooys; cre-erbee ta’n chied-ruggit mastey cloan Israel, chammah jeh dooinney ny jeh baagh; lhiam’s eh.

3As dooyrt Moses rish y pobble, Cooinee-jee er y laa shoh er haink shiu magh ass Egypt, ass thie ny bondiaght; son lesh laue lajer hug y Chiarn lesh shiuish magh veih’n ynnyd shoh: cha bee soorit erbee er ny ee er. 4Er y laa shoh haink shiu magh, ayns mee Abib.

5As shoh myr vees eh, erreish da’n Chiarn v’er choyrt lesh stiagh oo gys cheer ny Chanaaniteyn, as ny Hittiteyn, as ny Amoriteyn, as ny Hiviteyn, as ny Jebusiteyn, vreear eh da dty ayraghyn dy choyrt dhyt’s cheer messoil ayns bainney as mill, dy jean oo yn chirveish shoh ’chooilleeney ’sy vee shoh. 6Son shiaght laa nee oo gee arran gyn soorit, as er y chiaghtoo laa vees feailley gys y Chiarn. 7Rish shiaght laa bee arran gyn soorit er ny ee: cha bee arran lesh soorit ry-akin ny mast’ eu, chamoo vees eh ry-gheddyn ayns ooilley dty ardjyn.

8As ver oo toiggal da dty vac er y laa shen, gra, Ta shoh son cooinaghtyn jeh shen ren y Chiarn er my hon’s, tra haink mee magh ass Egypt. 9As bee eh son cowrey dhyt er dty laue, as son cooinaghtyn roish dty hooillyn; dy vod leigh’n Chiarn ve ayns dty veeal: son lesh laue lajer ta’n Chiarn er chur lesh oo magh veih Egypt. 10Nee oo er-y-fa shen yn oardagh shoh y reayll ’syn imbagh cooie veih bleïn dy bleïn.

11As shoh myr vees eh, tra ver y Chiarn lesh stiagh oo gys cheer ny Chanaaniteyn, myr vreear eh dhyt’s, as da dty ayraghyn as tra ver eh dhyt eh: 12Dy der oo er-lheh da’n Chiarn ooilley yn chied-ruggit, as jeh dty chied ingan maaish, bee ny fyrrynee lesh y Chiarn. 13As dy chooilley chied sharragh assyl nee oo coonrey son eayn; as mannagh jean oo eh y eaysley, eisht nee oo’n mwannal echey y vrishey: as son dy chooilley lhiannoo shinney mastey dty chloan nee oo coonrey ’yannoo lesh sym dy argid.

14As shen myr vees eh, tra nee dty vac fênaght jeed ny lurg shoh, gra, Cre’n-fa ta shoh? Dy jir oo rish, Lesh laue lajer hug y Chiarn lesh shinyn magh ass Egypt, veih thie ny bondiaght. 15As haink eh gy-kione, tra dy by-ghoillee lesh Pharaoh yn raad y lhiggey dooin, dy ren y Chiarn stroie ooilley’n chied er ny ruggey ayns cheer Egypt, chammah yn chied er ny ruggey jeh dooinney as baagh: shoh’n oyr dy vel mee chebbal ayns oural da’n Chiarn dy chooilley fyrrynagh chied-ruggit: agh ooilley my chloan shinney ta mee feaysley: 16As bee shoh son cowrey er dty laue, as son cooinaghtyn roish dty hooillyn: son lesh laue lajer hug y Chiarn lesh shin magh ass Egypt.

17As haink eh gy-kione, tra lhig Pharaoh yn raad da’n pobble, dy ren Jee ad y leeideil, cha nee er raad cheer ny Philistinee, ga dy row shen yn aa-gherrit; son dooyrt Jee, Er-aggle dy ghow’n pobble arrys tra hee ad caggey, as dy jyndaa ad back gys Egypt. 18Agh ren Jee yn pobble y leeideil mygeayrt, liorish raad faasagh yn Aarkey Jiarg. As hie cloan Israel magh ass cheer Egypt ayns order-caggee. 19As ghow Moses craueyn Yoseph mârish; son v’eh er choyrt cloan Israel fo breearrey gyere, gra, Nee Jee son shickyrys jeeaghyn erriu, as ver shiu lhieu ersooyl mêriu my chraueyn veih shoh.

20As ghow ad nyn yurnah veih Succoth, as ren ad campal ayns Etham, rish oirr yn aasagh. 21As hie’n Chiarn rhymboo ’sy laa ayns pillar bodjallagh, dy leeideil y raad daue; as ’syn oie ayns pillar dy aile, dy choyrt daue soilshey; dy gholl er nyn doshiaght ’sy laa as ’syn oie. 22Cha ghow eh ersooyl yn pillar bodjallagh ’sy laa, ny’n pillar ailagh ’syn oie veih shilley’n phobble.