CAB. XIV

1As loayr y Chiarn rish Moses, gra, 2Abbyr rish cloan Israel, ad dy hyndaa as dy champal roish Pi-hahiroth, eddyr Migdol as yn aarkey, jeeragh er Baal-zephon: shen y raad nee shiu campal rish oirr ny marrey. 3Son jir Pharaoh mychione cloan Israel, T’ad er-shaghryn ’sy cheer, t’ad goit ’syn aasagh myr ayns ribbeh. 4As neem’s cree Pharaoh y chreoghey, dy jed eh er nyn eiyrt; as yioyms ooashley liorish soilshaghey my phooar er Pharaoh, as er ooilley e heshaght-chaggee; as bee fys ec ny Egyptianee dy nee mish y Chiarn. As shen myr ren ad.

5As ve er ny insh da ree Egypt dy row’n pobble er-chea; as va cree Pharaoh as e harvaantyn er ny hyndaa noi’n pobble, as dooyrt ad, Kys ta shin er n’yannoo shoh, dy vel shin er lhiggey’n raad da Israel veih nyn shirveish. 6As hooar eh aarloo e ainagh, as ghow eh e phobble mârish: 7As ghow eh shey cheead reih fainagh, as ooilley fainee Egypt, as captanyn harrish dagh unnane oc. 8As ren y Chiarn cree Pharaoh ree Egypt y chreoghey, as hie eh er-eiyrt’s cloan Israel: as hie cloan Israel er nyn doshiaght rhymboo lesh laue ard. 9As hie ny Egyptianee er nyn eiyrt’s, lesh ooilley cabbil as fainee Pharaoh, as e varkee, as e heshaght-chaggee, as haink ad seose roo, campal rish yn aarkey, liorish Pi-hahiroth jeeragh er Baal-zephon.

10As hayrn Pharaoh er-gerrey, as tra hrog cloan Israel seose nyn sooillyn, cur-my-ner, va ny Egyptianee marchal er nyn eiyrt’s; as v’ad ayns aggle mooar: as deïe pobble Israel dy ard gys y Chiarn. 11As dooyrt ad rish Moses, Nee son nagh row oaiaghyn ayns Egypt t’ou er nyn leeideil ersooyl, dy gheddyn baase ’syn aasagh? Cre’n-fa t’ou er ghellal myr shoh rooin ayns coyrt lhiat shin magh veih Egypt. 12Nagh nee shoh myr dooyrt shin rhyt ayns Egypt, gra, Faag shin dy vod mayd shirveish ny Egyptianee? son veagh eh ny bare dooin dy hirveish ny Egyptianee, ny dooin dy gheddyn baase ’syn aasagh.

13As dooyrt Moses rish y pobble, Ny bee aggle erriu; shass-jee, as cur-jee my-ner yn saualtys nee’n Chiarn soilshaghey diu er y laa shoh: son ny Egyptianee ta shiu er vakin jiu, cha vaik shiu ad dy bragh arragh. 14Nee’n Chiarn caggey er nyn son, as bee-jee shiuish nyn dhost. 15As dooyrt y Chiarn rish Moses, Cre’n-fa t’ou geam hym’s? Abbyr rish cloan Israel ad dy gholl er nyn doshiaght. 16Agh trog uss seose dty lorg, as sheeyn magh dty laue er yn aarkey, as bee eh er ny rheynn, as hed cloan Israel er thalloo chirrym trooid mean yn aarkey. 17As neem’s, cur-my-ner, neem’s creeaghyn ny Egyptianee y chreoghey, as hed ad geiyrt orroo: as yioyms dou hene ooashley harrish Pharaoh, as ooilley e heshaght-chaggee, er ny fainee, as er ny markee echey. 18As bee fys ec ny Egyptianee dy nee mish y Chiarn, tra ta mee er gheddyn dou hene ooashley er Pharaoh, er ny fainee echey, as er e varkee. 19As ren ainle Yee, hie roish camp Israel, scughey as goll nyn gooyl: as scugh y pillar bodjallagh hie roue, as hass eh nyn gooyl. 20As haink eh eddyr camp ny Egyptianee as camp Israel: agh ve ny vodjal as dorraghys da ny Egyptianee, agh hug eh soilshey ’syn oie da ny Israeliteyn: myr shen nagh daink ad coair y cheilley er y slane oie. 21As heeyn Moses magh e laue erskyn yn aarkey; as hug y Chiarn er yn aarkey dy hraie, lesh geay niartal veih’n niar fud-ny-hoie shen, as haink y thalloo chirrym rish, as va ny ushtaghyn er nyn scarrey veih-my-cheilley. 22As hie cloan Israel trooid yn aarkey er thalloo chirrym: as va ny ushtaghyn son voalley daue er nyn laue yesh, as er nyn laue hoshtal.

23As hie ny Egyptianee er nyn eiyrt’s, as deiyr ad orroo gys mean yn aarkey, eer ooilley cabbil Pharaoh, ny fainee, as ny markee. 24As haink eh gy-kione, ec arrey y voghrey dy yeeagh y Chiarn lesh sheshaght-caggee ny Egyptianee trooid y pillar dy aile, as y vodjal, as skeayl eh atchim er sheshaght-caggee ny Egyptianee. 25As hug eh lieh-chiartys er queeylyn ny fainee oc, dy doillee daue ad y imman: er shoh dooyrt ny Egyptianee, Lhig dooin chea ersooyl veih eddin Israel; son ta’n Chiarn caggey nyn lieh, noi ny Egyptianee.

26As dooyrt y Chiarn rish Moses, Sheeyn magh dty laue erskyn yn aarkey, as hig ny ushtaghyn dy cheilley reesht er ny Egyptianee, er ny fainee, as er ny markee oc. 27As heeyn Moses magh e laue erskyn yn aarkey, as haink ny ushtaghyn dy cheilley ec soilshagh yn laa; as ren ny Egyptianee strepey noi [ny ushtaghyn;] as ren y Chiarn ny Egyptianee y chur haart ayns mean yn aarkey. 28As haink ny ushtaghyn dy cheilley, as choodee ad ny fainee, as ny markee, as ooilley sheshaght-caggee Pharaoh, hie stiagh ’syn aarkey er nyn eiyrt’s: cha row unnane hene jeu faagit er-mayrn. 29Agh hie cloan Israel er nyn doshiaght er thalloo chirrym, ayns mean yn aarkey: as va ny ushtaghyn son voalley daue, er nyn laue yesh, as er nyn laue hoshtal. 30Shoh myr ren y Chiarn livrey Israel er y laa shen veih laue ny Egyptianee: as honnick Israel ny Egyptianee nyn girp marroo er y traie. 31As honnick Israel yn obbyr vooar shen ren y Chiarn er ny Egyptianee: as ghow’n pobble aggle roish y Chiarn, as chred ad y Chiarn, as e harvaant Moses.