CAB. XV

1Eisht hrog Moses as cloan Israel yn arrane-moyllee shoh gys y Chiarn, gra, Neem’s kiaulleeaght gys y Chiarn: son t’eh dy gloyroil er gheddyn barriaght; yn cabbyl as e varkiagh t’eh er cheau ’syn aarkey. 2Ta’n Chiarn my niart as my arrane, hug eh dou livrey-ys: eshyn my Yee, as trog-yms cummal casherick da; Jee my ayraghyn, as ver-ym ooashley da. 3Ta’n Chiarn yn ard er-caggee; Jehovah yn ennym echey. 4Fainee Pharaoh as e heshaght-chaggee t’eh er cheau ’syn aarkey: e reih captanyn t’eh er vaih ’syn Aarkey Jiarg. 5Ren ny diunidyn ad y choodaghey: sheese hie ad gys y ghrunt myr clagh. 6Ta dty laue yesh, O Hiarn, er ve gloyroil ayns pooar: ta dty laue yesh, O Hiarn, er vroo yn noid dy myn. 7As ayns mooad’s dty ghloyr t’ou er choyrt fo-chosh adsyn dirree seose dt’oï: hug oo magh dty yymmoose, hug mow ad myr stubble. 8As ec sheidey dty yymmoose va ny ushtaghyn er nyn jaglym dy cheilley, hass ny ushtaghyn myr voalley, as va ny diunidyn riojit ayns cree yn aarkey. 9Dooyrt y noid, Hem er nyn eiyrt’s, berr-ym orroo, rheynn-ym y spooilley: bee cooilleeney m’aigney aym orroo; my chliwe nee’m y hayrn, nee my laue ad y stroie. 10Lesh dty gheay ren oo sheidey; ren y faarkey nyn goodaghey: ren ad sinkeil myr leoaie ayns ny ushtaghyn stermagh. 11Quoi ta casley rhyt’s, O Hiarn, mastey ny jeeghyn! quoi ta casley rhyt, gloyroil ayns casherickys, ta moylley cair dhyt lesh arrym, uss ta gobbraghey mirrilyn? 12Heeyn oo magh dty laue yesh: ren y thalloo ad y lhuggey. 13Ayns dty vyghin, t’ou er leeideil magh dty phobble, daue t’ou er choyrt livrey-ys: t’ou er leeideil ad ayns dty niart gys dty chummal casherick. 14Clynnee yn pobble, as bee aggle orroo; nee seaghyn greimmey cummaltee Phalestina. 15Shen y traa vees atchim er dukeyn Edom; er deiney niartal Voab gowee creau atchimagh greme; hed nyn dappey veih ooilley cummaltee Chanaan. 16Nee aggle as atchim tuittym orroo, liorish niart dty roih cha gleashee ad ny smoo na clagh, derrey hed dty phobble trooid [nyn droailt] O Hiarn, derrey hed y pobble ny hrooid, yn pobble t’ou er chosney [veih Egypt.] 17Ver oo lhiat stiagh ad, as nee oo ad y hoiaghey er slieau dty eiraght, ’syn ynnyd, O Hiarn, t’ou er chiarail son dty chummal hene; ’syn ynnyd casherick, O Hiarn, ta dty laueyn er hickyraghey. 18Nee’n Chiarn reill son dy bragh as dy bragh. 19Son hie cabbil Pharaoh stiagh ’syn aarkey, lesh e ainee, as e varkee, as hug y Chiarn lesh reesht ushtaghyn yn aarkey orroo: agh ren cloan Israel troailt er thalloo chirrym ayns mean yn aarkey.

20As ren y phadeyr Miriam, shuyr Aaron, greïe-chiaull y ghoaill ’sy laue eck; as deiyr ooilley ny mraane urree lesh greinyn-kiaullee, as lesh daunsin. 21As hie Miriam lhieu, Jean-jee kiaulleeaght gys y Chiarn; son t’eh dy gloyroil er gheddyn barriaght; yn cabbyl as e varkiagh t’eh er vaih ’syn aarkey. 22Myr shoh hug Moses lesh Israel veih’n Aarkey Jiarg, as ad y leeideil stiagh gys faasagh Shur, as ren ad troailt three laa ’syn aasagh, as cha dooar ad ushtey.

23As tra haink ad gys Marah, cha voddagh ad giu jeh ushtaghyn Marah, son v’ad sharroo: shen-y-fa ve enmyssit Marah. 24As ren y pobble plaiynt noi Moses, gra, Cre nee mayd son ushtey? 25As deïe eh er y Chiarn, as ren y Chiarn billey y yeeaghyn da, yn billey cheddin tra v’eh er cheau ’syn ushtey, haink yn ushtey dy ve millish: shen y raad ren eh daue slattys as oardagh, as ayns shen phrow eh ad. 26As dooyrt eh, My nee oo geaishtagh dy tastagh rish coraa yn Chiarn dty Yee, as jannoo shen ny ta kiart ayns e hilley, as my ver oo geill da ny saraghyn echey, dy reaylley ooilley e lattyssyn; cha der-ym veg jeh ny doghanyn shen ort’s hug mee er ny Egyptianee: son mish y Chiarn ta cur dhyt dty lhaynt.

27As haink ad gys Elim, raad va daa chibbyr yeig ushtey, as three-feed as jeih dy viljyn-palm: as ren ad campal ayns shen liorish ny ushtaghyn.