CAB. XVI

1As ghow ad nyn yurnah veih Elim, as haink ooilley pobble Israel gys faasagh Sin, ta eddyr Elim as Sinai, er y wheiggoo laa yeig, jeh’n nah vee, neayr’s haink ad ass cheer Egypt. 2As ren slane chaglym-cooidjagh chloan Israel loayrt dy jymmoosagh noi Moses as Aaron ayns yn aasagh. 3As dooyrt cloan Israel roo, Dy baillish Jee, dy beagh shin er gheddyn baase liorish laue yn Chiarn ayns cheer Egypt, raad hoie shin liorish ny pooiyt-feill, as raad va nyn saie arran ain dy ee: son ta shiu er chur lhieu shin stiagh ’syn aasagh shoh, dy chur naardey yn slane cheshaght shoh lesh accryssyd.

4Er shoh dooyrt y Chiarn rish Moses, Cur-my-ner, deayrt-yms neose arran veih niau er nyn son; as hed y pobble magh, as nee ad chaglym wheesh shen dy chooilley laa, dy voddym ad y phrowal, jean ad gimmeeaght ayns my leigh, mannagh jean. 5As hig eh gy-kione, dy jean ad er y cheyoo laa gaarlaghey shen ver ad lhieu stiagh; as bee eh ghaa wheesh as t’ad dy haglym gour y laa. 6As dooyrt Moses as Aaron rish ooilley cloan Israel, Ec yn astyr, yiow shiu eisht fys, dy vel y Chiarn er chur lesh shiuish magh ass cheer Egypt. 7As ’sy voghrey, eisht nee shiu fakin gloyr y Chiarn; son dy vel eh clashtyn y plaiynt eu noi’n Chiarn; as cre ta shinyn dy vel shiu girree magh nyn ’oï? 8As dooyrt Moses, Shoh myr vees eh, tra ver y Chiarn diuish ec yn astyr feill dy ee, as ayns y voghrey nyn saie arran; son dy vel y Chiarn clashtyn y plaiynt ta shiu jannoo n’oï? as cre ta shinyn? cha nee noi ainyn ta’n plaiynt eu; agh noi’n Chiarn.

9As loayr Moses rish Aaron, Abbyr rish slane sheshaght chloan Israel, Tar-jee kiongoyrt rish y Chiarn, son t’eh er chlashtyn y plaiynt eu. 10As haink eh gy-kione, myr va Aaron loayrt rish ooilley co-chruinnaght chloan Israel, dy yeeagh ad lesh yn aasagh, as cur-my-ner, dy ren gloyr y Chiarn soilshean ’sy vodjal.

11As loayr y Chiarn rish Moses, gra, 12Ta mee er chlashtyn trughanys chloan Israel: loayr roo, gra, Fastyr yiow shiu feill dy ee, as ’sy voghrey yiow shiu nyn saie arran: as bee fys eu, dy nee mish y Chiarn y Jee eu. 13As haink eh gy-kione, dy daink ny quaylyn ’syn astyr, as choodee ad y champ: as ’sy voghrey va’n druight ny lhie ooilley mygeayrt y champ. 14As tra va’n druight er droggal, cur-my-ner, er eaghtyr yn aasagh va grine beg runt, myn myr y lieh-rio, er y thalloo. 15As tra honnick cloan Israel eh, dooyrt ad ry-cheilley, Manna? [cre shoh?] son cha row fys oc cre ve. As dooyrt Moses roo, Shoh’n arran ta’n Chiarn er choyrt diuish dy ee. 16Shoh’n red ta’n Chiarn er harey, lhig da dy chooilley ghooinney chaglym eh rere myr ee-ys eh: omer da dy chooilley ghooinney, cordail rish nyn earroo; lhig da dagh dooinney goaill cordail rish y vooinjer ta ayns e chabbane. 17As ren cloan Israel shen, as haggil paart ny smoo, as paart ny sloo. 18As tra howse ad eh lesh omer, cha row veg harrish echeysyn ren mooarane y haglym, as ersyn haggil cooid y veggan, cha row dolley: ren dy chooilley ghooinney chaglym rere feme e hie. 19As dooyrt Moses, Ny lhig da fooilliagh ve ec dooinney erbee derrey’n voghrey. 20Ny-yeih cha dug ad geill da Moses: agh hasht paart jeu fooilliagh jeh derrey’n voghrey, ren croo, as ve breinn: as va Moses corree roo. 21As ren ad eh y haglym dy chooilley voghrey, dagh dooinney cordail rish e vaarail; as lesh chiass ny greiney, ren eh lheïe.

22As haink eh gy-kione, dy heigh ad er y cheyoo laa ghaa wheesh dy arran, daa omer son dooinney: as haink ooilley ard-gheiney’n pobble, as dinsh ad shoh da Moses. 23As dooyrt eh roo, Shoh ny dooyrt y Chiarn; Mairagh feailley’n doonaght casherick gys y Chiarn: fuin-jee shen ta shiu ry-hoi fuinney jiu, as broie-jee shen ta shiu ry-hoi broie: as my vees fooilliagh erbee eu, tasht-jee eh derrey’n voghrey. 24As hasht ad eh derrey’n voghrey, myr doardee Moses; as cha ren eh breinaghey, chamoo va crooag ayn. 25As dooyrt Moses roo, Ee-jee shoh jiu; son shoh laa doonee yn Chiarn: jiu cha vow shiu eh ’sy vagher. 26Rish shey laa nee shiu chaglym eh, agh er y chiaghtoo laa ta’n doonaght, cha bee veg jeh ry-gheddyn.

27As haink eh gy-kione dy jagh shiartanse jeh’n pobble magh er y chiaghtoo laa dy haglym, as cha dooar ad veg. 28As dooyrt y Chiarn rish Moses, Caïd obbys shiu biallys da my haraghyn, as my leighyn? 29Gow-jee tastey, son dy vel y Chiarn er choyrt diu yn doonaght, t’eh er-y-fa shen coyrt diu er y cheyoo laa arran daa laa: fuirree-jee dy chooilley ghooinney sthie, ny lhig da fer erbee goll magh er y chiaghtoo laa. 30Myr shen ghow’n pobble fea er y chiaghtoo laa. 31As ren cloan Israel genmys eh Manna: as ve goll-rish rass coriander, gial; as va’n blass echey jeh berreen jeant lesh mill. 32As dooyrt Moses, Shoh’n red ta’n Chiarn dy harey, lhieen-jee omer jeh, dy ve tashtit son ny sheelogheyn eu; dy vod adsyn fakin yn arran lesh ren mee shiu y veaghey ’syn aasagh, tra hug mee lhiam shiu magh ass cheer Egypt. 33As dooyrt Moses rish Aaron, Gow saagh, as cur lane omer dy vanna ayn, as tasht-jee eh seose kiongoyrt rish y Chiarn, dy ve freilt son ny sheelogheyn eu. 34Myr doardee yn Chiarn da Moses, myr shen hug Aaron seose eh kiongoyrt rish arg yn eanish, dy ve freilt. 35As d’ee cloan Israel manna rish da-eed bleïn, derrey haink ad gys cheer va cummaltee ayn; d’ee ad manna, derrey haink ad gys slystyn cheer Chanaan. 36Nish ta omer yn jeihoo ayrn jeh Ephah.