CAB. XVII

1As ren ooilley co-chruinnaght chloan Israel goaill nyn yurnah, veih faasagh Sin, lurg ny jurnaaghyn oc, cordail rish oardagh yn Chiarn, as hoie ad nyn gabbaneyn ayns Rephidim: as cha row ushtey ec y pobble dy iu. 2As ren y pobble troiddey rish Moses, as dooyrt ad, Cur dooin ushtey dy iu. As dooyrt Moses roo, Cre’n-fa ta shiu troiddey rhym’s? cre’n-fa ta shiu brasnaghey’n Chiarn. 3As va’n pobble miandagh son ushtey ayns shen; as loayr y pobble dy gyere noi Moses, as dooyrt ad, Cre’n-fa t’ou er choyrt lhiat shin ass Egypt; dy varroo shin hene as nyn gloan, as nyn maase lesh paays? 4As deïe Moses gys y Chiarn, gra, Cre nee’m rish y pobble shoh? t’ad faggys aarloo dy m’y chlaghey. 5As dooyrt y Chiarn rish Moses, Immee er dty hoshiaght roish y pobble, as gow mayrt shanstyr Israel: as gow ayns dty laue yn lorg, lesh woaill oo yn awin, as immee. 6Cur-my-ner, shass-yms kiongoyrt rhyt ayns shen, er y chreg ayns Horeb: as nee uss bwoalley’n chreg, as hig ushtey magh ass, dy vod y pobble giu. As ren Moses shen ayns shilley shanstyr Israel. 7As denmys eh yn ynnyd, Massah as Meribah, er coontey anvea chloan Israel, as son dy ren ad brasnaghey’n Chiarn, gra, Vel y Chiarn ny mast’ ain, mannagh vel?

8Eisht haink Amalek, as ren ad caggey noi Israel ayns Rephidim. 9As dooyrt Moses rish Joshua, Reih dooin magh deiney, as immee magh, dy chaggey rish Amalek: mairagh, shass-ym er mullagh y chronk lesh lorg Yee my laue. 10Myr shen ren Joshua, myr dooyrt Moses rish, as ren eh caggey rish Amalek: as hie Moses, Aaron, as Hur, seose er mullagh y chronk. 11As haink eh gy-kione, choud as chum Moses seose e laue (ayns padjer) dy ren Israel cosney: as tra lhig eh sheese e laue, dy ren Amalek cosney. 12Agh va laueyn Voses trome; as ghow ad clagh, as hug ad fo eh; as hoie eh er: as chum Aaron as Hur ny laueyn echey seose, fer er dagh cheu: as va e laueyn cummit seose dy shickyr, derrey lhie ny greiney. 13As hooar Joshua yn varriaght er Amalek, as er e gheiney, lesh foyr yn chliwe. 14As dooyrt y Chiarn rish Moses, Scrieu shoh son imraa ayns lioar, as lhig da ve er ny lhaih ayns clashtyn Yoshua; son neem’s dy bollagh stroie ashoon Amalek fo niau. 15As hrog Moses altar, as denmys eh eh Jehovah-nissi. 16Son dooyrt eh, Er-yn-oyr dy vel y Chiarn er vreearrey; dy bee caggey ec y Chiarn rish Amalek veih sheeloghe gys sheeloghe.