CAB. XVIII

1As tra cheayll Jethro saggyrt Vidian, ayr-’sy-leigh Voses, jeh ooilley ny ren Jee son Moses, as son Israel e phobble, as dy row’n Chiarn er chur lesh Israel magh ass Egypt: 2Dy ghow Jethro, ayr-’sy-leigh Voses, Zipporah ben Voses, erreish da v’er choyrt ee thie, 3As e daa vac; va ennym y derrey yeh Gershom [son dooyrt eh, Ta mee er ve my yoarree ayns cheer joarree:] 4As va ennym y jeh elley Eliezer (son va Jee m’ayrey, dooyrt eh, my endeilagh, as livrey eh mee veih cliwe Pharaoh,) 5As haink Jethro ayr ’sy leigh Voses, lesh e vec as e ven gys Moses, ayns yn aasagh, raad v’eh campal, liorish cronk Yee. 6As hug eh fys gys Moses, Ta mish Jethro dty ayr-’sy-leigh er jeet hood’s, lesh dty ven, as e daa vac mâree.

7As hie Moses magh quail e ayr-’sy-leigh, as ren eh biallys da, as phaag eh eh: as vrie ad mychione slaynt y cheilley: as hie ad stiagh ’sy chabbane. 8As dinsh Moses da e ayr-’sy-leigh ooilley ny ren y Chiarn rish Pharaoh, as rish ny Egyptianee, er graih Israel, as ooilley’n tooilleil haink orroo er y raad, as kys va’n Chiarn er livrey ad. 9As va boggey er Jethro, son ooilley’n chenjallys va’n Chiarn er hoilshaghey da Israel: v’eh er hauail veih laue ny Egyptianee. 10As dooyrt Jethro, Bannit dy row’n Chiarn, ta er livrey shiu ass laue ny Egyptianee, as veih laue Pharaoh: t’er hauail y pobble veih laue ny Egyptianee. 11Nish, ta fys aym, dy vel y Chiarn foddey erskyn dy chooilley Yee: son lesh ooilley nyn mooaralys v’eshyn er-nyn-skyn. 12As ghow Jethro, ayr-’sy-leigh Voses, oural-losht as chebballyn da Jee: as haink Aaron, as ooilley shanstyr Israel, dy ghoaill ayrn ’syn oural, marish ayr-’sy-leigh Voses, fenish Yee.

13As haink eh gy-kione er laa-ny-vairagh, dy hoie Moses dy choyrt briwnys da’n pobble: as hass y pobble fenish Voses veih moghrey gy fastyr. 14As tra honnick ayr-’sy-leigh Voses ooilley ny ren eh rish y pobble, dy dooyrt eh, Cre shoh t’ou dy yannoo rish y pobble? cre’n-fa dy vel oo soie dty-lomarcan, as y pobble ooilley nyn shassoo liort, veih’n voghrey gys yn astyr? 15As dooyrt Moses rish e ayr-’sy-leigh, Son dy vel y pobble cheet hym’s, dy vriaght veih Jee. 16Tra ta cooish oc, t’ad cheet hym’s; as ta mee briwnys eddyr ad; as ta mee soilshaghey daue slattyssyn as leighyn Yee. 17As dooyrt ayr-’sy-leigh Voses rish; Cha vel yn aght shoh t’ou dy ghoaill mie er dty hon. 18Nee oo son shickyrys, goll naardey chammah oo hene as y pobble ta mayrt: son ta’n errey shoh ro hrome er dty hon; te rouyr dhyt’s dty-lomarcan dy ymmyrkey. 19Eaisht nish rish my choraa, ver-yms coyrle dhyt; as bee Jee mayrt: bee uss eddyr Jee as y pobble, dy choyrt lhiat ny cooishyn oc gys Jee. 20As inshee oo daue oardaghyn as leighyn, as nee oo jeeaghyn daue yn raad lhisagh ad y ghoaill, as yn obbyr t’orroo dy yannoo. 21Myrgeddin jeeagh magh mastey ooilley’n pobble son deiney fondagh, ta goaill aggle roish Jee, deiney ynrick, dwoaiagh er saynt; nyn lheid oc shoh nee oo soiaghey harrystoo, dy ve son fir-reill er thousaneyn, as fir-reill er keeadyn, fir-reill er lieh-cheeadyn, as fir-reill er jeihghyn. 22As lhig dauesyn briwnys y pobble ec dy chooilley hraa; as shoh myr vees eh, dy chooilley chooish doillee ver ad lhieu hood’s, as ny cooishyn sloo nee ad hene y vriwnys: myr shoh bee eh ny sassey dhyt hene, as nee adsyn yn errey y ymmyrkey mayrt. 23My nee oo myr shoh, as Jee dy dty harey myr shen, eisht bee oo abyl dy chummal rish, as hed ooilley’n pobble shoh gys nyn ynnyd hene ayns shee. 24Myr shen ghow Moses coyrle e ayr-’sy-leigh, as ren eh er e raa. 25As ren Moses deiney fondagh y reih trooid ooilley Israel, as ren eh ad king harrish y pobble, fir-reill er thousaneyn, fir-reill er keeadyn, fir-reill er lieh-cheeadyn, as fir-reill er jeihghyn. 26As ren ad y pobble y vriwnys ec dy chooilley earish; ny cooishyn creoi hug ad fenish Voses, agh dy chooilley chooish sloo ren ad hene y reaghey. 27As hie ayr-’sy-leigh Voses roish, as jimmee eh gys e heer hene.