CAB. XIX

1Ayns y trass vee, lurg da cloan Israel v’er n’gholl magh veih cheer Egypt, er y chied laa jeh’n vee, haink ad gys faasagh Sinai. 2Son v’ad er hroggal veih Rephidim, as er jeet gys faasagh Sinai, as er hoiaghey nyn gabbaneyn ’syn aasagh: as shen y raad ren Israel campal roish y clieau. 3As hie Moses seose gys Jee, son va’n Chiarn er n’eamagh huggey veih’n clieau, gra, Shoh myr nee oo loayrt rish thie Yacob, as ginsh da cloan Israel; 4Ta shiu er vakin ny ren mee rish ny Egyptianee, as kys dymmyrk mee shiu myr er skianyn urley, as hug mee lhiam shiu er-gerrey dou hene. 5Shen-y-fa nish, my ver shiu dy jarroo biallys da my choraa, as freayll my chonaant, bee shiu eisht pobble my chree hene, erskyn dy chooilley phobble; son lhiam’s ooilley’n seihll. 6As bee shiu dooys myr reeriaght dy haggyrtyn, as ny ashoon casherick. Shoh ny goan nee oo loayrt rish cloan Israel.

7As haink Moses, as ren eh sumney shanstyr y phobble, as hoilshee eh daue ooilley ny goan shoh, va’n Chiarn er harey da. 8As dreggyr y pobble ooilley lesh un choraa, as dooyrt ad, Ooilley ny ta’n Chiarn er harey nee mayd. As hug Moses stiagh ansoor y pobble gys y Chiarn. 9As dooyrt y Chiarn rish Moses, Cur-my-ner, ta mee cheet hood’s ayns bodjal dorraghey, dy vod y pobble clashtyn, tra ta mee loayrt rhyt, as credjal oo dy kinjagh; As livrey Moses goan y pobble da’n Chiarn.

10As dooyrt y Chiarn rish Moses, Immee gys y pobble, as jean ad y chasherickey jiu as mairagh, as lhig daue niee nyn eaddagh: 11As ve aarloo son y trass laa: son er y trass laa, hig y Chiarn neose ayns shilley ooilley’n pobble er slieau Sinai. 12As nee oo soiaghey cagliagh roish y pobble ooilley mygeayrt, gra, Jeeagh-jee diu hene nagh jed shiu seose er y clieau, ny cheet faare yn oirr echey: quoi-erbee vennys rish y clieau bee eh son shickyrys er ny choyrt gy-baase. 13Cha benn laue rish nagh bee eh dy jarroo er ny chlaghey, ny er ny varroo lesh side: lhig da ve baagh ny peccagh cha jig e vioys lesh. Tra vees y trumpet er ny heidey son tammylt mie, hig ad gys y clieau.

14As hie Moses sheese jeh’n chronk gys y pobble, as ren eh casherickey’n pobble, as niee ad nyn eaddagh. 15As dooyrt eh rish y pobble, bee-jee aarloo ry-hoi yn trass laa: ny tar-jee coair nyn mraane. 16As haink eh gy-kione, er moghrey yn trass laa, dy row taarneeyn as tendreilyn, as bodjal dorraghey er y chronk, as feiyr y trumpet yindyssagh ard, myr shen dy row ooilley’n pobble v’ayns y champ er-creau. 17As hug Moses lesh y pobble ass y champ dy gholl quail Jee, as hass ad er cheu-heese jeh’n clieau. 18As va cronk Sinai ooilley fo yaagh, son dy daink y Chiarn neose er ayns aile: as hie yn jaagh echey seose, myr jaagh coirrey, as va craa-hallooin mooar ayns ooilley’n clieau. 19As tra va sheean y trumpet foddey feiyral, as tra daase eh ny syrjey as ny syrjey, loayr Moses, as dreggyr Jee eh ayns coraa. 20As haink y Chiarn neose er slieau Sinai, er mullagh y clieau; as deïe’n Chiarn er Moses seose gys mullagh y chronk, as hie Moses seose. 21As dooyrt y Chiarn rish Moses, Immee sheese, cur currym er y pobble, nagh brish ad stiagh er y Chiarn dy ghoaill yindys, as dy jean mooarane jeu cherraghtyn. 22As lhig da ny saggyrtyn myrgeddin, ta tayrn er-gerrey da’n Chiarn, ad hene y chasherickey, er-aggle dy jean y Chiarn brishey magh orroo. 23As dooyrt Moses rish y Chiarn, Cha vod y pobble cheet seose er slieau Sinai: son hug oo currym orrin, gra, Tayrn cagliagh mysh y chronk, as jean eh y chasherickey. 24As dooyrt y Chiarn rish, Immee royd, gow sheese, as hig oo hene, as Aaron seose mayrt: agh ny lhig da ny saggyrtyn as y pobble brishey trooid, dy heet seose gys y Chiarn, er-aggle dy brish eshyn magh orroosyn. 25Myr shen hie Moses sheese gys y pobble, as loayr eh roo.