CAB. II

1As hie dooinney jeh thie Levi, as ghow eh son ben inneen Levi. 2As ren y ven gientyn, as hug ee mac son y theihll: as tra honnick ee dy row eh ny lhiannoo aalin, ren ee keiltyn eh three meeaghyn. 3As tra nagh dod ee keiltyn eh ny sodjey, ren ee da clean dy hioonyn, as slaa ee eh lesh cray as pick-hallooin, as hug ee yn lhiannoo ayn; as daag ee eh ’sy chlioagagh rish broogh ny hawin. 4As hass e huyr tammylt jeh, dy yeeaghyn cre’n erree harragh er.

5As haink inneen Pharaoh sheese dy aarkey ee hene ’syn awin, as ren ny mraane aegey va shirveish urree, shooyl er broogh ny hawin: as tra honnick ee yn clean fud y chlioagagh, hug ee e sharvaant er y hon. 6As tra v’ee er vosley eh; honnick ee yn lhiannoo: as cur-my-ner, va’n oikan keayney. As va chymmey eck er, as dooyrt ee, Shoh fer jeh cloan ny Hebrewnee. 7Er shoh dooyrt e huyr rish inneen Pharaoh, Nailt’s mish goll dy gheddyn dhyt boandyr jeh mraane ny Hebrewnee, dy vod ee yn lhiannoo y voandyrys er dty hon? 8As dooyrt inneen Pharaoh r’ee, Immee. As jimmee’n ven aeg, as hug ee lh’ee moir y lhiannoo. 9As dooyrt inneen Pharaoh r’ee, Gow’n lhiannoo shoh mayrt, as jean eh y voandyrys er my hon’s; as ver-yms faill dhyt. As ghow’n ven y lhiannoo, as ren ee eh y voandyrys. 10As daase y lhiannoo, as hug ee lh’ee eh gys inneen Pharaoh, as hrog ee eh myr e mac hene. As denmys ee eh Moses: as dooyrt ee, Son dy hayrn mee eh ass yn ushtey.

11As haink eh gy-kione, ayns ny laghyn shen, tra va Moses er jeet gys aase dooinney; dy jagh eh dy yeeaghyn e vraaraghyn, as hug eh tastey da ny erraghyn oc; as honnick eh Egyptian bwoalley Hebrewnagh, fer jeh e vraaraghyn. 12As yeeagh eh mygeayrt-y-mysh, er dy chooilley heu as tra honnick eh, nagh row fer erbee kionfenish, varr eh yn Egyptian, as doanluck eh eh ’sy ghenniagh. 13As tra hie eh magh yn laa er-giyn, cur-my-ner va daa ghooinney jeh ny Hebrewnee streeu ry-cheilley: as dooyrt eh rishyn v’ayns yn oill, Cre’n-fa t’ou bwoalley dty heshey? 14As dooyrt eshyn, Quoi ren uss dty phrince as dty vriw harrin? vel oo kiarail dy my varroo, myr varr oo yn Egyptian? As ghow Moses aggle; as dooyrt eh, Ta’n red shoh son shickyrys er jeet gys soilshey. 15Nish tra cheayll Pharaoh jeh shoh, chiare eh dy chur Moses dy baase. Agh hie Moses er-chea veih fenish Pharaoh, as chum eh ayns cheer Vidian: as hoie eh sheese rish chibbyr. 16Nish va shiaght inneenyn ec saggyrt Vidian; as haink ad, as hayrn ad ushtey; as lhieen ad ny siyn, dy ushtaghey shioltane nyn ayrey. 17As haink bochillyn as deiyr ad ersooyl ad; agh hass Moses seose nyn ’oï, as chooin eh lhieu, as hug eh ushtey da ny shioltaneyn. 18As tra haink ad gys Reuel nyn ayr, dooyrt eh, Kys te dy vel shiu er jeet cha leah jiu? 19As dooyrt ad, Ren Egyptian shin y livrey ass laueyn ny bochillyn; as ren eh myrgeddin ushtey dy liooar y hayrn dooin, as hug eh ushtey da’n chioltane. 20As dooyrt eshyn rish ny inneenyn echey, As cre’n raad t’eh? kys te dy daag shiu yn dooinney? eïe-jee er stiagh dy vod eh goaill arran. 21As va Moses booiagh dy chummal marish y dooinney: as hug eh Zipporah e inneen da Moses son ben. 22As va mac eck rish, as denmys eh eh Gershom: son dooyrt eh, Ta mee er ve my yoarree, ayns cheer yoarree.

23As haink eh gy-kione lurg traa, dy dooar ree Egypt baase, as ren cloan Israel osnaghey dy trome kyndagh rish y vondiaght, as ren ad geam; as hie’n eam oc seose gys Jee, kyndagh rish y vondiaght. 24As cheayll Jee nyn osnaghyn, as chooinee Jee er e chonaant rish Abraham, rish Isaac, as rish Jacob. 25As yeeagh Jee er cloan Israel, as va chymmey ec Jee orroo.