CAB. XX

1As loayr Jee ooilley ny goan shoh, gra, 2Mish y Chiarn dty Yee, hug lhiam uss magh ass thalloo Egypt, ass thie ny bondiaght. 3Cha bee Jee erbee elley ayd’s, agh mish. 4Cha jean oo dhyt hene jalloo granit erbee, ny co-chaslys jeh nhee erbee dy vel ayns niau heose, ny er y thalloo wass, ny t’ayns yn ushtey fo’n thalloo. 5Cha jean oo croymmey oo hene sheese huc, ny ooashley ’chur daue: son ta mish y Chiarn dty Yee my Yee eadolagh, kerraghey peccaghyn ny ayraghyn er y chloan gys y trass as y chiarroo heeloghe jeusyn ta dwoaie oc orrym; 6As soilshaghey myghin er thousaneyn jeusyn ta graihagh orrym, as freaylley m’annaghyn. 7Cha gow ennym y Chiarn dty Yee ayns fardail; son cha gum y Chiarn eshyn gyn loght ta goaill e ennym ayns fardail. 8Cooinee er y doonaght, dy reayll eh dy casherick. 9Shey laa nee oo laboragh, as jannoo ooilley dty obbyr: 10Agh y chiaghtoo laa doonaght y Chiarn dty Yee: Er cha jean oo obbyr erbee, uss, ny dty vac, ny dty inneen, dt’er-mooinjerey, ny dt’inney-veyl, ny dt’ollagh, ny dty yoarree t’er cheu-sthie jeh dty yiattyn: 11Son ayns shey laa chroo yn Chiarn niau as thalloo, yn faarkey, as ooilley ny t’ayndoo, as scuirr eh er y chiaghtoo laa: shen-y-fa vannee yn Chiarn y chiaghtoo laa, as ren eh eh y chasherickey.

12Cur arrym da dt’ayr as da dty voir: dy vod dty laghyn ve beayn er y thalloo, ta’n Chiarn dty Yee dy chur dhyt. 13Cha jean oo dunverys. 14Cha brish oo poosey. 15Cha jean oo geid. 16Cha n’ymmyrk oo feanish foalsey noi dty naboo. 17Cha der oo saynt da thie dty naboo, cha der oo saynt da ben dty naboo, ny da e harvaant, ny da e inney-veyl, ny da e ghow, ny da e assyl, ny da nhee erbee ta lesh dty naboo.

18As honnick ooilley’n pobble ny taarneeyn, as ny tendreilyn, as sheean y trumpet, as y slieau fo yaagh; as tra honnick y pobble shoh, scugh ad, as hass ad ny sodjey jeh. 19As dooyrt ad rish Moses, Loayr uss rooinyn, as ver mayd clashtyn: agh ny lhig da Jee loayrt rooin, nagh vow mayd baase. 20As dooyrt Moses rish y pobble, Ny bee aggle erriu: son ta Jee er heet dy phrowal shiu, as dy vod yn aggle echey ve roish nyn sooillyn, nagh jean shiu peccah. 21As hass y pobble foddey jeh, as hayrn Moses er-gerrey da’n dorraghys choo, raad va Jee.

22As dooyrt y Chiarn rish Moses, Myr shoh jir oo rish cloan Israel; ta shiu er vakin dy loayr mee riu veih niau. 23Cha jean shiu diu hene mârym’s jeeghyn argid, chamoo nee shiu diu hene jeeghyn airhey.

24Altar coirrey nee oo dooys, as er nee oo chebbal dty ourallyn-losht, as dty ourallyn-shee, dty chirree, as dty ghew; ayns dy chooilley ynnyd raad ta m’ennym er ny ooashlaghey, bee’m mayrt, as nee’m dty vannaghey. 25As my nee oo altar chloaie dooys, cha jean oo eh lesh claghyn cummit; son my hroggys oo greïe erbee er, t’ou er n’yannoo eh an-chasherick. 26Chamoo hed oo seose gys m’altar’s er greeishyn, nagh bee dty nearey er ny akin er.