CAB. XXII

1My gheiddys dooinney dow, ny keyrrey, as marroo, ny creck eh; nee eh lhiasaghey lesh queig dew son dow, as lesh kiare kirree son keyrrey.

2My vees maarliagh goit brishey stiagh ayns thie, as eh dy gheddyn builley baaish, cha bee fuill deayrtit er e hon. 3My vees y ghrian er n’irree er, bee fuill deayrtit er e hon, son v’eh kianlt dy yannoo slane lhiasaghey; mannagh bee cooid echey, bee eh eisht er ny chreck son e vaarleeys. 4My ta’n ghriu dy jarroo er ny gheddyn bio ’sy laue, my she dow, assyl, ny keyrrey t’ayn; eeckee eh dooble er y hon.

5My ver dooinney e vaagh ayns magher ny gharey-feeyney ghooinney elley, dy phastyral ayn: jeh’n chooid share jeh e vagher hene, as jeh’n chooid share jeh e gharey-feeyney hene, nee eh lhiasaghey.

6My nee aile brishey magh, as goaill ny drineyn, myr shen dy vel ny creaghyn, ny ny magheryn arroo er nyn stroie liorish; nee eshyn ren yn aile y oaddey, son shickyrys, jannoo lhiasaghey.

7My ver dooinney argid ny cooid da e naboo dy hashtey, as my vees eh er ny gheid ass thie’n dooinney; my vees y maarliagh goit, lhig da geeck dooble. 8Mannagh jig briaght er y vaarliagh, eisht bee dooinney’n thie er ny choyrt lesh fenish ny briwnyn, dy vriaght vel eh er choyrt e laue ayns cooid e naboo. 9Son dy chooilley vonney dy hrespass, lhig da ve son dow, son assyl, son keyrrey, son coamrey, ny son cooid chailjey erbee, ta fer elley dy hassoo huggey son e chooid hene; hig y chooish oc nyn-neesht fenish ny briwnyn; as nee eshyn, ver ny briwnyn yn chooish n’oï, lhiasaghey dooble da e naboo. 10My ver dooinney da e naboo assyl, ny dow, ny keyrrey, ny baagh erbee, er farvaalys; my yiow eh baase, ny my hig assee erbee er, ny my vees eh eiyrit ersooyl, gyn-yss; 11Eisht bee loo fenish y Chiarn eddyr ad ny-neesht, nagh dug eh laue er cooid e naboo: shegin da’n oaner ve booiagh lesh shoh, as cha vow eh arragh dy lhiasaghey. 12As my vees eh caillit [trooid lhag-chiarail,] shegin da eisht lhiasaghey y yannoo dasyn my-liesh eh. 13My vees eh raipit dy peeshyn; eisht lhig da cowrey jeh y yeeaghyn: as cha bee lhiasaghey er ny yannoo son shen ny va raipit.

14As my nee dooinney cooid erbee y eeasaght veih e naboo, as my hig assee er, ny my yiow eh baase, gyn y dooinney my-liesh eh ve kionfenish; nee eh, son shickyrys, jannoo mie eh. 15Agh my vees yn oaner kionfenish, cha jean eh mie eh: my she failt ve, haink eh son e aill.

16As my nee dooinney miolaghey moidyn nagh vel nasht, as my lhie-ys eh mâree; ver eh, son shickyrys, toghyr jee dy ve e ven hene. 17My ta’n ayr eck coyrt slane obbal da, eeckee eh argid, cordail rish toghyr moidynyn.

18Cha n’uillee oo buitch dy ve bio.

19Quoi-erbee lhie-ys marish baagh, bee eh, son shickyrys, er ny choyrt gy-baase.

20Quoi-erbee hebbys oural da jee erbee, agh da’n Chiarn ny-lomarcan, bee eh stroit gyn vyghin.

21Cha jean oo seaghney joarree, chamoo nee oo tranlaase er: son va shiu hene nyn yoarreeyn ayns cheer Egypt.

22Cha jean oo tranlaase er y ven-treoghe, ny er y lhiannoo gyn ayr.

23My nee oo er aght erbee tranlaase orroo, as ad dy ghaccan hym’s; ver-yms, son shickyrys, clashtyn da nyn eam; 24As ver-ym raad da my yymmoose, as stroie-ym shiu lesh y chliwe; as bee ny mraane eu treoghe, as nyn gloan gyn ayr.

25My ver oo argid er eeasaght da veg jeh my phobble, ta fo boghtynid mayrt, cha jig oo ro hionn er, chamoo hroggys oo thack jeh. 26My ghoys oo edyr coamrey dty naboo ayns gioal, ver oo da eh reesht roish lhie ny greiney. 27Son shen e ynrycan coodagh, coamrey e chorp eh: cre ayn chadlys eh? as hig eh gy-kione, tra nee eh plaiynt hym, dy der-yms clashtyn; son ta mee graysoil.

28Cha jean oo goltooaney ny briwnyn, ny guee mollaght da reiltagh dty phobble.

29Cha lhig oo shaghey dy hebbal yn chied-vess jeh dty arroo creen, as y chied-lhiggey jeh dty ghoagh-feeyney: yn er shinney jeh dty vec ver oo dooys. 30Nee oo er yn aght cheddin rish dty ghew, as rish dty chirree; rish shiaght laa bee eh er e voir, er yn hoghtoo laa ver oo dooys eh.

31As bee shiuish pobble casherick dooys: chamoo ee-ys shiu feill erbee ta raipit ec beishtyn ’sy vagher: ver shiu da ny moddee eh.