CAB. XXIII

1Cha jean oo troggal, ny cur mygeayrt, goo breagagh: ny cur dty laue marish ny mee-chrauee, dy ve feanish foalsey.

2Cha n’eiyr oo er yn ymmodee dy yannoo olk: chamoo nee oo loayrt ayns cooish, dy gholl marish yn ymmodee, dy chassey briwnys.

3Chamoo nee oo shassoo lesh y dooinney boght ayns cooish [aggairagh.]

4My hagh’rys oo er dow, ny assyl dty noid goll er-shaghryn: ver oo, son shickyrys, lhiat eh huggey reesht. 5My hee oo yn assyl echeysyn ta ayns noidys dhyt; ny lhie fo e laad, cha jed oo shaghey: nee oo, son shickyrys, cooney lesh. 6Cha jean oo cassey briwnys dty voght ayns e chooish. 7Freill oo hene foddey veih cooish aggairagh: as ny bee laue ayd ayns baase y dooinney ôney as cairagh: son cha jean-yms seyrey yn drogh-yantagh. 8Cha jean oo gioot y ghoaill, son ta’n gioot dolley sooillyn y tushtey, as cur gyn bree goan yn vooinjer ynrick.

9Myrgeddin cha jean oo tranlaase er y joarree, son ta ennaghtyn eu hene jeh cree yn joarree, fakin dy row shiu hene nyn yoarreeyn ayns cheer Egypt. 10As rish shey bleeaney nee oo cuirr dty halloo, as goaill stiagh ny messyn echey: 11Agh y chiaghtoo vleïn ver oo fea da, as lhiggee oo eh ve bane; dy vod boghtyn dty phobble beaghey: as y fooilliaght oc, nee maase y vagheragh gee. Er yn aght cheddin nee oo rish dty gharey-feeyney, as rish dty gharey-olive. 12Shey laa nee oo dty obbyr, as er y chiaghtoo laa gowee oo fea: dy vod dty ghow as dty assyl aash y ghoaill, as dy vod mac dty inney-veyl, as y joarree v’er nyn ooraghey. 13As cur-jee tastey mie da dy chooilley nhee ta mee er ghra riu: as ny jean-jee imraa jeh ennym jeeghyn joarree, chamoo lhig da ve er ny chlashtyn ass dty veeal.

14Three keayrtyn ’sy vleïn nee oo feailley y reayll dooys. 15Nee oo freayll feailley’n arran gyn soorit: nee oo gee arran gyn soorit shiaght laa, myr ren mee dty harey, er y traa pointit, ’sy vee Abib: son er haink oo magh ass Egypt; cha jig unnane my enish lesh laue follym. 16As feailley ny fouyr, yn chied-vess jeh dty laboraght, t’ou er chuirr ’sy vagher: as feailley yn chur-stiagh, ta jerrey ny bleeaney, tra t’ou er choyrt stiagh dty hroar ass y vagher. 17Three keayrtyn ’sy vleïn hig ooilley dty gheiney kiongoyrt rish y Chiarn Jee. 18Cha jeb oo fuill my oural-caisht lesh arran soorit; chamoo bee meeaylys my oural er-mayrn derrey’n voghrey. 19Toshiaght yn chied-vess jeh dty halloo ver oo lhiat stiagh gys thie’n Chiarn dty Yee. Cha jean oo mannan y vroie ayns bainney e vayrey.

20Cur-my-ner, ta mee cur ainle royd, dy dty choadey er y raad, as dy leeideil oo gys yn ynnyd ta mee er chiarail er dty hon. 21Cur geill da, as cur biallys da e choraa, ny jean eh y vrasnaghey; son cha leih eh nyn loghtyn: son ta m’ennym’s er. 22Agh my ver oo dy jarroo biallys da e ghoo, as jannoo er my raa, bee’m eisht my noid da dty noidyn’s, as bee’m noi adsyn ta dt’oï’s. 23Son hed m’ainle’s royd, as ver eh lesh oo stiagh gys cheer ny Amoriteyn, as ny Hittiteyn, as ny Perizziteyn, as ny Chanaaniteyn, as ny Hiviteyn, as ny Jebusiteyn; as nee’m ad y yiarey jeh. 24Cha jean oo croymmey sheese gys ny jeeghyn oc, ny shirveish ad, ny jannoo lurg nyn obbraghyn, agh nee oo stroie ad dy bollagh, as slane brishey ny jallooyn oc. 25As nee shiu shirveish y Chiarn y Jee eu, as ver eh bannaght er dty arran, as er dty ushtey, as neem’s aslayntyn y ghoaill veih nyn mast’ eu.

26Cha jean nhee erbee tilgey nyn ingan, ny ve gennish ayns dty heer: earroo dty laghyn neem’s y yannoo magh. 27As hed my aggle royd, as nee’m ooilley’n pobble y stroie nyn ’oï t’ou goll, as ver-yms er ooilley dty noidyn dy choyrt cooyl rhyt. 28As ver-yms ny peishteigyn-nieunagh royd, nee yn Hivite, yn Canaanite, as yn Hittite y eebyrt royd. 29Cha jean-ym ad y imman royd ’syn un vleïn; nagh bee’n cheer ny faasagh, as dy jean beishtyn y vagheragh bishaghey ort. 30Ny veggan as ny veggan neem’s ad y eebyrt magh royd, derrey vees oo er vishaghey, as er gheddyn cummal ’sy cheer. 31As neem’s soiaghey dty chagleeyn veih’n Faarkey Jiarg eer gys faarkey ny Philistinee, as veih faasagh [Arabia] gys awin [Euphrates;] son neem’s cummaltee yn cheer y livrey gys nyn laue, as nee’m ad y imman magh royd. 32Cha jean oo conaant erbee roosyn, ny rish ny jeeghyn oc. 33Cha lhig oo daue cummal ayns dty heer, er-aggle dy dayrn ad oo gys peccah m’oï: son my nee oo shirveish ny jeeghyn ocsyn, bee eh, son shickyrys, ribbeh dhyt.