CAB. XXIV

1As dooyrt y Chiarn rish Moses, Tar seose gys y Chiarn, uss, as Aaron, Nadab, as Abihu, as three-feed as jeih jeh shanstyr Israel: as jean-jee ooashlaghey foddey jeh. 2As hig Moses eh hene er-gerrey da’n Chiarn: agh cha jig adsyn er-gerrey, chamoo hig y pobble seose mâroo.

3As haink Moses, as dinsh eh da’n pobble ooilley goan y Chiarn, as ooilley ny briwnyssyn: as dreggyr ooilley’n pobble lesh un choraa, as dooyrt ad, Da ooilley ny goan, ta’n Chiarn er loayrt, ver mayd biallys. 4As scrieu Moses ooilley goan y Chiarn, as dirree eh leah ’sy voghrey, as hrog eh altar fo’n chronk as daa phillar jeig, cordail rish daa hribe jeig Israel. 5As hug eh magh deiney aegey jeh cloan Israel, ren chebbal ourallyn-losht, as dew son ourallyn-shee gys y Chiarn. 6As ghow Moses yn derrey lieh jeh’n uill, as hug eh eh ayns siyn; as spreih eh lieh jeh’n uill er yn altar. 7As ghow eh lioar y chonaant, as lhaih eh ayns clashtyn y pobble, as dooyrt ad, Nee mayd ooilley ny ta’n Chiarn er ghra, as bee mayd ammyssagh. 8As ghow Moses yn uill as spreih eh eh er y pobble, as dooyrt eh, Cur-jee my-ner, shoh fuill y chonaant, ta’n Chiarn er n’yannoo riuish, mychione ooilley ny goan shoh.

9Eisht hie Moses, as Aaron, as Nadab, as Abihu, as three-feed as jeih jeh shanstyr Israel seose. 10As honnick ad gloyr Yee Israel: as va fo e chassyn myr dy beagh eh obbyr-laare dy chlagh-sapphire, as sollys myr corp yn aer ayns e aalid. 11As er ard-gheiney chloan Israel cha lhie eh e laue: honnick ad gloyr Yee myrgeddin, as ren ad gee as giu.

12As dooyrt y Chiarn rish Moses, Tar seose hym’s er y chronk, as fuirree ayns shen; as ver-yms dhyt buird chloaie, as leigh, as annaghyn ta mee er scrieu; dhyt’s dy ynsaghey daue. 13As hrog Moses er, as e hirveishagh Joshua: as hie Moses seose er slieau Yee. 14As dooyrt eh rish y chanstyr, Fuirree-jee ayns shoh er nyn son, derrey hig mayd hiu reesht; as cur-my-ner, ta Aaron as Hur mêriu: my vees cooishyn ec dooinney erbee dy reaghey, lhig da goll hucsyn. 15As hie Moses seose er y clieau, as ren bodjal y slieau y choodaghey. 16As ren gloyr y Chiarn tannaghtyn er slieau Sinai, as choodee yn bodjal eh shey laa, as er y chiaghtoo laa deïe eh er Moses ass mean y vodjal. 17As va shilley gloyr y Chiarn myr aile mooar lossey er mullagh y clieau, ayns sooillyn chloan Israel. 18As hie Moses stiagh ayns mean y vodjal, as hie eh seose er y clieau: as va Moses er y clieau da-eed laa, as da-eed oie.