CAB. XXV

1As loayr y Chiarn rish Moses, gra, 2Loayr rish cloan Israel, dy der ad lhieu oural hym: veih dy chooilley ghooinney ta coyrt eh dy arryltagh lesh ooilley e chree, nee shiu my oural y ghoaill. 3As shoh’n oural nee shiu goaill voue; airh, argid, as prash, 4As gorrym, as purple, as scarleod, as aanrit keyl, as geaysh ghoair, 5As craitnyn reaghyn daahit jiarg, as craitnyn badjer, as fuygh-shittim, 6Ooil son soilshey, spiceyn ooiley, as son oural-millish. 7Claghyn-onyx, as claghyn dy ve soit ’syn ephod, as ’sy vreast-plate. 8As lhig daue ynnyd casherick y yannoo er my hon; dy vod my enish ve ny mast’ oc. 9Cordail rish ooilley ta mee dy yeeaghyn dhyt, cordail rish sampleyr y chabbane-agglish, as sampleyr ooilley ny jeshaghtyn echey, eer myr shen nee shiu eh.

10As nee ad arg dy fuygh-shittim: daa chubit dy lieh vees y lhiurid echey, as cubit dy lieh yn lheead echey, as cubit dy lieh yn yrjid echey. 11As nee oo eh y choodaghey lesh airh ghlen, cheu-sthie as cheu-mooie, coodee oo eh, as rimmey dy airh ver oo mygeayrt-y-mysh. 12As nee oo lheïe kiare loobyn airh er y hon, as ver oo ad ayns ny kiare corneilyn echey, as bee daa loob ayns y derrey heu, as daa loob ayns y cheu elley. 13As nee oo looghyn dy fuygh-shittim, as ad y choodaghey lesh airh. 14As ver oo ny looghyn ayns ny loobyn, rish lhiatteeyn yn arg, dy vod yn arg v’er ny ymmyrkey lhieu. 15Bee ny looghyn ayns loobyn yn arg: cha bee ad goit assdoo. 16As ver oo ayns yn arg recortys Yee ver-yms dhyt. 17As nee oo yn stoyl-myghin dy glen airh: daa chubit dy lieh vees y lhiurid echey, as cubit dy lieh yn lheead echey. 18As nee oo daa cherubim dy airh: lesh obbyr hammarit nee oo ad, dy ve er dagh kione jeh stoyl y vyghin. 19As jean un cherub er y derrey chione, as cherub er y chione elley; jeh’n un stoo rish stoyl y vyghin nee shiu ny cherubim er dagh kione jeh. 20As nee ny cherubim skeayley magh nyn skianyn dy ard, coodaghey stoyl y vyghin lesh nyn skianyn, as bee nyn eddin noi-ry-hoi: lesh stoyl y vyghin bee eddinyn ny cherubim. 21As ver oo seose stoyl y vyghin ayns yn arg; as ayns yn arg ver oo buird y leigh ver-yms dhyt. 22Shen y raad neem’s dty veeiteil, as loayr-ym rhyt veih erskyn stoyl y vyghin, as veih eddyr y daa cherubim ta er arg yn eanish, mychione dy chooilley nhee ver-yms er dty churrym da cloan Israel.

23Nee oo myrgeddin boayrd jeh fuygh-shittim; daa chubit vees y lhiurid echey, as cubit yn lheead, as cubit dy lieh yn yrjid echey. 24As nee oo coodaghey eh lesh glen airh, as nee oo rimmey dy airh er ooilley mygeayrt. 25As ver oo lheead-bass dy voarder mygeayrt-y-mysh, as nee oo rimmey airh er y voarder ooilley mygeayrt. 26As nee oo da kiare loobyn airh, as ver oo ny loobyn er ny kiare corneilyn ta er ny kiare cassyn echey. 27Kiart rish y voarder vees ny loobyn son ynnydyn ny looghyn dy hroggal y boayrd. 28As nee oo ny looghyn jeh fuygh-shittim, as nee oo ad y choodaghey lesh airh, cour troggal y boayrd lhieu. 29As ny claareeyn echey, as ny spainyn, as ny siyn ourallagh, as ny scaillaghyn echey, dy hoiaghey magh y boayrd lhieu: jeh glen airh nee oo ad. 30As nee oo dy kinjagh arran casherick y hoiaghey er y voayrd roym.

31As nee oo kainlere jeh glen airh: lesh obbyr hammarit vees y kainlere er ny yannoo; e chass, as e vanglaneyn, e lampyn, e chruint, as e vlaaghyn, bee ad jeh’n stoo cheddin. 32As hig shey banglaneyn magh veih ny lhiatteeyn echey; three banglaneyn jeh’n chainlere er y derrey lhiattee, as three banglaneyn jeh’n chainlere er y lhiattee elley. 33Three lampyn goll-rish almondyn, lesh cront as blaa er un vanglane; as three goll-rish almondyn lesh cront as blaa er y vanglane elley. Shoh myr vees eh ayns ny shey banglaneyn hig magh er y chainlere. 34As ayns y chainlere bee kiare lampyn jeant ayns cummey almondyn, lesh nyn gruint as nyn blaaghyn. 35As bee cront fo daa vanglane jeh, as cront fo daa vanglane jeh, as cront fo daa vanglane jeh, cordail rish ny shey banglaneyn ta cheet magh er y chainlere. 36Bee ny cruint as ny banglaneyn jeh’n un stoo: bee eh ooilley un obbyr hammarit dy airh ghlen. 37As nee oo ny shiaght lampyn echey: as nee ad foaddey ny lampyn, dy vod ad soilshey ’cheau kiongoyrt rish. 38As bee ny smalyderyn, as ny plaityn smalee jeh glen airh. 39Jeh talent dy glen airh nee eh shoh y yannoo, marish ooilley ny siyn shoh. 40As jeeagh dy jean oo ad, lurg y sampleyr va er ny yeeaghyn dhyt er y clieau.