CAB. XXVI

1Marish shoh, nee oo cabbane: lesh jeih curtanyn jeh aanrit keyl feeit, as gorrym, as purple, as scarleod; marish cherubim dy obbyr aalin nee oo ad. 2Bee lhiurid un churtan hoght cubityn as feed, as lheead y churtan kiare cubityn: as bee ooilley ny curtanyn jeh’n un towse. 3Bee queig jeh ny curtanyn loopit dy cheilley; as ny queig curtanyn elley loopit dy cheilley. 4As ver oo loobyn dy ghorrym er oirr yn un churtan, veih’n selvage gys y vullagh: as nee oo myrgeddin er yn oirr sodjey magh jeh’n churtan elley, dy vod ad tayrn dy cheilley. 5Jeih loobyn as da-eed ver oo ayns un churtan, as ver oo jeih loobyn as da-eed ayns oirr y churtan, raad t’ad tayrn dy cheilley; dy vod ny loobyn greimmey y cheilley. 6As nee oo jeih clespyn as da-eed dy airh; as nee oo coopley ny curtanyn lesh ny clespyn; as bee eh un chabbane.

7As nee oo curtanyn dy gheaysh ghoair son coodagh y chabbane: un churtan jeig nee oo. 8Bee lhiurid un churtan jeih cubityn as feed, as lheead un churtan kiare cubityn; as bee’n un churtan jeig ooilley jeh’n un towse. 9As ver oo queig curtanyn dy cheilley orroo hene, as shey curtanyn orroo hene, as nee oo doopley yn cheyoo churtan er dorrys yn chabbane. 10As ver oo jeih loobyn as da-eed er oirr y churtan sodjey magh, raad t’ad cheet dy cheilley, as jeih loobyn as da-eed rish oirr y churtan ta coopley yn nah churtan. 11As nee oo jeih clespyn as da-eed dy phrash, as ver oo ny clespyn ayns ny loobyn, dy chur y cabbane cooidjagh fo un choodagh. 12As y fooilliagh vees er-mayrn jeh curtanyn y chabbane, nee’n lieh churtan shoh croghey harrish cooyl y chabbane. 13As nee towse cubit er y derrey heu, as cubit er y cheu elley, jeh ny ta harrish ayns lhiurid curtanyn y chabbane, croghey sheese harrish lhiatteeyn y chabbane, er dagh cheu, dy choodaghey eh. 14As nee oo coodagh son y chabbane dy chraitnyn rea daahit jiarg, as coodagh-mullee dy chraitnyn badjer.

15As nee oo buird son y chabbane jeh fuygh-shittim soit seose jeeragh. 16Jeih cubityn vees lhiurid boayrd, as lheead boayrd cubit dy lieh. 17Bee daa hennalt ayns un voayrd, kiart ry-cheilley; shoh myr nee oo ooilley buird y chabbane. 18As nee oo ny buird son y chabbane, feed boayrd son y cheu jiass my-yiass. 19As nee oo da-eed mortis argid fo ny feed buird; daa vortis fo un voayrd son e ghaa hennalt, as daa vortis fo boayrd elley son e ghaa hennalt. 20As er son y cheu elley jeh’n chabbane, er y cheu twoaie, bee feed boayrd. 21As ny da-eed mortissyn oc dy argid: daa vortis fo un voayrd, as daa vortis fo boayrd elley. 22As son lhiattee heear y chabbane nee oo shey buird. 23As nee oo daa voayrd son corneilyn y chabbane er y daa lhiattee. 24As bee ad juntit cooidjagh veih heese dy heose ’syn un loob: myr shoh vees ad nyn-neesht jeant; bee ad son y daa chorneil. 25As bee ad hoght buird, as ny mortissyn argid oc shey-jeig; daa vortis fo un voayrd, as daa vortis fo un voayrd, as daa vortis fo boayrd elley.

26As nee oo barryn dy fuygh-shittim; queig son buird y derrey heu jeh’n chabbane, 27As queig barryn son buird y cheu elley jeh’n chabbane, as queig barryn son buird lhiattee y chabbane, son y daa heu lesh y sheear. 28As nee barr meanagh ny buird roshtyn veih kione dy kione. 29As nee oo coodaghey ny buird harrish lesh airh, as ny loobyn y yannoo dy airh dy ghoaill ny barryn: as nee oo ny barryn y choodaghey harrish lesh airh. 30As nee oo troggal y cabbane cordail rish y cummey va soit royd er y clieau.

31As nee oo curtan dy ghorrym, as purple, as scarleod, as aanrit keyl feeit dy obbyr aalin; lesh cherubim obbrit er. 32As nee oo croghey ad er kiare pillaryn dy fuygh-shittim layit harrish lesh airh; bee ny clespyn oc d’airh, er ny kiare mortissyn argid.

33As nee oo croghey seose y curtan fo ny clespyn, dy vod oo coyrt er cheu-sthie jeh’n churtan arg yn eanish: as bee’n curtan scarrey diu eddyr yn ynnyd casherick as yn ynnyd smoo casherick. 34As ver oo stoyl y vyghin er arg yn eanish ’syn ynnyd smoo casherick. 35As nee oo soiaghey’n boayrd cheu-mooie jeh’n churtan, as y kainlere jeeragh er y voayrd er y derrey heu jeh’n chabbane my-yiass; as ver oo yn boayrd er y cheu-twoaie. 36As nee oo curtan son dorrys y chabbane, dy ghorrym, as purple, as scarleod, as aanrit keyl feeit, obbrit lesh obbyr-snaidey. 37As nee oo son y churtan queig pillaryn dy fuygh-shittim, as ad y choodaghey lesh airh, as bee ny clespyn oc dy airh; as nee oo roie queig socketyn prash dy ghoaill ad.