CAB. XXVII

1As nee oo altar dy fuygh-shittim, queig cubityn er lhiurid, as queig cubityn er lheead: bee’n altar kiare square; as bee’n yrjid echey three cubityn. 2As ver oo ny kiare eairkyn echey er e chiare corneilyn; bee ny eairkyn echey jeh’n stoo cheddin: as nee oo coodaghey eh lesh prash. 3As nee oo pannaghyn dy ghoaill y leoie, as ny sleaystyn, as ny meilaghyn, as ny aalyn, as ny censeryn echey: nee oo ooilley ny siyn echey dy phrash; 4As nee oo grate dy phrash da, myr obbyr jeebinagh, as er y ghrate ver oo kiare loobyn prashey ayns ny kiare corneilyn echey. 5As ver oo sheese eh lieh’n raad ’syn altar, myr shen dy bee’n grate kiart ayns mean yn altar. 6As nee oo looghyn da’n altar, looghyn dy fuygh-shittim, as y choodaghey ad lesh prash. 7As bee ny looghyn currit ayns ny loobyn, as bee ny looghyn er dagh lhiattee yn altar dy hroggal eh. 8Foshlit er cheu-sthie nee oo eh lesh buird; myr ve currit royd er y clieau, shen myr nee oo eh.

9As nee oo cooyrt y chabbane son y cheu jiass, bee curtanyn y chooyrt dy aanrit keyl feeit, keead cubit er lhiurid son un lhiattee. 10As bee ny feed pillaryn echey, as ny feed mortissyn dy phrash: bee holteryn ny pillaryn, as ny rimmaghyn oc dy argid. 11As myrgeddin, son y cheu twoaie er lhiurid bee curtanyn jeh keead cubit ayns lhiurid: as ny feed pillaryn, as ny feed mortissyn dy phrash: as bee holteryn ny pillaryn, as ny rimmaghyn oc dy argid. 12As son I lheead y chooyrt, er y cheu heear, bee curtanyn jeh jeih cubityn as da-eed; ny pillaryn jeih as ny mortissyn jeih. 13As bee lheead y chooyrt, lesh y shiar, jeih cubityn as da-eed. 14Bee curtanyn y derrey heu jeh’n yiat queig cubityn jeig; bee ny pillaryn three, as ny mortissyn three. 15As er y cheu elley bee curtanyn, queig cubityn jeig; ny pillaryn three, as ny mortissyn oc three.

16As son giat ny cooyrtey bee curtan jeh feed cubit, dy ghorrym, as purple, as scarleod, as aanrit keyl cast, jeant lesh obbyr-snaidey: as bee ny pillaryn kiare, as nyn mortissyn kiare. 17As bee ooilley ny pillaryn mygeayrt y chooyrt rimmeigit lesh argid; bee ny holteryn dy argid, as ny mortissyn dy phrash. 18Bee lhiurid ny cooyrtey keead cubit, as y lheead echey jeih as da-eed dy chooilley raad, as yn yrjid queig cubityn dy aanrit keyl cast, as nyn mortissyn dy phrash. 19As ooilley siyn y chabbane son y slane shirveish echey, as ooilley ny pinnaghyn echey, as ooilley pinnaghyn ny cooyrtey bee ad dy phrash.

20As ver oo currym er cloan Israel, ad dy choyrt lhieu hood’s ooil glen olive sheelit, son soilshey, son y lamp dy choyrt soilshey kinjagh. 21Ayns y chabbane-agglish, cheu-mooie jeh’n churtan, ta kiongoyrt rish arg yn eanish, nee Aaron as e vec goardrail eh, veih fastyr dy moghrey, fenish y Chiarn; bee eh ny slattys kinjagh da ny sheelogheyn ocsyn, dy yannoo shoh ayns lieh chloan Israel.