CAB. XXVIII

1As gow mayrt Aaron dty vraar, as e vec, veih mastey cloan Israel, dy ve my hirveishee ayns oik y taggyrt, eer Aaron, Nadab, as Abihu, Eleazar, as Ithamar, mec Aaron. 2As nee oo garmadyn casherick son Aaron dty vraar, gloyroil as aalin. 3As nee oo loayrt roosyn ooilley ta obbreeyn schleioil, roosyn ta mee er lhieeney lesh y spyrryd dy hushtey, dy jean ad garmadyn da Aaron, dy chasherickey eh, dy vod eh jannoo shirveish dooys ’sy taggyrtys. 4As shoh ny garmadyn nee ad jannoo, breast-plate as ephod, as garmad liauyr, as cooat laatshit, as mitre, as cryss: as nee ad garmadyn casherick da Aaron dty vraar, as e vec, dy vod eh jannoo shirveish dooys ayns oik y taggyrt. 5As nee ad goaill airh, as gorrym, as purple, as scarleod, as sheeidey.

6As bee’n ephod jeant dy airh, dy ghorrym, as purple, as scarleod, as sheeidey, lesh obbyr schleioil. 7Bee’n daa pheesh gheaylin kianlt dy cheilley er y daa oirr; as myr shoh vees eh sniemmit cooidjagh. 8As bee cryss laatshagh yn ephod ta er, jeh’n un stoo as obbyr, dy airh, dy ghorrym, as purple, as scarleod, as sheeidey cast. 9As nee oo goaill daa chlagh onyx, as grainney orroo enmyn chloan Israel: 10Shey jeh nyn enmyn er y derrey chlagh, as ny shey enmyn elley er y chlagh elley, cordail rish nyn eash. 11Lesh obbyr y ghrainneyder chloaie, myr ta seal er ny yiarey, shoh myr nee oo giarey er y daa chlagh enmyn chloan Israel: nee oo ad y hoiaghey ayns socketyn dy airh. 12As ver oo’n daa chlagh er geayltyn yn ephod son cowrey dy chooinaghtyn da cloan Israel. As ver Aaron lesh nyn enmyn kionfenish y Chiarn er e gheayltyn, son imraa.

13As nee oo socketyn dy airh; 14As daa link dy glen airh ec ny corneilyn: jeh obbyr feeaghnagh nee oo ad: as nee oo kiangley ny linkyn feeit gys ny socketyn.

15As nee oo yn breast-plate dy vriwnys, lesh obbyr schleioil, jeh’n un obbyr rish yn ephod nee oo eh; jeh airh, jeh purple, as scarleod, as dy heeidey nee oo eh. 16Kiare square as dooble vees eh, bee eh reaish er lhiurid, as reaish er lheead. 17As nee oo claghyn y hoiaghey ayn, eer kiare coorseyn cloaie; bee’n chied choorse jeh sardius, jeh topaz, as carbuncle; shoh vees y chied choorse. 18As ayns y nah choorse vees emerald, sapphire, as diamond. 19As bee’n trass choorse ny ligure, as agate, as amethyst. 20As bee’n chiarroo choorse, beryl as onyx, as jasper; bee ad soit ayns socketyn dy airh. 21As bee ny claghyn ghaa-yeig, cordail rish enmyn chloan Israel; myr ta seal granit, dagh unnane jeu lesh e ennym, cordail rish y daa hribe jeig.

22As ver oo er corneilyn y vreast-plate linkyn feeit dy glen airh. 23As nee oo er y vreast-plate daa loob airhey, as ver oo yn daa loob er daa chorneil y vreast-plate. 24As ver oo’n daa link d’airh ayns y daa loob, ta er corneilyn y vreast-plate. 25As y daa chione elley jeh’n daa link nee oo shickyr ayns y daa hocket, as ver oo ad er shlinganyn yn ephod cheu-veealloo.

26As nee oo daa loob airhey, as ver oo ad er daa chorneil y vreast-plate, rish y chemmal, ayns lhiattee yn ephod er y derrey heu. 27As nee oo daa loob elley d’airh, as ver oo ad ayns lhiattee yn ephod fo, er y cheu elley, lesh y cheu-veealloo, raad te cheet cooidjagh, erskyn cryss aalin yn ephod. 28As nee ad kiangley yn breast-plate rish e loobyn, gys loobyn yn ephod, lesh rybban gorrym, dy ve erskyn cryss aalin yn ephod, nagh bee’n breast-plate er ny eaysley veih’n ephod. 29As nee Aaron ceau yn breast-plate dy vriwnys erskyn e chree, lesh enmyn chloan Israel er, tra t’eh goll stiagh ’syn ynnyd casherick, dy ve son cooinaghtyn kinjagh kiongoyrt rish y Chiarn.

30As ver oo ayns y vreast-plate dy vriwnys, yn Urim as Thummim; as bee ad er cree Aaron tra hed eh stiagh kionfenish y Chiarn: as nee Aaron gymmyrkey briwnys chloan Israel er e chree, kiongoyrt rish y Chiarn dy kinjagh.

31As nee oo garmad yn ephod ooilley dy ghorrym. 32As bee towl ayns mean e vullagh: bee eh er ny niartaghey mygeayrt lesh obbyr feeit, myr towl habergeon, nagh bee eh raipit.

33As cheu-heese, er y chemmal, ver oo pomegranateyn, gorrym, as purple, as scarleod, mygeayrt y chemmal echey: as cluig veggey dy airh eddyr ad ooilley mygeayrt. 34Clag airhey as pomegranate, clag airhey as pomegranate, rish chemmal y choamrey ooilley mygeayrt. 35As bee eh er Aaron, tra t’eh jannoo shirveish: as bee’n feiyr echey er ny chlashtyn, tra t’eh goll stiagh ’syn ynnyd casherick kiongoyrt rish y Chiarn, as tra t’eh cheet magh; nagh vow eh baase.

36As nee oo plate dy glen airh, as nee oo grainney er, myr y cowrey t’er seal fainey, CASHERICKYS GYS Y CHIARN. 37As nee oo kiangley eh lesh rybban gorrym er y vitre; er cheu wass y vitre vees eh. 38As bee eh erskyn eddin Aaron, dy vod Aaron gymmyrkey loghtyn ny reddyn casherick nee cloan Israel y hebbal ayns nyn giootyn casherick. As bee eh kinjagh er glaare e eddin, dy vod soiagh ’ve jeant jeu kiongoyrt rish y Chiarn.

39As nee oo broaidrail yn cooat dy aanrit keyl, as nee oo yn mitre d’aanrit keyl, as nee oo’n cryss d’obbyr-snaidey. 40As nee oo cooatyn da mec Aaron, as cryssyn daue, as nee oo bayrnyn daue, son gloyr as aalid. 41As ver oo ad er Aaron dty vraar, as er ny mec echey; as nee oo ad y ooilaghey, as nyn goyrt er-lheh, as ad y chasherickey, dy vod ad jannoo shirveish dooys ayns oik y taggyrt. 42As nee oo breechyn aanrit daue dy choodaghey nyn nearey, veih ny meeghyn gys ny glioonyn nee ad roshtyn. 43As bee ad er Aaron, as er e vec, tra hig ad stiagh ayns y chabbane-agglish, ny tra hig ad er-gerrey da’n altar dy yannoo shirveish ’syn ynnyd casherick; nagh dayrn ad peccah orroo hene, as baase y gheddyn. Bee shoh ny slattys dasyn son dy bragh, as da e luight ny yeï.