CAB. XXIX

1As shoh myr nee oo roo, dy chasherickey ad, dy ve my hirveishee ayns oik y taggyrt: Gow un dow aeg, as daa rea gyn lheamys, 2As arran gyn soorit, as berreenyn gyn soorit jeant lesh ooil, as keeakyn millish slaiyt lesh ooil: dy flooyr churnaght nee oo ad. 3As ver oo ad ayns un vaskad, as ver oo lhiat ad ayns y vaskad, marish y dow as y daa rea. 4As ver oo lhiat Aaron as e vec gys dorrys y chabbane-agglish, as ad y niee lesh ushtey. 5As nee oo goaill ny garmadyn, as ver oo er Aaron y cooat, as coamrey yn ephod, as yn ephod, as y breast-plate, as ver oo er cryss aalin yn ephod: 6As ver oo yn mitre, er e chione, as ver oo plate-airhey granit er y vitre. 7As nee oo goaill yn ooil casherick, as y gheayrtey eh er e chione, as ooilaghey eh. 8As ver oo lhiat ny mec echey, as ver oo coamraghyn orroo. 9As ver oo cryssyn moo [Aaron as e vec] as ver oo ny bayrnyn orroo: as lhieusyn vees oik y taggyrtys, liorish oardagh beayn: as nee oo Aaron as e vec y chasherickey. 10As ver oo lhiat dow kiongoyrt rish y chabbane-agglish: as nee Aaron as e vec nyn laueyn y choyrt er kione y dow. 11As nee oo’n dow y varroo kiongoyrt rish y Chiarn, rish dorrys y chabbane-agglish. 12As nee oo goaill jeh fuill y dow, as ver oo eh er eairkyn yn altar lesh dty vair, as nee oo deayrtey ooilley’n uill rish laare yn altar. 13As nee oo goaill ooilley’n eeh ta coodaghey yn mynnagh, as y skairt ta erskyn yn aane, as y daa aarey, lesh yn eeh t’orroo, as ad y lostey er yn altar. 14Agh feill y dow, as e heh, as e eoylley, nee oo lostey lesh aile cheu-mooie jeh’n champ; te ny oural-peccah.

15Nee oo myrgeddin goaill un rea, as ver Aaron as e vec nyn laueyn er kione y rea. 16As nee oo’n rea y varroo, as goaill yn uill echey, as spreih eh mygeayrt er yn altar. 17As nee oo giarey’n rea ayns peeshyn, as niee yn mynnagh, as ny cassyn echey, as ver oo ad marish ny peeshyn, as marish e chione. 18As nee oo lostey yn slane rea er yn altar; oural-losht eh gys y Chiarn; te ny hoar millish, ny oural chebbit lesh aile gys y Chiarn.

19As nee oo yn rea elley y ghoaill, as ver Aaron as e vec nyn laueyn er kione y rea. 20Eisht nee oo’n rea y varroo, as yn uill echey y ghoaill, as ver oo eh er baare cleaysh yesh Aaron, as er baare cleaysh yesh e vec, as er ordaag nyn laue yesh, as er ordaag vooar nyn gass yesh, as nee oo spreih yn uill er yn altar ooilley mygeayrt. 21As nee oo goaill jeh’n uill t’er yn altar, as jeh’n ooil casherick, as spreih eh er Aaron, as er e gharmadyn, as er e vec, as er garmadyn e vec mârish; as bee eshyn er ny chasherickey, as e gharmadyn, as e vec, as garmadyn e vec mârish. 22Nee oo goaill myrgeddin jeh’n rea yn eeh, as bun yn arbyl, as yn eeh ta coodaghey’n mynnagh, as y skairt ta erskyn yn aane, as y daa aarey, as yn eeh t’orroo, as y clingan yesh, son dy nee rea dy chasherickys eh: 23As un willeen arran, as un verreen dy arran ooilit, as un cheeak ass baskad yn arran gyn soorit ta kiongoyrt rish y Chiarn. 24As ver oo ad shoh ooilley ayns laueyn Aaron, as ayns laueyn e vec; as nee oo ad y chraa noon as noal, myr oural-criht kiongoyrt rish y Chiarn. 25As nee oo ad y ghoaill veih nyn laueyn, as lostey ad er yn altar, son oural-losht, son soar millish kiongoyrt rish y Chiarn: te oural jeant lesh aile gys y Chiarn. 26As nee oo goaill breast y rea jeh casherickys Aaron, as craa eh noon as noal, son oural-criht kiongoyrt rish y Chiarn; as shoh vees yn ayrn ayd’s. 27As nee oo casherickey breast yn oural-criht, as shlingan yn oural ta troggit seose, shen ny ta criht noon as noal, as shen ny ta troggit seose, jeh rea yn chasherickys, jeh shen ny ta son Aaron, as jeh shen ny ta son e vec. 28As bee eh lesh Aaron as e vec liorish slattys beayn, veih cloan Israel; son te ny oural-troggit-seose: as bee eh ny oural-troggit-seose, veih cloan Israel, jeh oural nyn jebballyn-shee, dy jarroo nyn jebballyn ta troggit seose gys y Chiarn.

29As bee garmadyn casherick Aaron lesh e vec ny lurg, dy ve er nyn ooilaghey ayndoo, as dy v’er nyn gasherickey ayndoo. 30As nee’n mac shen vees ny haggyrt ny ynnyd, cur ad mysh shiaght laa, tra hig eh stiagh ’sy chabbane-agglish dy yannoo shirveish ’syn ynnyd casherick. 31As nee oo goaill rea yn chasherickys as yn eill echey y vroie ’syn ynnyd casherick. 32As nee Aaron as e vec gee feill y rea, as yn arran t’ayns y vaskad, ec dorrys y chabbane-agglish. 33As nee ad gee ny reddyn shen, lhieu va’n lhiasaghey jeant, dy oardrail as dy chasherickey ad; agh cha jig lesh fer jeh kynney elley dy ee jeh, son dy vel ad casherick. 34As my vees veg jeh’n eill casherick ny jeh’n arran, er-mayrn derrey’n voghrey nee oo eisht yn fooilliagh y lostey lesh aile: cha bee eh er ny ee, son dy vel eh casherick. 35As shoh myr nee oo rish Aaron, as rish e vec, cordail rish dy chooilley nhee ta mee er dty harey; rish shiaght laa nee oo as y chasherickey. 36As nee oo chebbal dagh laa dow son oural-peccah, son lhiasaghey: as nee oo yn altar y ghlenney, tra t’ou er n’yannoo lhiasaghey er y hon, as nee oo eh y ooilaghey dy chasherickey eh. 37Shiaght laa nee oo lhiasaghey son yn altar, dy chasherickey eh; bee eh ny altar smoo casherick; cha jean nhee erbee nagh vel er ny casherickey bentyn rish yn altar.

38Nish, shoh nee oo chebbal er yn altar; daa eayn jeh’n chied vleïn, dagh laa dy kinjagh. 39Yn derrey eayn nee oo chebbal ’sy voghrey, as yn eayn elley nee oo chebbal ’syn astyr: 40As lesh un eayn, kiare chaart dy flooyr, mysh kaart dy ooil ghlen ny chione as mysh kaart dy feeyn ny chione son oural-feeyney. 41As yn eayn elley nee oo chebbal ’syn astyr, as nee oo rish cordail rish oural-arran y voghrey, as cordail rish yn oural-feeyney echey, son soar millish, oural jeant lesh aile gys y Chiarn. 42Bee shoh ny oural-losht kinjagh trooid magh ny sheelogheyn eu, ec dorrys y chabbane-agglish, kiongoyrt rish y Chiarn; raad ver-ym meeiteil diu, dy loayrt riu ayns shen. 43Shen y raad ver-yms meeiteil da cloan Israel, as bee’n chabbane-agglish er ny chasherickey lesh my ghloyr. 44As neem’s y cabbane-agglish, as yn altar y chasherickey: as neem’s myrgeddin chammah Aaron as e vec y chasherickey, dy yannoo shirveish dooys ayns oik y taggyrt.

45As neem’s cummal mastey cloan Israel, as beem’s yn Jee oc. 46As bee fys oc dy nee mish y Chiarn y Jee oc, hug lhiam ad magh ass cheer Egypt, dy chummal ny mast’ oc: Mish y Chiarn y Jee oc.