CAB. III

1Nish va Moses ny vochilley er shioltane Jethro e ayr-’sy-leigh, saggyrt Vidian: as ren eh leeideil yn shioltane gys cooyl yn aasagh, as haink eh gys slieau Yee, eer gys Horeb. 2As haink ainle y Chiarn huggey ayns lossey dy aile ayns thammag: as yeeagh eh, as cur-my-ner, va’n thammag lossey lesh aile, as cha row’n thammag losht. 3As dooyrt Moses, Hem nish dy lhiattee dy akin yn shilley mooar shoh, kys te nagh vel yn thammag losht. 4As tra honnick y Chiarn, dy hyndaa eh dy lhiattee dy akin, dy ren Jee geamagh er, ass mean y thammag, as dooyrt eh, Voses, Voses. As dooyrt eh, Ta mee ayns shoh. 5As dooyrt eshyn, Ny tar ny sniessey, cur dty vraagyn jeh dty chassyn, son ta’n ynnyd t’ou dy hassoo er, grunt chasherick. 6Dooyrt eh myrgeddin, Mish Jee dty ayrey, Jee Abraham, as Jee Isaac, as Jee Yacob. As choodee Moses e eddin: son va aggle er dy yeeaghyn er Jee. 7As dooyrt y Chiarn, Dy firrinagh ta mee er vakin seaghyn my phobble t’ayns Egypt, as ta mee er chlashtyn nyn eam, kyndagh rish nyn oaseiryn tranlaasagh; son shione dou nyn drimshey. 8As ta mee er jeet neose, dy livrey ad ass laue ny Egyptianee, as dy chur lhiam ad seose veih’n cheer shen, gys cheer mie, as mooar, gys cheer ayn ta palchey bainney as mill: gys ynnyd ny Canaaniteyn, as ny Hittiteyn, as ny Amoriteyn, as ny Perizziteyn, as ny Hiviteyn, as ny Jebusiteyn. 9Shen-y-fa nish, cur-my-ner, ta eam cloan Israel er jeet hym’s: as ta mee myrgeddin er vakin y tranlaase, ta ny Egyptianee er n’yannoo orroo. 10Tar nish, er-y-fa shen, as ver-yms oo gys Pharaoh, dy vod oo my phobble cloan Israel y chur lhiat magh ass Egypt. 11As dooyrt Moses rish Jee, Quoi mish, dy raghin’s gys Pharaoh, as cloan Israel y leeideil magh ass Egypt. 12As dooyrt eh, Beem’s son shickyrys mayrt; as bee shoh son cowrey dhyt, dy vel mee er dty choyrt er y chaghteraght shoh: Tra t’ou er choyrt lhiat y pobble shoh magh ass Egypt, nee shiu Jee y hirveish er y clieau shoh. 13As dooyrt Moses rish Jee, Cur-my-ner, tra hig-ym gys cloan Israel, as dy jir-ym roo, Ta Jee nyn ayraghyn er m’y choyrt er chaghteraght hiuish: as dy jir ad rhym, Cre ta’n ennym echey? cre jir-ym roo? 14As dooyrt Jee rish Moses, TA MEE SHEN NY TA MEE: As dooyrt eshyn, shoh myr jir oo rish cloan Israel, TA MEE, eshyn ta er choyrt mish er chaghteraght hiuish. 15As dooyrt Jee ny sodjey rish Moses, Er yn aght shoh nee oo loayrt rish cloan Israel, Ta’n Chiarn Jee nyn ayraghyn, Jee Abraham, Jee Isaac, as Jee Yacob, er m’y choyrt hiuish: shoh my ennym’s son dy bragh, as shoh my imraa gys dy chooilley heeloghe. 16Immee as chaggil shanstyr Israel, as abbyr roo, Ren y Chiarn Jee ny ayraghyn eu, Jee Abraham, Isaac, as Jacob, soilshaghey eh hene dou gra, Ta mee son shickyrys er yeeaghyn erriu, as er vakin shen ta jeant riu ayns Egypt. 17As ta mee er ghra, Ver-ym lhiam shiu ass seaghyn Egypt, gys cheer ny Chanaaniteyn, as ny Hittiteyn, as ny Amoriteyn, as ny Perizziteyn, as ny Hiviteyn, as ny Jebusiteyn, gys cheer taal bainney as mill. 18As ver ad geill da dty choraa, as hig oo, uss as shanstyr Israel, gys ree Egypt, as nee shiu gra rish, Ta’n Chiarn, Jee ny Hebrewnee er hoilshaghey eh hene dooin; as nish lhig dooin goll (ta shin guee ort) jurnah three laa ’syn aasagh, dy vod mayd oural y hebbal gys y Chiarn y Jee ain. 19As ta mee shickyr nagh lhig ree Egypt y raad diu, agh lesh laue lajer. 20As neem’s my laue y heeyney magh, as bwoaill-ym Egypt, lesh ooilley my yindyssyn neem’s nyn mast’ oc: as ny lurg shen lhiggee eh yn raad diu. 21As ver-yms foayr da’n pobble shoh ayns shilley ny Egyptianee: as hig eh gy-kione, tra hed shiu reue, cha jed shiu follym. 22Agh nee dy chooilley ven geeasagh veih e naboo, as veih ish t’er e joarreeaght ayns y thie eck, jewellyn argid, as jewellyn airh, as coamrey: as ver shiu ad er nyn mec, as er nyn inneenyn; as nee shiu spooilley ny Egyptianee.