CAB. XXX

1As nee oo altar dy lostey oural-millish er: jeh fuygh-shittim nee oo jannoo eh. 2Cubit vees e lhiurid, as cubit e lheead; (kiare square vees eh;) as daa chubit yn yrjid echey: bee ny eairkyn echey jeh’n stoo cheddin. 3As nee oo eh y choodaghey ooilley harrish lesh glen airh, as y mullagh, as ny lhiatteeyn echey ooilley mygeayrt, as ny eairkyn echey; as ver oo er rimmey dy airh ooilley mygeayrt. 4As ver oo daa loob airh fo’n rimmey rish y daa chorneil; er dagh lhiattee jeh ver oo ad; as bee ad son ynnydyn da ny looghyn dy hroggal eh. 5As nee oo ny looghyn dy fuygh-shittim, as ad y choodaghey lesh airh. 6As ver oo eh roish y choodagh ta liorish arg yn eanish, kiongoyrt rish y stoyl-myghin ta erskyn yn eanish, raad ver-yms meeiteil dhyt. 7As nee Aaron lostey er oural-millish dy chooilley voghrey: tra t’eh kiartaghey ny lampyn, nee eh oural-millish y lostey er. 8As tra ta Aaron foaddey ny lampyn ’syn astyr, nee eh oural-millish y lostey er; oural-millish kinjagh kiongoyrt rish y Chiarn, trooid magh nyn sheelogheyn. 9Cha jean shiu oural-millish neu-lowal y hebbal er, ny oural-losht, ny oural-arran; chamoo nee shiu deayrtey er oural-feeyney. 10As nee Aaron lhiasaghey ’yannoo er ny eairkyn echey keayrt ’sy vleïn lesh fuill oural-peccah yn lhiasaghey: keayrt ’sy vleïn nee eh lhiasaghey ’yannoo er, trooid magh ny sheelogheyn eu: te dy slane casherick gys y Chiarn. 11As loayr y Chiarn rish Moses, gra, 12Tra nee oo goaill slane coontey chloan Israel, lurg nyn earroo; eisht ver dy chooilley ghooinney feaysley son e vioys da’n Chiarn, tra t’ou dy choontey ad; nagh bee plague erbee ny mast’ oc, tra t’ou goaill yn earroo oc. 13Shoh nee ad dy chooilley unnane geeck, ny mast’ ocsyn ta cur stiagh nyn enmyn; lieh shekel, lurg shekel yn ynnyd casherick; (ta shekel feed gerah:) lieh shekel vees oural y Chiarn. 14Ver dy chooilley unnane t’er nyn earroo ny mast’ eu, veih feed bleïn dy eash as erskyn, oural da’n Chiarn. 15Cha der y berchagh ny smoo, ny’n boght ny sloo na lieh shekel, tra t’ad geeck nyn oural da’n Chiarn, dy yannoo lhiasaghey son nyn mioys. 16As nee oo troggal argid y lhiasaghey jeh cloan Israel, as ver oo eh er-lheh, cour shirveish y chabbane-agglish; dy vod eh ve son cooinaghtyn da cloan Israel kiongoyrt rish y Chiarn, dy yannoo lhiasaghey son nyn mioys.

17As loayr y Chiarn rish Moses, gra, 18Nee oo myrgeddin tobbyr prashey, as e chass myrgeddin dy phrash, dy oonlagh ayn: as ver oo eh eddyr y chabbane-agglish as yn altar, as ver oo ushtey ayn. 19Son nee Aaron as e vec nyn laueyn as nyn gassyn y niee liorish. 20Tra t’ad goll stiagh ’sy chabbane-agglish nee ad niee lesh ushtey, nagh vow ad baase; ny tra t’ad tayrn er-gerrey da’n altar, dy yannoo shirveish, dy lostey oural jeant lesh aile da’n Chiarn. 21Myr shen nee ad nyn laueyn as nyn gassyn y niee, nagh vow ad baase: as bee eh ny slattys dauesyn son dy bragh; eer dasyn as da e luight trooid magh nyn sheelogheyn.

22Ny-sodjey, loayr y Chiarn rish Moses, gra, 23Gow myrgeddin ard-spiceyn, jeh reih myrrh queig cheead shekel, as jeh cinnamon millish lieh wheesh eer daa cheead as jeih shekelyn as da-eed, as jeh calamus millish daa cheead as jeih shekelyn as da-eed. 24As jeh cassia queig cheead shekel, lurg shekel yn ynnyd casherick, as hin d’ooil-olive. 25As nee oo ooil casherick jeh, ny ooil jeant lurg schleï yn phothecary: bee eh ny ooil son casherickey. 26As lesh nee oo ooilaghey yn chabbane-agglish, as arg yn eanish, 27As y boayrd as ooilley ny siyn, as y kainlere as ny ta bentyn rish, as altar yn oural-millish, 28As altar yn oural-losht as ooilley ny ta bentyn rish, as y tobbyr as e chass. 29As nee oo ad y chasherickey, dy bee ad smoo casherick: cha jean nhee erbee agh shen ny ta casherick bentyn roo. 30As nee uss Aaron as e vec y ooilaghey, as y chasherickey, dy ve my hirveishee ayns oik y taggyrt. 31As nee oo loayrt rish cloan Israel, gra, Bee shoh ny ooil dy chasherickys dooys, trooid magh nyn sheelogheyn. 32Er corp dooinney cha bee eh er ny gheayrtey, chamoo nee oo veg jeh e lheid, lurg yn aght cheddin; te casherick, as bee eh casherick diuish. 33Quoi-erbee nee e lheid, ny quoi-erbee ver veg jeh ersyn nagh vel jeh sluight Aaron, bee eh dy jarroo er ny yiarey jeh veih e phobble.

34As dooyrt y Chiarn rish Moses, Gow hood spiceyn millish, stacte, as onycha, as galbanum; ny spiceyn millish shoh lesh frankincense glen; yn un towse jeh dagh unnane oc. 35As nee oo perfume y yannoo jeh, aarlit lurg aght y phothecary, er ny hempreil cooidjagh, glen as casherick. 36As nee oo paart jeh y vroo feer veein, as ver oo eh kiongoyrt rish yn eanish ayns y chabbane-agglish, raad ver-ym meeiteil dhyt: bee eh smoo casherick diuish. 37As er son y perfume t’ou dy yannoo, cha jean shiu er nyn son hene veg jeh e lheid: bee eh casherick dhyt’s da’n Chiarn. 38Quoi-erbee nee veg e lheid, dy soaral rish, bee eh dy jarroo er ny yiarey magh veih e phobble.