CAB. XXXI

1As loayr y Chiarn rish Moses, gra, 2Cur-my-ner, ta mee er n’eamagh er Bezaleel, mac Uri, mac Hur, jeh tribe Yudah: 3As ta mee er lhieeney eh lesh spyrryd Yee, ayns creenaght, as ayns tushtey, as ayns schleï, ayns dy chooilley vonney dy obbyr, 4Dy ve schleioil ayns obbraghyn costal, ayns airh, as ayns argid, as ayns prash, 5As ayns giarey claghyn, dy hoiaghey ad, as ayns cummey fuygh, dy obbraghey ayns dy chooilley vonney dy obbyr. 6As mish, cur-my-ner, ta mish er choyrt mârish, Aholiab mac Ahisamach jeh tribe Dan; as ayns ny creeaghyn ocsyn ooilley ta tushtagh ta mee er choyrt creenaght; dy vod ad jannoo ooilley ny ta mee er harey dhyt: 7Yn cabbane-agglish, as arg yn eanish, as stoyl y vyghin t’ayn, as ooilley siyn y chabbane-agglish, 8As y boayrd, as ny siyn echey, as y kainlere casherick, as ny ta bentyn rish, as yn altar dy oural-millish, 9As yn altar dy oural-losht, lesh ooilley e yeshaghtyn, as yn saagh-oonlee lesh y stoyl echey, 10As eaddagh y chirveish, as ny garmadyn casherick son Aaron y saggyrt, as garmadyn e vec, dy yannoo shirveish ayns oik y taggyrt, 11As yn ooil casherick, as oural-millish son yn ynnyd casherick: cordail rish ooilley ny ta mee er harey dhyt’s, nee ad jannoo.

12As loayr y Chiarn rish Moses, gra, 13Loayr uss myrgeddin rish cloan Israel, gra, Nee shiu dy firrinagh my ghooneeyn y reayll: son te ny chowrey eddyr mish as shiuish, trooid nyn sheelogheyn; dy vod fys ’ve eu dy nee mish y Chiarn, ta casherickey shiu. 14Nee shiu, er-y-fa shen, freaylley’n doonaght: son te casherick diu: dagh unnane ta dy vrishey eh, bee eh, son shickyrys, er ny choyrt gy-baase: son quoi-erbee nee obbyr erbee er, bee’n annym shen giarit jeh veih mastey e phobble. 15Shey laa foddee obbyr ’ve jeant, agh er y chiaghtoo, ta’n doonaght-fea, casherick da’n Chiarn: quoi-erbee nee veg yn obbyr er y doonaght, bee eh, son shickyrys, er ny choyrt gy-baase. 16Nee cloan Israel, er-y-fa shen, coyrt tastey da’n doonaght, dy reayll eh trooid magh nyn sheelogheyn, son conaant kinjagh. 17Te cowrey eddyr mish as cloan Israel son dy bragh: son ayns shey laa chroo’n Chiarn niau as thalloo, as er y chiaghtoo laa scuirr eh, as ghow eh boggey jeh.

18As hug eh da Moses, erreish da v’er loayrt rish, er slieau Sinai, daa voayrd y leigh, buird chloaie, scruit lesh mair Yee.