CAB. XXXII

1Tra honnick y pobble dy row Moses er uirriaght foddey er y clieau, dy haggil y pobble cooidjagh gys Aaron, as dooyrt ad rish, Seose, jean jeeghyn dooin, dy gholl roïn; son mychione yn Moses shoh, yn fer ren leeideil shin magh ass cheer Egypt, cha s’ain cre’n erree t’er jeet er. 2As dooyrt Aaron roo, Gow-jee ny fainaghyn airh t’ayns cleayshyn nyn mraane, nyn mec, as nyn inneenyn, as cur-jee lhieu ad hym’s. 3As ghow ooilley’n pobble ny fainaghyn airhey v’ayns nyn gleayshyn, as hug ad lhieu ad gys Aaron. 4As ghow eh ad veih nyn laueyn, as ren eh ad y lheïe ayns cummey lheiy grainnit: as dooyrt ad, Ad shoh dty yeeghyn, O Israel, hug lhieu magh oo ass cheer Egypt. 5As tra honnick Aaron shoh, hrog eh altar kiongoyrt rish, as hug Aaron order magh, as dooyrt eh, Ta mairagh feailley gys y Chiarn. 6As dirree ad dy moghey er laa-ny-vairagh, as heb ad ourallyn-losht, as hug ad lhieu ourallyn-shee: as hoie yn pobble sheese dy ee as dy iu, as dirree ad seose dy ve rouanagh.

7As dooyrt y Chiarn rish Moses, Immee, gow royd sheese; son ta dty phobble hug oo lhiat magh ass cheer Egypt, er n’yannoo peccah trome. 8T’ad er hyndaa dy leah jeh’n raad doardee mish daue; t’ad er n’yannoo daue hene lheiy grainnit, as er chur ooashley da, as er hebbal oural huggey, as er ghra, Ad shoh ny jeeghyn ayd’s, O Israel, hug lhieu uss seose ass cheer Egypt. 9As dooyrt y Chiarn rish Moses, Ta mee er vakin yn pobble shoh, as cur-my-ner pobble creoi-wannallagh ad. 10Shen-y-fa nish, faag mee, dy vod my yymmoose brishey magh nyn ’oï, as dy voddym ad y stroie; as neem’s jeed’s ashoon mooar. 11As ghow Moses padjer jeean gys y Chiarn e Yee, as dooyrt eh, Hiarn, cre’n-fa ta dty yymmoose brishey magh cha trome noi dty phobble, hug oo lhiat magh ass cheer Egypt, lesh ard phooar, as lesh laue niartal? 12Cre’n-fa veagh oyr ec ny Egyptianee dy ghra, Son olk hug eh lesh ad magh, dy stroie ad ayns ny sleityn, as dy chur mow ad veih eaghtyr y thallooin? Chyndaa veih eulys dty yymmoose, as shaghyn yn kerraghey shoh veih dty phobble. 13Cooinee er Abraham, Isaac, as Israel dty harvaantyn, daue ren oo breearrey liort hene, as dooyrt oo roo, Neem’s bishaghey yn sluight euish myr rollageyn yn aer, as ooilley’n cheer shoh, ta mee er loayrt jeh, ver-yms da’n sluight eu, as bee eh nyn eiraght foddey beayn. 14As va’n Chiarn er ny veiyghey veih’n olk, v’eh kiarit dy yannoo rish e phobble.

15As hyndaa Moses, as hie eh sheese jeh’n chronk, as va daa voayrd yn eanish ayns e laue; va ny buird scruit er dagh cheu; er y derrey heu as er y cheu elley v’ad er nyn scrieu. 16As va ny buird obbyr Yee, as va’n screeu, jeant liorish Jee, giarit ayns ny buird. 17As tra cheayll Joshua sheean y pobble myr v’ad gyllagh, dooyrt eh rish Moses, Ta feiyr-caggee ayns y champ. 18As dooyrt eshyn, Cha nee’n coraa ocsyn eh ta gyllagh son y vainshtyraght, ny’n eam ocsyn ta er choayl y varriaght: agh y sheean ocsyn ta jannoo kiaulleeaght ta mee clashtyn.

19As haink eh gy-kione, myr v’eh tayrn er-gerrey gys y champ, dy chronnee eh yn lheiy, as y daunsin: as ghreesee corree Voses, as hilg eh ny buird ass e laueyn, as vrish eh ad ec bun y clieau. 20As ghow eh yn lheiy v’ad er n’yannoo, as lheïe eh ’syn aile eh, as veihll eh gys joan eh, as spreih eh eh er yn ushtey, as hug eh er cloan Israel giu jeh. 21As dooyrt Moses rish Aaron, Cre’n olk ren y pobble shoh rhyt’s, dy vel oo er hayrn lheid y peccah orroo? 22As dooyrt Aaron, Ny lhig da corree my hiarn ve er ny vrasnaghey; shione dhyt y pobble, dy vel ad soit er olk. 23Son dooyrt ad rhym, Jean jeeghyn dooin dy leeideil shin; son mychione yn Moses shoh, yn fer hug lesh shin magh ass cheer Egypt, cha s’ain cre’n erree t’er jeet er. 24As dooyrt mee roo, Quoi-erbee ta fainaghyn airh echey, lhig daue goaill jeu ad: er shoh hug ad dou ad: eisht hilg mee ad ’syn aile, as haink y lheiy shoh magh.

25As tra honnick Moses dy row’n pobble rooisht, (son va Aaron er roostey ad gys nyn nearey, mastey nyn noidyn) 26Dy ren Moses eisht shassoo ayns giat y champ, as dooyrt eh, Quoi t’er cheu yn Chiarn? lhig da cheet hym’s. As ren ooilley mec Levi chaglym ad hene dy cheilley huggeysyn. 27As dooyrt eh roo, Shoh myr ta’n Chiarn Jee Israel gra, Cur-jee dy chooilley ghooinney e chliwe rish e lhiattee, as gow-jee stiagh as magh veih giat dy giat trooid y champ, as marr-jee dy chooilley ghooinney e vraar, as dy chooilley ghooinney e heshey, as dy chooilley ghooinney e naboo. 28As ren mec Levi lurg oardagh Voses; as huitt jeh’n pobble yn laa shen mysh three thousane dooinney. 29As dooyrt Moses, Ta shiu er chasherickey shiu hene jiu gys y Chiarn, eer dy chooilley ghooinney ayns goaill cooilleeney er e vac, as er e vraar, dy vod eh stowal e vannaght erriu yn laa jiu.

30As haink eh gy-kione er laa-ny-vairagh, dy dooyrt Moses rish y pobble, Ta shiu er n’yannoo peccah mooar: as nish hem’s seose gys y Chiarn; foddee dy voddym lhiasaghey ’yannoo son nyn beccah. 31As hyndaa Moses reesht gys y Chiarn, as dooyrt eh, Oh, ta’n pobble shoh er n’yannoo peccah trome, as er n’yannoo daue hene jeeghyn dy airh. 32Ny-yeih nish, my she dty aigney eh, leih daue nyn beccah; as mannagh jean oo, lhig dooys, ta mee guee ort, ve er my gholley ass dty lioar t’ou er scrieu. 33As dooyrt y Chiarn rish Moses, Quoi-erbee ta er n’yannoo peccah m’oï, eshyn nee’m y gholley ass my lioar. 34Immee nish, er-y-fa shen, jean y pobble y leeideil gys yn cheer mychione ta mee er loayrt rhyt: Cur-my-ner, hed my ainle royd: Ny-yeih, ayns laa yn cherraghey, neem’s cooinaghtyn er shoh nyn beccah. 35As ghow’n Chiarn kerraghey er y pobble, er coontey’n jalloo hug ad er Aaron dy yannoo.