CAB. XXXIII

1As dooyrt y Chiarn rish Moses, Immee royd, as fow seose, uss as y pobble hug oo lhiat magh ass cheer Egypt, gys y cheer vreear mee da Abraham, da Isaac, as da Jacob, gra, Da’n sluight ayd’s ver-ym eh. 2As ver-ym ainle royd; as eiyr-ym magh yn Canaanite, yn Amorite, as yn Hittite, as y Perizzite, yn Hivite, as y Jebusite; 3Gys cheer raad ta palchey dy vainney as mill; son cha jem’s seose ny mast’ eu; son dy nee pobble creoi-wannallagh shiu; nagh stroie-ym shiu er y raad.

4As tra cheayll y pobble yn skeeal trimshagh shoh, ren ad dobberan; as cha dug dooinney erbee er e choamrey-feailley. 5Son va’n Chiarn er ghra rish Moses, Abbyr rish cloan Israel, Pobble creoi-wannallagh shiu; hig-yms nyn mastey ’sy tullogh, dy choyrt mow shiu: cur nish er-y-fa shen jeed dty choamraghyn moyrnagh, dy voddym fakin cre dy yannoo rhyt. 6As hug cloan Israel nyn stoamid jeu rish slieau Horeb. 7As ghow Moses y cabbane, as hoie eh seose eh cheu-mooie jeh’n champ, tammylt veih’n champ, as denmys eh shen Cabbane-agglish y co-chruinnaght. As haink eh gy-kione, dy jagh dagh unnane, va shirrey gys y Chiarn, magh gys cabbane-agglish y co-chruinnaght, va cheu-mooie jeh’n champ. 8As haink eh gy-kione, tra hie Moses magh gys y cabbane-agglish dy dirree ooilley’n pobble seose, as hass ad dy chooilley ghooinney ec dorrys e chabbane, as yeeagh ad lurg Moses, derrey v’eh er n’gholl stiagh ’sy chabbane. 9As haink eh gy-kione, myr hie Moses stiagh ’sy chabbane, dy daink y pillar bodjallagh neose, as hass eh rish dorrys y cabbane-agglish, as ren y Chiarn loayrt rish Moses. 10As honnick ooilley’n pobble y pillar bodjallagh shassoo ec dorrys y chabbane: as dirree ooilley’n pobble seose as hug ad ooashley, dy chooilley ghooinney ec dorrys e chabbane hene. 11As loayr y Chiarn rish Moses eddin ry eddin, myr loayragh dooinney rish e heshey. As hyndaa eh gys y champ: agh cha jagh Joshua e hirveishagh, mac Nun, ny ghooinney aeg, magh ass y chabbane.

12As dooyrt Moses rish y Chiarn, Cur-my-ner, t’ou gra rhym, Cur lhiat seose y pobble shoh: as cha vel oo er hoilshaghey dou quoi ver oo mârym. Ga dy vel oo er ghra, Shynney lhiam dty ennym, as t’ou er gheddyn foayr ayns my hilley’s. 13Shen-y-fa nish, ta mee guee ort, my ta mee er gheddyn foayr ayns dty hilley, soilshee dou nish dty raad, dy vod toiggal ’ve aym jeed, dy voddym foayr y gheddyn ayns dty hilley; as cooinee dy vel yn ashoon shoh dty phobble hene. 14As dooyrt eshyn, Bee my enish mayrt, as ver-ym dhyt fea. 15As dooyrt eh rish, Mannagh jed dty enish mârym, ny cur lhiat shin ny sodjey. 16Son cre liorish vees eh er ny hoilshaghey ayns shoh dy vel mish as dty phobble er gheddyn foayr ayns dty hilley’s? Nagh nee liorish dy vel oo goll mârin? Myr shoh bee mayd orrin hene, mish as dty phobble, er nyn scarrey voish dy chooilley phobble t’er eaghtyr y thallooin. 17As dooyrt y Chiarn rish Moses, Neem’s myrgeddin yn red shoh t’ou er ghra; son t’ou er gheddyn foayr ayns my hilley’s, as shynney lhiam dt’ennym. 18As dooyrt eshyn, Ta mee guee ort, soilshee dou dty ghloyr. 19As dooyrt eh, Soilshee-yms dhyt ooilley my vieys ayns goll royd, as nee’m fockley magh royd ennym y Chiarn; as beem’s graysoil dauesyn s’gooidsave lhiam ve graysoil, as nee’m myghin y hoilshaghey dauesyn s’gooidsave lhiam myghin y hoilshaghey. 20As dooyrt eh, Cha vod uss m’eddin’s y akin, son cha vod dooinney erbee mish y akin as ve bio. 21As dooyrt y Chiarn, Cur-my-ner, ta ynnyd liorym, as nee oo shassoo er creg: 22As hig eh gy-kione, choud’s ta my ghloyr goll shaghey, dy der-ym oo ayns scoltey jeh’n chreg, as coodee-ym oo lesh my laue choud’s ta mee goll shaghey. 23As goym my laue ersooyl, as hee oo my chooyl; agh my eddin cha vod ve er ny akin.