CAB. XXXIV

1As dooyrt y Chiarn rish Moses; Jean daa voayrd chloaie y chummey dhyt hene goll-rish ny chied vuird: as neem’s scrieu er ny buird shen, ny goan v’er ny chied vuird ren uss brishey. 2As fow aarloo ’sy voghrey, as tar seose chelleeragh gys slieau Sinai, as shass ayns m’enish ayns shen, er mullagh y clieau. 3As cha jig dooinney erbee seose mayrt, chamoo lhig da dooinney erbee ve ry-akin er y clieau, chamoo lhig da ny shioltaneyn, ny shellooyn gyndyr er-gerrey da’n slieau shen.

4As chiartee eh daa voayrd chloaie, goll-rish y chied eallagh, as dirree Moses dy moghey, as hie eh seose er cronk Sinai, myr va’n Chiarn er harey da, as ghow eh lesh ayns e laue yn daa voayrd chloaie. 5As haink y Chiarn neose ayns y vodjal, as hass eh liorish ayns shen, as ren eh fockley magh ennym y Chiarn. 6As hie’n Chiarn shaghey kiongoyrt rish, as ren eh fockley magh, YN CHIARN, YN CHIARN JEE, myghinagh as graysoil, jeh surranse-foddey, as feoiltagh ayns mieys as ayns ynrickys, 7Freaylley myghin gour thousaneyn, mial mee-chraueeaght, as loghtyn, as peccah, as nagh jean, er saase erbee, ny kimmee y heyrey: kerraghey peccaghyn ny ayraghyn er y chloan, as er cloan ny chlienney, gys y trass as y chiarroo heeloghe. 8As ren Moses siyr, as chroym eh e chione lesh y thalloo, as hug eh ooashley. 9As dooyrt eh, My ta mee nish er gheddyn foayr ayns dty hilley, O Hiarn, lhig da my Hiarn, ta mee guee ort, goll nyn mastey, (ga dy nee pobble creoi-wannallagh ad) as leih dooin nyn loghtyn, as nyn beccaghyn, as gow shin son dty eiraght hene.

10As dooyrt eh, cur-my-ner, ta mee jannoo conaant; kiongoyrt rish ooilley dty phobble neem’s mirrilyn, nyn lheid as nagh row rieau jeant er feaï-ny-cruinney, ny ayns ashoon erbee; as nee ooilley’n pobble t’ou nyn mastey, fakin obbraghyn y Chiarn: son red atchimagh eh neem’s er dty hon. 11Cur tastey mie da shen ta mee nish dy dty harey: Cur-my-ner, ta mee gimman magh royd yn Amorite; as y Canaanite, as yn Hittite, as y Perizzite, as yn Hivite, as y Jebusite. 12Bee er dty hwoaie, nagh jean oo conaant rish cummaltee’n cheer raad t’ou goll, er-aggle dy bee eh ribbeh dy hayrn peccah ort. 13Agh nee shiu stroie ny altaryn oc, brishey ny jallooyn, as giarey sheese ny biljyn foue v’ad coyrt ooashley. 14Son cha der oo ooashley da jee erbee elley; son ta’n Chiarn, e ennym ta Eadolys, ny Yee eadolagh: 15Er-aggle dy jean oo conaant rish cummaltee yn cheer, as dy n’eiyr ad er maarderys [spyrrydoil] lurg ny jeeghyn ocsyn, as dy jeb ad oural da ny jeeghyn oc, as dy jean fer dty chuirrey, as dy gow uss ayrn jeh e oural, 16As dy gow uss ny inneenyn ocsyn da ny mec ayd, as dy jed ny inneenyn ocsyn er-shaghryn lurg ny jeeghyn oc hene, as dy der ad er dty vec goll er-shaghryn lurg ny jeeghyn ocsyn. 17Cha jean oo dhyt hene jeeghyn lheït erbee.

18Feailley ny caisht nee oo freayll: rish shiaght laa nee oo gee arran gyn soorit, ayns imbagh y vee Abib, myr ren mee dty harey: son ayns mee Abib haink oo magh ass Egypt. 19Ta ooilley yn chied-ruggit lhiam’s, as dy chooilley chied-bert mastey dty vaase, edyr eh ve dow, ny keyrrey, ta fyrryn. 20Agh y chied sharragh vees ec assyl nee oo feaysley lesh eayn: as mannagh veayshil oo eh, nee oo brishey e wannal: ooilley’n chied-ruggit jeh dty vec nee oo feaysley: as cha jig unnane erbee kiongoyrt rhym’s lhome-lauee.

21Shey laa nee oo gobbraghey, agh er y chiaghtoo laa gowee oo fea. Ayns yn niarragh, as ’syn ouyr, nee oo fea y ghoaill.

22As nee oo freayll feailley ny shiaghtinyn jeh’n chied-vess y fouyr-curnaght: as feailley yn chur-stiagh, ec jerrey ny bleeaney.

23Three keayrtyn ’sy vleïn hig dy chooilley mac dooinney jiu kiongoyrt rish y Chiarn Jee, Jee Israel. 24Son eiyr-yms magh ny ashoonyn royd, as sheeyn-yms magh dty ardjyn; chamoo ver dooinney erbee saynt da dty halloo, tra hed oo seose dy hebbal oo hene fenish y Chiarn dty Yee, three keayrtyn ’sy vleïn. 25Cha jean oo chebbal fuill yn oural aym’s, [yn eayn-caisht] lesh soorit-arran, chamoo vees veg jeh oural feailley ny caisht faagit derrey’n voghrey. 26Toshiaght y chied-vess jeh dty halloo ver oo lhiat stiagh gys thie’n Chiarn dty Yee. Cha jean oo mannan y vroie ayns bainney e vayrey. 27As dooyrt y Chiarn rish Moses, Scrieu uss ny goan shoh; son dy nee rere bree ny goan shoh ta mee er n’yannoo conaant rhyt’s, as rish Israel. 28As v’eh ayns shen marish y Chiarn da-eed laa as da-eed oie: cha ren eh gee arran, ny giu ushtey; as scrieu eh er ny buird focklyn y chonaant, ny jeih annaghyn.

29As haink eh gy-kione, tra haink Moses neose jeh slieau Sinai, (as daa voayrd yn eanish ayns laue Voses, tra haink eh neose jeh’n slieau) nagh row fys ec Moses, dy row soilshey gloyroil er e eddin, choud’s v’eh taggloo rish. 30As tra honnick Aaron as ooilley cloan Israel Moses, cur-my-ner, va skell sollys er e eddin; as va aggle orroo dy heet ny aare. 31As deïe Moses orroo huggey, as hie Aaron as ooilley ard-reiltee yn pobble huggey: as ren Moses loayrt roo. 32As er shen haink ooilley cloan Israel er-gerrey, as hug eh daue ayns sarey ooilley ny va’n Chiarn er loayrt rish er slieau Sinai. 33As choud’s va Moses loayrt roo, hug eh coodagh er e eddin. 34Agh tra hie Moses stiagh kionfenish y Chiarn, dy loayrt rishyn, ghow eh yn coodagh jeh, derrey haink eh magh. As haink eh magh, as loayr eh rish cloan Israel shen ny hie er sarey da. 35As honnick ooilley cloan Israel eddin Voses, dy row skell sollys er eddin Voses: as hug Moses yn coodagh reesht er e eddin, derrey hie eh stiagh dy loayrt rish [Jee].