CAB. XXXV

1As haggil Moses slane sheshaght chloan Israel dy cheilley, as dooyrt eh roo, Shoh ny goan ta’n Chiarn er harey diuish dy chooilleeney. 2Shey laa nee shiu gobbraghey, agh bee’n chiaghtoo laa feailley diuish, doonaght dy aash da’n Chiarn: quoi-erbee nee obbyr er, bee eh er ny choyrt gy-baase. 3Cha jean shiu aile y oaddey trooid magh nyn gummallyn er y doonaght.

4As loayr Moses rish ooilley co-chruinnaght chloan Israel, gra, Shoh’n red ta’n Chiarn er harey, gra, 5Trog-jee ny-vud eu hene chebbal da’n Chiarn: Quoi-erbee ta jeh cree feoiltagh, lhig da cur lesh eh son chebbal da’n Chiarn; airh, as argid, as prash, 6As gorrym, as purple, as scarleod, as aanrit keyl, as geaysh ghoair, 7As craitnyn rea daahit jiarg, as craitnyn badjer, as fuygh-shittim, 8As ooil son soilshey, as spiceyn son ooil casherick, as son yn oural-millish, 9As claghyn-onyx, as claghyn gour yn ephod, as y vreast-plate. 10As nee dy chooilley unnane ta schleioil ny mast’ eu cheet, as jannoo ooilley ny ta’n Chiarn er harey; 11Yn cabbane-agglish, e chabbane, e choodagh, holteryn, as e vuird, e varryn, e phillaryn, as e socketyn; 12Yn arg as e looghyn, marish stoyl y vyghin, as y curtan-coodee, 13Yn boayrd as e looghyn, as ooilley ny siyn, as yn arran casherick, 14Yn kainlere myrgeddin son soilshey, as e yeshaghtyn, as e lampyn, lesh ooil son y soilshey, 15As altar yn oural-incense, as e looghyn, as yn ooil casherick, as yn oural-millish, as curtan y dorrys, ec goll stiagh y chabbane-agglish, 16Altar yn oural-losht lesh e ghrate prash, e looghyn, as ooilley e siyn, yn tobbyr-oonlee as e stoyl, 17Curtanyn ny cooyrtey, e phillaryn, as nyn socketyn, as y curtan son dorrys y chooyrt, 18Kibbinyn y chabbane-agglish, as kibbinyn y chooyrt, as ny coyrdyn oc, 19As coamraghyn y chirveish, dy yannoo shirveish ’syn ynnyd casherick, ny garmadyn casherick son Aaron y saggyrt, as garmadyn e vec dy yannoo shirveish ayns oik y taggyrtys.

20As ren ooilley co-chruinnaght chloan Israel goll roue veih kionfenish Voses. 21As haink ad, dy chooilley unnane ren e chree y ghreinnaghey, as dagh unnane va jeh spyrryd aggindagh, as hug ad lhieu oural y Chiarn gour obbyr y chabbane-agglish, as gour ooilley e hirveish, as gour ny garmadyn casherick. 22As haink ad chammah deiney as mraane, whilleen as va jeh cree feoilt, as hug ad lhieu braceletyn, as fainaghyn-cleayshey, as fainaghyn, as broachyn, ooilley jewellyn airhey: as ren dy chooilley ghooinney chebbal oural airh gys y Chiarn. 23As ren dy chooilley ghooinney va nyn lheid echey cur lesh gorrym, as purple, as scarleod, as aanrit keyl, as fynney ghoair, as craitnyn jiarg rea, as craitnyn badjer. 24Dy chooilley unnane, heb oural dy argid as prash, hug ad lhieu chebbal y Chiarn; as dy chooilley ghooinney va fuygh-shittim echey gour obbyr erbee jeh’n chirveish, hug eh lesh eh. 25As ren dy chooilley ven schleioil sneeu lesh e laueyn, as hug ad lhieu shen ny v’ad er sneeu, chammah gorrym, as purple, as scarleod, as aanrit keyl. 26As ren dy chooilley ven schleioil sneeu geaysh ghoair. 27As hug ny fir-reill lhieu claghyn-onyx, as claghyn dy ve soit er yn ephod, as er y vreast-plate, 28As spiceyn, as ooil son y soilshey, as son yn ooil casherick, as son yn oural-millish. 29Hug cloan Israel lhieu chebbal arryltagh da’n Chiarn; dy chooilley ghooinney as ben jeh cree feoilt, dy choyrt lhieu dy chooilley vonney d’obbyr, va’n Chiarn er harey liorish Moses, dy ve jeant.

30As dooyrt Moses rish cloan Israel, Cur-jee my-ner, ta’n Chiarn er n’enmys er-lheh Bezaleel mac Uri, mac Hur, jeh tribe Yudah. 31As t’eh er lhieeney eh lesh spyrryd Yee, ayns creenaght, ayns tushtey, as ayns keeayll, as ayns dy chooilley vonney dy obbyr; 32As dy chummey obbraghyn costal, dy obbraghey ayns airh, as ayns argid, as ayns prash, 33As ayns cummey claghyn ry-hoi soiaghey ad, as ayns grainnaghey fuygh, ry-hoi dy chooilley vonney dy obbyr schleioil. 34As t’eh er choyrt da creenaght dy ynsaghey feallagh elley, chammah eh hene, as Aholiab mac Ahisamach jeh tribe Dan. 35Ad shoh t’eh er lhieeney lesh creenaght chree, dy yannoo dy chooilley vonney dy obbyr, jeh’n grainneyder, as jeh’n obbree schleioil, as jeh’n obbree-snaidey laatshagh, ayns gorrym, as ayns purple, ayns scarleod, as ayns aanrit keyl; as obbyr fidderagh, eer jeusyn ta jannoo obbyr erbee, jeusyn ta aghtal dy chummey obbraghyn schleioil.