CAB. XXXVI

1Er shoh hie Bezaleel as Aholiab gys obbyr, as dy chooilley ghooinney schleioil, da va’n Chiarn er choyrt creenaght as tushtey, dy hoiggal kys dy yannoo dy chooilley vonney dy obbyr son shirveish yn ynnyd casherick, cordail rish ooilley ny va’n Chiarn er harey. 2As deïe Moses er Bezaleel as Aholiab, as dy chooilley ghooinney aghtal, ayns e chree va’n Chiarn er choyrt tushtey, eer dagh unnane ren e chree y ghreinnaghey, dy chur nyn laue gys yn obbyr. 3As livrey Moses daue ooilley ny chebballyn va cloan Israel er choyrt gour shirveish yn ynnyd casherick, dy yannoo eh; as hug ad lhieu, ny-sodjey, huggeysyn chebballyn arryltagh dy chooilley voghrey. 4As dy chooilley ghooinney schleioil ayns obbyr yn ynnyd casherick, haink ad dy chooilley ghooinney veih e obbyr v’ad mysh.

5As loayr ad rish Moses, gra, Ta’n pobble coyrt lhieu foddey smoo ny ta ymmyrchagh son shirveish yn obbyr, ta’n Chiarn er harey dy ve jeant. 6As hug Moses sarey, as hug ad eam fud y champ, gra, Ny lhig da dooinney ny ben obbyr sodjey ’yannoo, son shirveish yn ynnyd casherick. Myr shoh va’n pobble er nyn lhiettal veih chebbal. 7Son va’n stoo v’oc ayns laue fondagh as rouyr dy yannoo’n slane obbyr. 8As ren dagh dooinney schleioil, mastey obbreeyn y chabbane-agglish, jeih curtanyn dy aanrit keyl feeit, as gorrym, as purple, as scarleod: va cherubim jeant orroo lesh obbyr aghtal. 9Va lhiurid un churtan hoght cubityn as feed, as va lheead curtan kiare cubityn: va ny curtanyn ooilley jeh’n un towse. 10As ren eh loopey queig curtanyn dy cheilley: as ny queig curtanyn elley loop eh dy cheilley. 11As hug eh loobyn dy ghorrym rish oirr un churtan, veih’n selvage gys y vullagh; ren eh myrgeddin er oirr mooie y churtan elley, raad v’ad tayrn dy cheilley. 12Jeih loobyn as da-eed hug eh ayns un churtan, as jeih loobyn as da-eed hug eh ayns oirr y churtan, raad v’ad tayrn dy cheilley; as chum ny loobyn ad dy cheilley. 13As ren eh jeih clespyn as da-eed dy airh, as hug eh ny curtanyn dy cheilley lesh ny clespyn. Myr shoh ve un chabbane.

14As ren eh curtanyn dy gheaysh ghoair son coodagh y chabbane casherick: un churtan jeig ren eh. 15Va lhiurid un churtan jeih cubityn as feed, as lheead dagh curtan kiare cubityn; va’n un churtan jeig jeh’n un towse. 16As hug eh queig curtanyn dy cheilley orroo hene, as shey curtanyn orroo hene. 17As hug eh jeih loobyn as da-eed rish oirr mooie ny curtanyn, raad v’ad dy heet dy cheilley; as hug eh jeih loobyn as da-eed rish oirr y churtan, ta kiangley cooidjagh yn nah churtan. 18As ren eh jeih clespyn as da-eed dy phrash, ry-hoi niartaghey’n chabbane dy cheilley, dy voddagh eh ve un slane cabbane. 19As ren eh coodagh son y chabbane, dy chraitnyn rea daahit jiarg, as coodagh dy chraitnyn badjer er-y-skyn. 20As ren eh buird son y chabbane-agglish dy fuygh-shittim, soit seose er nyn ghing. 21Va lhiurid boayrd jeih cubityn, as lheead boayrd cubit dy lieh. 22Va daa hennalt ayns boayrd, kiart ry-cheilley; myr shoh ren eh ooilley buird y chabbane. 23As ren eh buird da’n chabbane; feed boayrd son y cheu my-yiass. 24As ren eh da-eed mortis argid fo ny feed buird, daa vortis fo un voayrd son e ghaa hennalt, as daa vortis fo boayrd elley son e ghaa hennalt. 25As son y cheu elley jeh’n chabbane, va lesh y twoaie, ren eh feed boayrd. 26As ny da-eed mortissyn argid; daa vortis fo un voayrd, as daa vortis fo boayrd elley. 27As son lhiattee heear y chabbane ren eh shey buird. 28As ren eh daa voayrd son corneilyn y chabbane er y daa lhiattee. 29As v’ad juntit cooidjagh veih heese dy heose, ’syn un loob: shoh myr ren eh roo ny-neesht, ’sy daa chorneil. 30As va hoght buird ayn, as va ny mortissyn oc shey mortissyn jeig argid, daa vortis fo dy chooilley voayrd.

31As ren eh barryn dy fuygh-shittim: queig son buird dy derrey lhiattee jeh’n chabbane. 32As queig barryn son buird y cheu elley jeh’n chabbane, as queig barryn son buird y chabbane, son ny corneilyn lesh y sheear. 33As hug eh er y barr meanagh dy roshtyn trooid ny buird veih cheu dy cheu. 34As choodee eh ny buird lesh airh, as ren eh ny loobyn dy airh, dy ghoaill ny barryn, as ny barryn choodee eh harrish lesh airh.

35As ren eh curtan dy ghorrym, as purple, as scarleod, as d’aanrit keyl feeit, lesh cherubim dy obbyr aghtal ren eh shoh. 36As hug eh gys shoh kiare pillaryn dy fuygh-shittim, as choodee eh ad harrish lesh airh; va ny clespyn oc dy airh, as ren eh er nyn son kiare socketyn argid.

37As ren eh curtan son dorrys y chabbane, dy ghorrym, as purple, as scarleod, as dy aanrit keyl cast, dy obbyr-snaidey, 38As ny queig pillaryn echey lesh nyn glespyn: as choodee eh ny king, as ny rimmaghyn oc lesh airh: agh va ny queig socketyn oc dy phrash.