CAB. XXXVII

1As ren Bezaleel yn arg dy fuygh-shittim: va’n lhiurid echey daa chubit dy lieh, as cubit dy lieh va’n lheead echey, as cubit dy lieh va’n yrjid echey. 2As choodee eh harrish eh er cheu-sthie as er cheu-mooie lesh glen airh, as hug eh rimmey dy airh mygeayrt-y-mysh. 3As ren eh er y hon kiare loobyn airhey, son ny kiare corneilyn; daa loob er y derrey heu, as daa loob er y cheu elley. 4As ren eh looghyn dy fuygh-shittim, as choodee eh ad harrish lesh airh. 5As hug eh ny looghyn, ayns ny loobyn rish lhiatteeyn yn arg ry-hoi troggal yn arg.

6As ren eh stoyl y vyghin jeh glen airh; daa chubit dy lieh va’n lhiurid, as cubit dy lieh yn lheead echey. 7As ren eh daa cherubim d’airh, hammarit magh, ass yn un pheesh ren eh ad, er dagh kione jeh stoyl y vyghin: 8Un cherub er mullagh y derrey chione, as cherub elley er mullagh y chione elley: jeh’n un stoo rish stoyl y vyghin ren eh ny cherubim er dagh kione jeh. 9As va skianyn ny cherubim skeaylit voue dy ard, as choodee ad, lesh nyn skianyn, harrish stoyl y vyghin, lesh nyn eddinyn noi-ry-hoi; va eddinyn ny cherubim lesh stoyl y vyghin.

10As ren eh yn boayrd dy fuygh-shittim, va’n lhiurid echey daa chubit, as y lheead cubit, as cubit dy lieh yn yrjid echey. 11As choodee eh harrish eh lesh glen airh, as ren eh da rimmey jeh glen airh, ooilley mygeayrt. 12Ren eh myrgeddin lheead-bass dy voarder mygeayrt-y-mysh; as ren eh rimmey airh son y boarder ooilley mygeayrt. 13As ren eh er y hon kiare loobyn airhey, as hug eh ny loobyn er ny kiare corneilyn ayns ny kiare cassyn echey. 14Kiart rish y voarder va ny loobyn, son goaill ny looghyn dy hroggal y boayrd. 15As ren eh ny looghyn dy fuygh-shittim, as choodee eh ad harrish lesh airh, son gymmyrkey yn boayrd. 16As ren eh ny siyn v’er y voayrd, e chlaareeyn, as e spainyn, as e chappanyn, as e siyn ourallagh jeh glen airh.

17As ren eh yn kainlere dy glen airh; lesh obbyr hammarit ren eh yn kainlere, e chass, as e vanglaneyn, e lampyn, e chruint, as va e vlaaghyn jeh’n stoo cheddin. 18As shey banglaneyn cheet magh veih ny lhiatteeyn echey: three banglaneyn y chainlere er y derrey lhiattee, as three er y lhiattee elley. 19Three lampyn jeant ayns cummey almondyn, ayns un vanglane, cront as blaa; as three lampyn jeant myr almondyn ayns banglane elley, cront as blaa; er yn aght shoh trooid ny shey banglaneyn goll magh veih’n chainlere. 20As ayns y chainlere va kiare lampyn jeant myr almondyn, e chruint, as e vlaaghyn. 21As cront fo daa vanglane jeh, as cront fo daa vanglane jeh, as cront fo daa vanglane jeh, cordail rish ny shey banglaneyn va cheet magh er. 22Va ny cruint as ny banglaneyn oc jeh’n stoo cheddin: ve ooilley obbyr hammarit dy glen airh. 23As ren eh e shiaght lampyn, as e smalyderyn, as e phlaityn smalee dy glen airh. 24Jeh talent dy glen airh ren eh shoh, as ooilley ny siyn echey.

25As ren eh altar yn incense dy fuygh-shittim: cubit er lhiurid, as cubit er lheead (kiare corneilagh) as daa chubit er yrjid: va ny eairkyn echey jeh’n stoo cheddin. 26As choodee eh harrish eh lesh glen airh, chammah yn mullagh, as ny lhiatteeyn ooilley mygeayrt, as ny eairkyn echey: ren eh myrgeddin rimmey jeh glen airh ooilley mygeayrt. 27As hug eh daa loob airh fo’n rimmey, rish y daa chorneil, er e ghaa lhiattee, son goaill ny looghyn ry-hoi troggal eh. 28As ren eh ny looghyn dy fuygh-shittim, as choodee eh ad harrish lesh airh.

29As ren eh yn ooil casherick, as yn incense costal dy spiceyn millish, lurg schleï yn phothecary.