CAB. XXXVIII

1As ren eh altar yn oural-losht dy fuygh-shittim, queig cubityn er lhiurid, as queig cubityn er lheead (kiare corneilagh) as three cubityn er yrjid. 2As hug eh ny eairkyn echey er ny kiare corneilyn; va ny eairkyn jeh’n stoo cheddin, as choodee eh ad harrish lesh prash. 3As ren eh ooilley siyn yn altar, ny pooiyt, as ny pannaghyn dy ghoaill y leoie, as ny meilaghyn, as ny aalyn, as ny censeryn, ren eh ooilley ny siyn va bentyn rish dy phrash. 4As ren eh son yn altar grate prashey myr obbyr jeebinagh, lieh’n raad sheese, kiart ’sy vean. 5As ren eh kiare loobyn son kiare corneilyn y ghrate prashey, dy ghoaill ny looghyn. 6As ren eh ny looghyn dy fuygh-shittim, as choodee eh ad harrish lesh prash. 7As hug eh ny looghyn ayns ny loobyn, rish lhiatteeyn yn altar, ry-hoi troggal eh; ren eh yn altar lesh buird, follym er cheu-sthie.

8As ren eh yn tobbyr-oonlee dy phrash, as e stoyl fo dy phrash, jeh ny plaityn prashey sollys va son looking-glessyn ec ny mraane, va cheet cooidjagh dy choyrt ooashley ec dorrys y chabbane-agglish. 9As ren eh yn cooyrt; er y cheu my-yiass, va curtanyn ny cooyrtey d’aanrit keyl, keead cubit. 10Va ny pillaryn oc feed, as nyn socketyn prashey feed: va holteryn ny pillaryn, as nyn rimmaghyn dy argid. 11As va ny curtanyn, son y cheu twoaie, keead cubit, va nyn pillaryn feed as nyn socketyn prashey feed: holteryn ny pillaryn, as nyn rimmaghyn dy argid. 12As son y cheu heear, va ny curtanyn jeih cubityn as da-eed, nyn pillaryn jeih, as nyn socketyn jeih: va holteryn ny pillaryn, as nyn rimmaghyn dy argid. 13As son y cheu har, jeih cubityn as da-eed. 14Va ny curtanyn son derrey cheu’n yiat queig cubityn jeig, nyn pillaryn three, as nyn mortissyn three. 15As son y cheu elley jeh giat ny cooyrtey va curtanyn jeh queig cubityn jeig, nyn pillaryn three, as nyn mortissyn three. 16Va ooilley curtanyn ny cooyrtey ooilley mygeayrt dy aanrit keyl. 17As va socketyn ny pillaryn dy phrash: holteryn ny pillaryn, as nyn rimmaghyn dy argid; as va king ny pillaryn coodit harrish lesh argid, as va ooilley pillaryn ny cooyrtey lesh rimmaghyn dy argid. 18As va’n churtan son giat ny cooyrtey d’obbyr-snaidey, gorrym, as purple, as scarleod, as aanrit keyl cast: as va’n lhiurid echey feed cubit, as e yrjid queig cubityn, gansoor gys towshan curtanyn ny cooyrtey. 19As va ny pillaryn oc kiare, as nyn mortissyn prash kiare, nyn holteryn dy argid, as coodagh king ny pillaryn, as ny rimmaghyn oc dy argid. 20As va ooilley kibbinyn y chabbane-agglish, as jeh’n chooyrt ooilley mygeayrt, dy phrash.

21Shoh coontey cost y chabbane, eer jeh cabbane yn eanish, myr ve er ny ghoaill lurg sarey Voses, son shirveish ny Leviteyn, liorish laue Ithamar, mac Aaron y saggyrt. 22As ren Bezaleel mac Uri, mac Hur jeh tribe Yudah, ooilley ny va’n Chiarn er harey da Moses. 23As mârishyn va Aholiab, mac Ahisamach jeh tribe Dan, ny ghrainneyder, ny obbree schleioil, as ny vroidyrer ayns gorrym, as ayns purple, as ayns scarleod, as aanrit keyl. 24Ooilley’n airh va baarit er yn obbyr, ayns slane obbyr yn ynnyd casherick, eer airh yn oural, ve nuy talentyn as feed, as shiaght cheead as jeih shekelyn as feed, cordail rish shekel yn ynnyd casherick. 25As va’n argid ocsyn, v’er nyn earroo jeh’n pobble, keead talent, as thousane shiaght cheead as three-feed as queig shekelyn jeig, lurg shekel yn ynnyd casherick. 26Bekah son dy chooilley ghooinney, ta shen, lieh shekel, cordail rish shekel yn ynnyd casherick, son dy chooilley unnane hug stiagh e ennym, veih feed bleïn dy eash as erskyn, son shey cheead as three thousaneyn as shiaght cheead as jeih. 27As jeh ny keead talentyn dy argid, va jeant socketyn yn ynnyd casherick, as socketyn pillaryn ny curtanyn, keead socket jeh ny keead talentyn, talent son dagh socket. 28As jeh’n thousane shiaght cheead three-feed as queig shekelyn jeig, ren eh holteryn son ny pillaryn, dy choodaghey ny king oc, as son rimmaghyn daue. 29As va prash yn oural three-feed talent as jeih, as daa housane as kiare cheead shekel. 30As lhieu shen ren eh socketyn son dorrys y chabbane-agglish, as yn altar prashey, as yn grate prashey er y hon, as ooilley siyn yn altar. 31As socketyn ny cooyrtey ooilley mygeayrt, as socketyn giat ny cooyrtey, as ooilley kibbinyn y chabbane, as ooilley kibbinyn ny cooyrtey slane mygeayrt.