CAB. XXXIX

1As jeh’n ghorrym, as purple, as scarleod, ren ad coamraghyn êrin son shirveish yn ynnyd casherick, as ny garmadyn casherick da Aaron: myr va’n Chiarn er choyrt sarey da Moses. 2As ren eh yn ephod dy airh, gorrym, as purple, as scarleod, as aanrit keyl. 3As woaill ad magh yn airh ayns plaityn thanney, as yiare ad eh ayns wieryn, ry-hoi obbraghey eh ’sy ghorrym, as ’sy phurple, as ayns y scarleod, as ayns y sheeidey, lesh obbyr schleioil. 4Ren ad peeshyn-geaylin er y hon, dy reayll eh cooidjagh: rish y daa oirr ve sniemmit dy cheilley. 5As va cryss laatshagh yn ephod jeh’n un stoo as obbyr; dy airh, dy ghorrym, as purple, as scarleod, as dy heeidey, myr hug y Chiarn sarey da Moses.

6As ren ad gobbragh claghyn-onyx soit ayns socketyn airhey, grainnit myr ta sealyn er nyn yiarey, lesh enmyn chloan Israel orroo. 7As hug eh ad er geayltyn yn ephod, son claghyn dy chooinaghtyn da cloan Israel; myr va’n Chiarn er harey Moses.

8As ren eh breast-plate dy obbyr schleioil, goll-rish obbyr yn ephod, dy airh, dy ghorrym, as purple, as scarleod, as dy heeidey. 9Ve kiare corneilagh; ren ad yn breast-plate dooble: reaish er lhiurid, as reaish er lheead, tra ve dooblit. 10As hoie ad ayn kiare coorseyn dy chlaghyn: ayns y chied choorse va sardius, as topaz, as carbuncle; shoh va’n chied choorse. 11As ayns y nah choorse, va emerald, sapphire, as diamond. 12As ’sy trass choorse, va ligure, agate, as amethyst. 13As ayns y chiarroo choorse, beryl, onyx, as jasper; v’ad soit ayns socketyn airhey, ayns nyn order. 14As va ny claghyn ghaa-yeig, rere enmyn chloan Israel; myr ta seal grainnit, dagh unnane jeu lesh e ennym, cordail rish y daa hribe jeig. 15As ren ad linkyn feeit er corneilyn y vreast-plate dy glen airh. 16As ren ad daa socket airhey, as daa loob airhey, as hug ad y daa loob ayns daa chorneil y vreast-plate. 17As hug ad yn daa link feeit d’airh ayns y daa loob er corneilyn y vreast-plate. 18As daa chione y daa link feeit ren ad sniemmey ’sy daa socket, as hug ad ad er peeshyn-geaylin yn ephod, cheu-veealloo. 19As ren ad daa loob airhey, dy hoiaghey ad er daa chorneil y vreast-plate, rish yn oirr echey, va er lhiattee sthie yn ephod. 20As ren ad daa loob airh elley, er daa oirr heese yn ephod, lesh y cheu-veealloo, raad te cheet cooidjagh, erskyn cryss aalin yn ephod. 21As ren ad kiangley yn breast-plate, lesh e loobyn gys loobyn yn ephod, lesh laatshey gorrym, dy ve erskyn cryss aalin yn ephod, nagh beagh yn breast-plate er ny eaysley veih’n ephod; myr hug y Chiarn sarey da Moses.

22As ren eh coamrey yn ephod dy obbyr feeit, ooilley dy ghorrym. 23As va towl ayns mean y choamrey, myr towl habergeon, lesh boandey mysh y towl, dy niartaghey eh. 24As hug ad er chemmallyn y choamrey pomegranateyn dy ghorrym, dy phurple, as scarleod, as sheeidey. 25As ren ad cluig veggey dy glen airh, as hug ad ny cluig eddyr ny pomegranateyn er chemmal y choamrey, ooilley mygeayrt, eddyr ny pomegranateyn. 26Clag as pomegranate, clag as pomegranate ooilley mygeayrt chemmal y choamrey, dy yannoo shirveish ayn; myr hug y Chiarn sarey da Moses.

27As ren ad cooatyn dy heeidey, d’obbyr feeit, son Aaron, as son e vec: 28As ren ad mitre dy heeidey, as bayrnyn aalin d’aanrit keyl, as breechyn d’aanrit keyl. 29As cryss d’aanrit keyl, as dy ghorrym, dy phurple, as scarleod, d’obbyr-snaidey; myr hug y Chiarn sarey da Moses.

30As ren ad plate y crown casherick dy glen airh, as scrieu ad er, myr ta seal grainnit, CASHERICKYS GYS Y CHIARN. 31As hug ad ayn laatshey gorrym, dy chiangley eh heose er y vitre, myr hug y Chiarn sarey da Moses.

32Myr shoh va mullagh er slane obbyr y chabbane-agglish: as ren cloan Israel cordail rish ooilley ny va’n Chiarn er harey da Moses, myr shen ren ad.

33As hug ad lhieu’n cabbane-agglish gys Moses, yn coodagh as ooilley ny va bentyn rish, ny clespyn, ny buird, ny tesmadyn, ny pillaryn, as ny socketyn echey, 34As y coodagh dy chraitnyn rea daahit jiarg, as y coodagh dy chraitnyn badjer, as y coodagh casherick, 35Arg yn eanish, as e looghyn, as y stoyl-myghin, 36Yn boayrd, as ooilley ny siyn echey, as yn arran casherick, 37Yn kainlere glen [airhey] lesh e lampyn, ad dy ve soit ayns order, as ooilley ny siyn echey, as yn ooil son soilshey, 38As yn altar airhey, as yn ooil casherick, as yn incense millish, as y curtan son dorrys y chabbane-agglish. 39Yn altar prashey, as e ghrate prash, e looghyn, as ooilley e hiyn, yn tobbyr-oonlee, as e stoyl fo, 40Coodagh ny cooyrtey, e phillaryn, as e socketyn, as curtanyn giat ny cooyrtey, e choyrdyn, as e chibbinyn, as ooilley ny siyn, gour shirveish y chabbane-agglish, 41Yn eaddagh êrin dy yannoo shirveish ’syn ynnyd casherick, as ny garmadyn casherick son Aaron y saggyrt, as garmadyn e vec, dy hirveish ayns oik y taggyrtys. 42Cordail rish ooilley ny doardee yn Chiarn da Moses, myr shen ren cloan Israel cooilleeney’n slane obbyr. 43As yeeagh Moses er ooilley’n obbyr, as cur-my-ner, v’ad er n’yannoo eh myr va’n Chiarn er harey; eer myr shen ren ad eh: as hug Moses e vannaght daue.