CAB. IV

1As dreggyr Moses, as dooyrt eh, Cur-my-ner, cha jean ad m’y chredjal, chamoo ver ad geill da my ghoan: son jir ad, Cha vel y Chiarn er hoilshaghey eh hene dhyt’s. 2As dooyrt y Chiarn rish, Cre shen t’ayd ayns dty laue? As dooyrt eh, Lorg. 3As dooyrt eshyn, Ceau voïd eh er y thalloo; as cheau eh er y thalloo eh, as haink eh dy ve ny ard-nieu: as roie Moses er-chea voish. 4As dooyrt y Chiarn rish Moses, Sheeyn magh dty laue, as gow eh er e arbyl. As heeyn eh magh e laue, as ghow eh greme er, as ve reesht ny lorg ayns e laue. 5Dy vod ad credjal, dy vel Chiarn Jee nyn ayraghyn, Jee Abraham, Jee Isaac, as Jee Yacob, er hoilshaghey eh hene dhyt’s.

6As marish shoh dooyrt y Chiarn rish; Cur dty laue nish ayns dty oghrish; as hug eh e laue ayns e oghrish; as tra ghow eh ass eh, cur-my-ner, va e laue louraanagh, cha gial as sniaghtey. 7As dooyrt eh, Cur dty laue reesht ayns dt’oghrish. As hug eh reesht e laue ayns e oghrish, as hayrn eh eh ass e oghrish, as cur-my-ner, ve er ny chaghlaa reesht, myr yn eill elley. 8As hig eh gy-kione, mannagh jean ad uss y chredjal, ny geill y choyrt da goo yn chied chowrey, dy gred ad bree yn nah chowrey. 9As hig eh gy-kione, mannagh gred ad yn daa chowrey shoh, ny geill y choyrt da dty choraa, dy drog oo jeh ushtey ny hawin, as dy deayrt oo eh er y thalloo chirrym: as hig yn ushtey t’ou dy ghoaill ass yn awin, dy ve fuill er y thalloo chirrym.

10As dooyrt Moses rish y Chiarn, O my Hiarn, cha nee dooinney mee dy ghlare floaoil, chamoo roish, ny erreish dhyt loayrt rish dty harvaant: agh ta mee moal ayns glare as chengey. 11As dooyrt y Chiarn rish, Quoi t’er chummey beeal dooinney? ny quoi t’er n’yannoo yn bouyr, ny’n balloo? ny’n fakin, ny’n doal? nagh nee mish, yn Chiarn? 12Immee nish, er-y-fa shen, as beem’s lesh dty veeal, as ynsee-ym dhyt cre nee oo gra. 13As dooyrt eh, O my Hiarn, cur dty haghteraght, ta mee guee ort, liorishyn ta ny s’fondagh er y hon. 14As va corree’n Chiarn er ny vrasnaghey noi Moses, as dooyrt eh, Nagh vel Aaron y Levite dty vraar? ta fys aym dy vel y gioot echeysyn dy loayrt dy mie. As cur-my-ner myrgeddin, t’eh nish er e raad dy heet dty whail: As tra hee-ys eh oo, bee boggey er e chree. 15As nee oo loayrt rishyn, as ver oo roish cre dy ghra: as beem’s marish dty veeal’s, as y beeal echeysyn, as ynsee-ym diu cre nee shiu y yannoo: 16As nee eshyn loayrt ayns dty lieh rish y pobble: as bee eh dhyt’s, eer bee eshyn dhyt’s ayns ynnyd beeal, as bee uss dasyn ayns ynnyd Yee. 17As nee uss goaill yn lorg shoh ayns dty laue, lesh nee oo mirrilyn y yannoo.

18As jimmee Moses, as hie eh reesht gys Jethro e ayr-’sy-leigh, as dooyrt eh rish; Lhig y raad dou, ta mee guee ort, dy hyndaa reesht gys my vraaraghyn t’ayns Egypt; dy yeeaghyn vel ad foast bio. As dooyrt Jethro rish Moses, Immee, as shee dy row mayrt. 19As dooyrt y Chiarn rish Moses ayns Midian, Immee, gow reesht gys Egypt; son ta ooilley ny deiney marroo va shirrey dty vioys. 20As ghow Moses e ven, as e vec, as hug eh ad er assylyn, as hie eh reesht gys cheer Egypt. As ghow Moses lorg Yee ayns e laue. 21As dooyrt y Chiarn rish Moses; Tra t’ou er gholl, as er roshtyn gys Egypt, jeeagh dy jean oo fenish Pharaoh, ooilley ny yindyssyn shen ta mee er choyrt ayns pooar dty laue: agh neem’s yn chree echeysyn y chreoghey, nagh lhig eh yn raad da’n pobble. 22As nee oo gra rish Pharaoh; Myr shoh ta’n Chiarn dy ghra, Ta Israel yn mac aym’s, eer my vac shinney. 23As ta mee gra rhyt; Lhig y raad da my vac, dy vod eh mish y hirveish, as my t’ou gobbal dy lhiggey’n raad da, cur-my-ner, marr-yms dty vac, eer dty vac shinney.

24As haink eh gy-kione er y raad, myr v’eh goaill aaght, dy dug y Chiarn meeiteil da, as chiare eh dy varroo eh. 25Er shoh ghow Zipporah skynn dy chlagh gyere, as ren ee giarey-chymmylt e mac; as hilg ee eh ec e chassyn, as dooyrt ee, T’ou uss dy jarroo er ve dty ghooinney folley dooys. 26Myr shen lhig eh yn raad da; as dooyrt ee Sheshey folley oo, er coontey yn giarey-chymmylt.

27As dooyrt y Chiarn rish Aaron, Immee gys yn aasagh dy veeiteil Moses. As hie eh, as ren eh meeiteil eh er cronk Yee, as phaag eh eh. 28As dinsh Moses da Aaron ooilley goan y Chiarn, v’er choyrt eh er chaghteraght; as ooilley ny cowraghyn, phoint eh da dy yannoo. 29As hie Moses as Aaron, as haggil ad cooidjagh ooilley shanstyr chloan Israel. 30As ren Aaron fockley magh ooilley ny goan va’n Chiarn er loayrt rish Moses, as ren eh ny mirrilyn ayns shilley’n pobble. 31As ren y pobble credjal: as tra cheayll ad dy row yn Chiarn er yeeaghyn er cloan Israel, as dy row eh er vakin yn seaghyn oc, eisht chroym ad nyn ghing, as ren ad ooashlaghey.