CAB. XL

1As loayr y Chiarn rish Moses gra, 2Er y chied laa jeh’n chied vee nee oo soiaghey seose cabbane-agglish y pobble. 3As ver oo ayn arg yn eanish, as nee oo coodaghey yn arg lesh y churtan. 4As ver oo lhiat stiagh y boayrd, as nee oo kiartaghey ny reddyn ta dy ve soit er ayns nyn order, as ver oo lhiat stiagh yn kainlere, as nee oo foaddey ny lampyn. 5As ver oo seose yn altar airh son yn oural-incense kiongoyrt rish arg yn eanish, as ver oo curtan y dorrys gys y chabbane. 6As ver oo seose altar yn oural-losht roish dorrys y chabbane-agglish. 7As ver oo seose y tobbyr-oonlee eddyr cabbane y chaglym-cooidjagh as yn altar, as ver oo ushtey ayn. 8As nee oo soiaghey seose yn chooyrt runt mygeayrt (y chabbane) as nee oo croghey seose yn curtan ec giat ny cooyrtey. 9As nee oo goaill yn ooil casherick, as y chabbane-agglish as ooilley ny t’ayn y ooilaghey, as nee oo eh y chasherickey, as ooilley ny siyn echey: as bee eh casherick. 10As nee oo altar yn oural-losht, as ooilley ny siyn echey y ooilaghey, as yn altar y chasherickey: as bee eh ny altar smoo casherick. 11As nee oo yn tobbyr-oonlee as e stoyl y ooilaghey, as eh y chasherickey. 12As ver oo lhiat Aaron as e vec gys dorrys y chabbane-agglish, as ad y niee lesh ushtey. 13As ver oo ny garmadyn casherick er Aaron, as eh y ooilaghey as y chasherickey, dy vod eh jannoo shirveish dooys ayns oik y taggyrtys. 14As ver oo lhiat ny mec echey, as ver oo moo ny garmadyn casherick. 15As nee oo adsyn y ooilaghey, myr ren oo nyn ayr, dy vod ad jannoo shirveish dooys ayns oik y taggyrtys: son bee’n ooilaghey shoh son shickyrys dy haggyrtys beayn, trooid ny sheelogheyn oc. 16Myr shoh ren Moses: cordail rish ooilley ny va’n Chiarn er harey da: shen myr ren eh.

17As haink eh gy-kione, ’sy chied vee jeh’n nah vleïn, er y chied laa jeh’n vee, dy row’n cabbane-agglish er ny hoiaghey seose. 18As ren Moses y cabbane-agglish y hroggal, as ren eh shickyr ny socketyn echey, as ny buird y hoiaghey seose, as hug eh ayn ny barryn, as hrog eh seose ny pillaryn. 19As skeayl eh yn tent erskyn y chabbane, as hug eh coodagh y chabbane harrish ooilley; myr hug y Chiarn sarey da Moses.

20As hug eh buird ny jeih annaghyn ayns yn arg, as ny looghyn rish yn arg, as hug eh stoyl y vyghin kione heose yn arg. 21As hug eh lesh yn arg stiagh ’sy chabbane-agglish, as hug eh seose yn curtan-coodee, as choodee eh arg y leigh; myr hug y Chiarn sarey da Moses.

22As hug eh yn boayrd ayns y chabbane-agglish, rish lhiattee twoaie y chabbane, cheu-mooie jeh’n churtan. 23As chiartee eh yn arran casherick er, kiongoyrt rish y Chiarn; myr va’n Chiarn er harey Moses.

24As hug eh yn kainlere ayns y chabbane-agglish, jeeragh er y voayrd, rish lhiattee jiass y chabbane-agglish. 25As ren eh foaddey ny lampyn kiongoyrt rish y Chiarn, myr va’n Chiarn er harey Moses. 26As hug eh yn altar airhey ayns y chabbane-agglish, jeeragh er y churtan. 27As ren eh oural-incense y lostey er, myr hug y Chiarn sarey da Moses.

28As hoie eh seose yn curtan ec dorrys y chabbane-agglish. 29As hug eh altar yn oural-losht liorish dorrys y chabbane-agglish; as heb eh er yn oural-losht, as yn oural-arran; myr va’n Chiarn er harey Moses.

30As hoie eh yn tobbyr-oonlee eddyr y chabbane-agglish as yn altar, as hug eh ushtey ayn, dy niee lesh. 31As ren Moses, as Aaron as e vec, veih shen, niee nyn laueyn as nyn gassyn. 32Tra hie ad stiagh ’sy chabbane-agglish, as tra haink ad er-gerrey da’n altar [dy yannoo shirveish] ren ad niee ad hene, myr hug y Chiarn sarey da Moses. 33As hrog eh yn chooyrt mygeayrt y chabbane-agglish as yn altar, as hoie eh seose curtan giat ny cooyrtey: myr shoh hug Moses kione er yn obbyr.

34Eisht ren bodjal coodaghey yn cabbane-agglish, as ren gloyr y Chiarn lhieeney’n cabbane-agglish. 35As cha voddagh Moses goll stiagh ’sy chabbane-agglish, son y vodjal v’er-y-skyn, as dy ren gloyr y Chiarn yn cabbane-agglish y lhieeney. 36As tra hrog y vodjal va erskyn y chabbane-agglish, hie Israel er nyn doshiaght er ooilley nyn yurnaaghyn: 37Agh mannagh row’n bodjal er ny scughey, eisht cha hrog ad orroo dy hroailt, derrey’n laa ve er ny scughey. 38Son va bodjal y Chiarn er y chabbane-agglish ’sy laa, as aile er-y-skyn ’syn oie, ayns shilley ooilley thie Israel, trooid ooilley nyn yurnaaghyn.