CAB. V

1As lurg shen, hie Moses as Aaron stiagh, as dooyrt ad rish Pharaoh, Shoh myr ta’n Chiarn Jee Israel gra, Lhig y raad da my phobble, dy vod ad feailley casherick y reayll dooys ’syn aasagh. 2As dooyrt Pharaoh, Quoi’n Chiarn, dy vel mish dy choyrt biallys gys e choraa, dy lhiggey’n raad da Israel? cha nione dooys y Chiarn, chamoo lhig-yms y raad da Israel. 3As dooyrt adsyn, Ta Jee ny Hebrewnee, er hoilshaghey eh hene dooinyn: lhig dooin goll, ta shin guee ort, jurnah three laa gys yn aasagh, dy hebbal oural gys y Chiarn y Jee ain; er-aggle dy duitt eh orrin lesh y chramp, ny lesh y chliwe. 4As dooyrt ree Egypt roo, Kys dy vel shiuish, Voses as Aaron, lhiettal y pobble veih nyn obbyr? reue shiu gys nyn obbyr. 5As dooyrt Pharaoh, Cur-jee my-ner, ta’n pobble ymmodee ’sy cheer, as ta shiuish cur orroo lhiggey shaghey nyn obbyr. 6As doardee Pharaoh er y laa cheddin ny oaseiryn va harrish y pobble, as adsyn va currym yn obbyr orroo, gra. 7Cha der shiu maghey shoh coonlagh da’n pobble, dy yannoo breekyn, myr bollagh shiu: lhig daue goll as coonlagh y gheddyn daue hene. 8As cha lhiggys shiu veg sheese jeh coontey ny breekyn, va kianlt orroo roïe dy yannoo; cha bee veg jeh lhiggit lhieu: son t’ad litcheragh; shen-y-fa t’ad geam, gra, Lhig dooin goll dy hebbal oural gys y Jee ain. 9Lhig da ny smoo dy obbyr v’er ny choyrt er ny deiney, dy vod dy liooar ve oc dy yannoo: as ny lhig daue coyrt geill da goan fardalagh. 10As hie ny oaseiryn va harrish y pobble, as adsyn va currym yn obbyr orroo, as loayr ad rish y pobble, gra, Shoh myr ta Pharaoh gra, Cha der-ym coonlagh diu. 11Immee-jee, as fow-jee coonlagh myr oddys shiu; ny-yeih cha bee veg jeh nyn obbyr lhiggit sheese. 12Shen-y-fa va’n pobble er nyn skeayley noon as noal trooid ooilley cheer Egypt, dy hymsaghey stubble ayns ynnyd coonlagh. 13As ren ny mainshtyryn va harrystoo ad y ghreinnaghey, gra, Cooilleen-jee nyn obbyr, nyn obbyr gagh-laa, myr tra va coonlagh er ny choyrt diu. 14As va stiurtyn chloan Israel, va mainshtyryn Pharaoh er hoiaghey harrystoo, er nyn mwoalley, as ve fênit jiu, Kys te nagh vel shiu er chooilleeney nyn obbyr ayns jannoo breekyn, chammah jea as jiu, myr bollagh shiu.

15Eisht haink stiurtyn chloan Israel, as ren ad accan gys Pharaoh, gra, Cre’n-fa t’ou dellal myr shoh rish dty harvaantyn? 16Cha vel coonlagh er ny choyrt da dty harvaantyn, ny-yeih t’ad gra rooin, Jean-jee breekyn: as cur-my-ner, ta dty harvaantyn er nyn mwoalley, agh ta’n oill ayns dty phobble hene. 17Agh dooyrt eshyn, Litcheryn, litcheryn shiu; shen-y-fa, ta shiu gra, Lhig dooin goll dy hebbal oural gys y Chiarn. 18Reue shiu, er-y-fa shen, gys nyn obbyr: son cha vow shiu veg y choonlagh, ny-yeih shegin diu tailley ny breekyn y choyrt stiagh. 19As honnick stiurtyn chloan Israel dy row ad ayns stayd treih, lurg da ve raït roo, Cha bee veg jeh coontey ny breekyn lhiggit sheese jeh nyn obbyr gagh-laa.

20As hie ad quail Moses as Aaron, va farkiagh orroo, myr haink ad magh veih Pharaoh. 21As dooyrt ad roo, Dy jeeagh y Chiarn erriu, as dy jean eh briwnys; son dy vel shiu er chur orrin dy ve feohdoil ayns sooillyn Pharaoh, as ayns sooillyn e harvaantyn, as er choyrt chliwe ayns ny laueyn oc dy stroie shin. 22As hie Moses voue gys y Chiarn, as dooyrt eh, Hiarn, cre’n-oyr dy vel oo er ghellal cha creoi roo shoh dty phobble? Cre’n-fa t’ou er m’y choyrt er y chaghteraght shoh? 23Son er-dyn traa haink mee gys Pharaoh, dy loayrt ayns yn ennym ayd’s, t’eh er ghellal dy olk rish y pobble shoh; chamoo t’ou edyr er livrey dty phobble.