CAB. VI

1Eisht dooyrt y Chiarn rish Moses, Nish nee oo fakin, cre nee’m y yannoo rish Pharaoh: son lesh laue lajer lhiggee eh yn raad daue, as lesh laue niartal eh hene nee geiyrt ad magh ass e heer. 2As loayr Jee rish Moses, as dooyrt eh rish, Mish y Chiarn: 3As hoilshee mee mee-hene da Abraham, da Isaac, as da Jacob, liorish ennym yn JEE OOILLEY-NIARTAL, agh liorish my ennym JEHOVAH cha row enney oc orrym. 4As ta mee myrgeddin er niartaghey my chonaant roosyn, dy derrin daue cheer Chanaan, cheer nyn droailtys, ayn v’ad nyn yoarreeyn. 5As ta mee myrgeddin er chlashtyn osnaghyn chloan Israel, ta ny Egyptianee freayll fo bondiaght: as ta mee er chooinaghtyn er my chonaant. 6Shen-y-fa, abbyr rish cloan Israel, Mish y Chiarn, as ver-ym lhiam shiu magh veih fo errey ny Egyptianee, as livrey-ym shiu veih’n bondiaght oc: as lesh roih sheeynt magh, as lesh briwnyssyn trome, ver-ym feaysley diu. 7As goym shiu son pobble dou hene, as beem’s my Yee diuish: as bee fys eu, dy nee mish y Chiarn y Jee euish, ta coyrt livrey-ys diu veih bondiaght ny Egyptianee. 8As ver-yms lhiam shiu stiagh gys y cheer, my-e-chione ren mee breearrey dy choyrt eh da Abraham, as da Isaac, as da Jacob: as ver-yms diuish eh son eiraght: mish y Chiarn.

9As shoh myr loayr Moses rish cloan Israel: agh cha dug ad geill da Moses, trooid sproght nyn gree, as y vondiaght dewil.

10As loayr y Chiarn rish Moses, gra, 11Immee stiagh, as loayr rish Pharaoh ree Egypt, dy chur kied da cloan Israel goll roue ass y cheer echey. 12As loayr Moses fenish y Chiarn, gra, Cur-my-ner, cha vel cloan Israel er n’eaishtagh rhym, kys eisht ver Pharaoh clashtyn dooys, ta my ghooinney dy hengey moal? 13As loayr y Chiarn rish Moses, as rish Aaron, as hug eh currym lhieu gys cloan Israel, as gys Pharaoh ree Egypt, cloan Israel dy gholl magh ass cheer Egypt.

14Ad shoh king lught-thieyn nyn ayraghyn: Cloan Reuben mac shinney Israel; Hanoch, as Pallu, Hezron, as Carmi: ad shoh lught-thie Reuben. 15As mec Simeon; Jemuel, as Jamin, as Ohad, as Jachin, as Zohar, as Shaul mac ben va ny Chanaanite, ad shoh lught-thie Simeon.

16As shoh enmyn mec Levi, cordail rish nyn sheelogheyn; Gershon, as Kohath, as Merari: as va bleeantyn bea Levi shey-feed as shiaght bleeaney jeig. 17Mec Ghershon; Libni, as Shimi, cordail rish nyn lught-thie. 18As mec Kohath; Amram, as Izhar, as Hebron, as Uzziel: as bleeantyn bea Kohath v’ad shey-feed as three bleeaney jeig. 19As mec Merari; Mahali, as Mushi; shoh lught-thie Levi, cordail rish ny sheelogheyn oc. 20As phoose Amram Jochebed shuyr e ayrey; as va echey r’ee Aaron as Moses: As va bleeantyn eash Amram shey-feed as shiaght bleeaney jeig.

21As mec Izhar; Korah, as Nepheg, as Zichri. 22As mec Uzziel; Michael, as Elzaphan, as Zithri. 23As ghow Aaron Elisheba, inneen Amminadab, shuyr Naashon, son ben, as dymmyrk ee da, Nadab as Abihu, Eleazar, as Ithamar. 24As mec Korah; Assir as Elkanah, as Abiasaph, shoh lught-thie ny Korhiteyn. 25As phoose Eleazar mac Aaron unnane jeh inneenyn Putiel; as va Phinehas eck rish; ad shoh king ayraghyn ny Leviteyn, cordail rish nyn lught-thie. 26Ad shoh yn Aaron as Moses cheddin, roo dooyrt y Chiarn, Cur-jee lhieu cloan Israel magh ass Egypt, cordail rish nyn sheshaghtyn-caggee. 27Shoh adsyn loayr rish Pharaoh Ree Egypt, dy chur lhieu cloan Israel magh ass Egypt, shoh’n Moses as yn Aaron cheddin.

28As haink eh gy-kione, er y laa loayr y Chiarn rish Moses, ayns cheer Egypt, 29Dy ren y Chiarn loayrt rish Moses, gra, Mish y Chiarn: abbyr uss rish Pharaoh ree Egypt ooilley ny ta mee er choyrt royd. 30As dooyrt Moses fenish y Chiarn, Cur-my-ner, ta mee moandagh ayns glare, as kys ver Pharaoh clashtyn dou?