CAB. VII

1As dooyrt y Chiarn rish Moses, Cur-my-ner, ta mee er dty hoiaghey seose myr jee da Pharaoh: as bee dty vraar Aaron dty adeyr. 2Nee uss loayrt ooilley ny ta mee dy dty harey: as nee Aaron dty vraar loayrt rish Pharaoh, eh dy choyrt cloan Israel magh ass y cheer echey. 3As neem’s cree Pharaoh y chreoghey, as nee’m soilshaghey ymmodee jeh my chowraghyn, as my yindyssyn ayns cheer Egypt. 4Agh cha der Pharaoh clashtyn diu, dy voddyms my laue y lhie er Egypt, as dy voddym my heshaghtyn-caggee, as my phobble cloan Israel, y choyrt lhiam magh ass cheer Egypt, liorish briwnyssyn mooarey. 5As bee toiggal ec ny Egyptianee, dy nee mish y Chiarn, tra nee’m my laue y heeyney magh er Egypt, as cloan Israel y choyrt lhiam veih ny mast’ oc. 6As ren Moses as Aaron myr hug y Chiarn sarey daue; eer shen myr ren ad. 7As va Moses kiare-feed bleïn dy eash, as Aaron kiare-feed as three, tra loayr ad rish Pharaoh.

8As loayr y Chiarn rish Moses, as rish Aaron, gra. 9Tra loayrys Pharaoh riu, gra Jeeagh-jee dou cowrey ass y lieh eu hene; dy jean oo eisht gra rish Aaron, Gow dty lorg, as ceau sheese eh fenish Pharaoh, as hig eh dy ve ny ard-nieu.

10As hie Moses as Aaron stiagh gys Pharaoh as ren ad myr va’n Chiarn er harey daue: as cheau Aaron sheese e lorg fenish Pharaoh, as fenish e harvaantyn, as haink eh dy ve ny ard-nieu. 11Eisht hug Pharaoh myrgeddin fys er ny deiney creeney as ny fir-obbee: nish ren fir-obbee Egypt neesht, er yn aght cheddin, lesh nyn obbeeys: 12Son hilg adsyn sheese dy chooilley ghooinney e lorg, as haink ad dy ve ard-nieughyn: agh ren lorg Aaron sluggey sheese ny luirg ocsyn. 13As va cree Pharaoh er ny chreoghey, nagh dug eh clashtyn daue; myr va’n Chiarn er ghra.

14As dooyrt y Chiarn rish Moses, Ta cree Pharaoh er ny chreoghey, dy vel eh gobbal raad y lhiggey da’n pobble. 15Immee gys Pharaoh ’sy voghrey; cur-my-ner, t’eh goll magh gys yn ushtey: as nee uss shassoo rish oirr ny hawin ry-hoi’n traa hig eh; as y lorg va chyndaït gys ard-nieu, ver oo lhiat ayns dty laue. 16As nee oo gra rish, Ta’n Chiarn Jee ny Hebrewnee er m’y choyrt hood’s, gra, Lhig da my phobble goll, dy vod ad mish y hirveish ’syn aasagh; as cur-my-ner, cha vel oo foast er choyrt geill da. 17Shoh myr ta’n Chiarn gra, Liorish shoh, bee fys ayd’s dy nee mish y Chiarn; cur-my-ner, bwoaill-yms lesh y lorg t’ayns my laue er ny ushtaghyn t’ayns yn awin, as bee ad chyndaït gys fuill. 18As yiow’n eeast t’ayns yn awin baase, as nee’n awin breinaghey: as bee ushtey yn awin skeeagh da ny Egyptianee.

19As dooyrt y Chiarn rish Moses, Abbyr rish Aaron, Gow dty lorg, as sheeyn magh dty laue, er ushtaghyn Egypt, er ny strooanyn, er ny hawinyn, as er ny loghanyn, as er ooilley ny puill ushtey, dy vod ad ve chyndaït gys fuill: as dy vod fuill ve trooid magh ooilley cheer Egypt, chammah ayns siyn fuygh; as ayns ny siyn cloaie. 20As ren Moses as Aaron shen, myr va’n Chiarn er harey: as hrog eh seose yn lorg, as woaill eh ushtaghyn ny hawin, ayns shilley Pharaoh, as ayns shilley e harvaantyn: as va ooilley ushtey yn awin chyndaït gys fuill. 21As hooar yn eeast v’ayns yn awin baase; as ren yn awin breinaghey, as cha dod ny Egyptianee giu jeh ushtey ny hawin: as va fuill trooid magh ooilley cheer Egypt. 22As ren fir-obbee Egypt y lheid cheddin lesh nyn obbeeys; as va cree Pharaoh er ny chreoghey; chamoo hug eh geill daue; myr va’n Chiarn er ghra. 23As hyndaa Pharaoh, as jimmee eh gys e hie, chamoo ghow eh shoh hene gys e chree. 24As chleiy ooilley ny Egyptianee mygeayrt yn awin, son ushtey dy iu; son cha dod ad giu jeh ushtey ny hawin. 25As va shiaght laa ec kione, lurg da’n Chiarn v’er woalley’n awin.