CAB. VIII

1As loayr y Chiarn rish Moses, Immee gys Pharaoh, as abbyr rish, Myr shoh ta’n Chiarn gra, Lhig y raad da my phobble, dy vod ad mish y hirveish. 2As my obbys oo dy lhiggey’n raad daue, cur-my-ner, nee’m bwoalley ooilley dty ardjyn lesh froggyn. 3As ver yn awin magh froggyn dy palchey, hed seose, as hig ad stiagh ayns dty hie, as ayns dty hiamyr-lhiabbagh, as er dty lhiabbee, as ayns thie dty harvaantyn, as er dty phobble, as ayns nyn ogheyn, as nyn siyn fuinnee. 4As hig ny froggyn seose chammah ort hene, as er dty phobble, as er ooilley dty harvaantyn.

5As dooyrt y Chiarn rish Moses, Abbyr rish Aaron, Sheeyn magh dty laue lesh dty lorg harrish ny strooanyn, harrish ny hawinyn, as harrish ny loghanyn, as cur er ny froggyn dy heet seose er thalloo Egypt. 6As ren Aaron e laue y heeyney magh harrish ushtaghyn Egypt; as haink ny froggyn seose, as choodee ad thalloo Egypt. 7As ren ny fir-obbee y lheid cheddin lesh nyn obbeeys, as hug ad lhieu froggyn er cheer Egypt.

8Er shoh hug Pharaoh fys er Moses as Aaron, as dooyrt eh, Guee-jee gys y Chiarn, dy gow eh ersooyl ny froggyn voym, as voish my phobble; as lhig-yms y raad da’n pobble, dy hebbal oural gys y Chiarn. 9As dooyrt Moses rish Pharaoh, Ayd’s dy row’n onnor dy oardaghey: cre’n traa neem’s guee ayns dty lieh hene, as lieh dty harvaantyn, as lieh dty phobble: dy stroie ny froggyn voïd’s, as veih dty hieyn, dy vod ad ve ynrycan ayns yn awin? 10As dooyrt eshyn, Mairagh. As dooyrt eh, Dy row eh myr t’ou gra: dy vod fys ’ve ayd’s, nagh vel unnane erbee goll-rish y Chiarn y Jee ain. 11As hed ny froggyn voïd’s, as veih dty hieyn, as veih dty harvaantyn, as veih dty phobble; ayns yn awin ny-lomarcan vees ad. 12As hie Moses as Aaron magh veih Pharaoh; as ren Moses padjer gys y Chiarn, kyndagh rish ny froggyn v’eh er choyrt noi Pharaoh. 13As ren y Chiarn er raa Voses, as hooar ny froggyn baase ayns ny thieyn, ayns ny baljyn-cheerey, as ny magheryn. 14As ren ad chaglym ad cooidjagh ayns dashyn, as va soar breinn jeu fud y cheer. 15Agh tra honnick Pharaoh, dy row couyr, ren eh e chree y chreoghey, as cha dug eh clashtyn daue; myr va’n Chiarn er ghra.

16As dooyrt y Chiarn rish Moses, Abbyr rish Aaron, Sheeyn magh dty lorg, as bwoaill joan y thallooin, dy vod eh cheet dy ve meeylyn, trooid magh ooilley cheer Egypt. 17As ren ad shen; son heeyn Aaron magh e laue lesh e lorg, as woaill eh joan ny hooirey, as haink eh dy ve meeylyn, er dooinney as baagh: haink ooilley joan y thallooin dy ve meeylyn trooid magh ooilley cheer Egypt. 18As ghow ny fir-obbee orroo y lheid cheddin y yannoo, lesh nyn obbeeys, dy choyrt magh meeylyn, agh cha daink eh lhieu: myr shen va meeylyn er dooinney as baagh. 19Eisht dooyrt ny fir-obbee rish Pharaoh, mair Yee shoh: agh va cree Pharaoh er ny chreoghey, as cha dug eh clashtyn daue myr va’n Chiarn er ghra.

20As dooyrt y Chiarn rish Moses, Irree traa mie moghrey, as shass kiongoyrt rish Pharaoh; (cur-my-ner, t’eh cheet magh gys yn ushtey,) as abbyr rish, Myr shoh ta’n Chiarn gra, Lhig y raad da my phobble, dy vod ad mish y hirveish. 21Er-nonney, mannagh jean oo yn raad y lhiggey da my phobble, cur-my-ner, ver-yms swarmyn dy veishteigyn ort hene, as er dty harvaantyn, as er dty phobble, as ayns dty hieyn: as bee thieyn ny Egyptianee lane lesh swarmyn-beishteig, as myrgeddin y thalloo t’ad er. 22As neem’s foayr y hoilshaghey er y laa shen da thalloo Ghoshen, ayn ta my phobble cummal, nagh bee veg ny swarmyn-beishteig ayns shen; dy vod fys ’ve ayd’s dy nee mish y Chiarn ayns ooilley’n seihll. 23As ver-yms scarrey eddyr y pobble aym’s, as y pobble ayd’s; mairagh vees yn cowrey shoh. 24As ren y Chiarn myr shen, as haink swarm atchimagh dy veishteigyn stiagh ayns thie Pharaoh, as ayns thieyn e harvaantyn, as ayns ooilley cheer Egypt: va’n slane cheer breinn, kyndagh rish ny swarmyn dy veishteigyn.

25As hug Pharaoh fys er Moses, as er Aaron, as dooyrt eh, Immee-jee, cheb-jee oural gys y Jee eu ayns y cheer shoh. 26As dooyrt Moses, Cha jig lhien dy yannoo myr shen; son nee mayd chebbal eajeeys ny Egyptianee gys y Chiarn y Jee ain: cur-my-ner, my nee mayd chebbal ayns oural eajeeys ny Egyptianee kiongoyrt rish ny sooillyn oc, nagh jean ad nyn glaghey? 27Hem mayd jurnah three laa stiagh ’syn aasagh, as nee mayd oural ’hebbal gys y Chiarn y Jee ain, myr ver eh currym orrin. 28As dooyrt Pharaoh, Lhig-ym y raad diu, dy vod shiu ouralley gys y Chiarn y Jee eu ayns yn aasagh; agh ny gow shiu foddey jeh: guee shiu er my hon. 29As dooyrt Moses, Cur-my-ner, Ta mee goll magh voïd, as guee-ym gys y Chiarn, dy vod ny swarmyn-beishteig goll ersooyl veih Pharaoh, veih e harvaantyn, as veih e phobble, mairagh; agh ny lhig da Pharaoh dellal ny sodjey dy molteyragh, ayns gyn lhiggey da’n pobble goll roue, dy hebbal oural da’n Chiarn. 30As hie Moses magh veih Pharaoh, as ghuee eh gys y Chiarn. 31As ren y Chiarn cordail rish raa Voses: as scugh eh ny swarmyn-beishteig voish Pharaoh, voish e harvaantyn, as voish e phobble: cha row unnane faagit. 32Agh ren Pharaoh e chree y chreoghey yn cheayrt shoh myrgeddin, chamoo lhiggagh eh yn raad da’n pobble.