CAB. IX

1Eisht dooyrt y Chiarn rish Moses, Immee stiagh gys Pharaoh, as abbyr rish, Shoh myr ta’n Chiarn Jee ny Hebrewnee, gra, Lhig y raad da my phobble, dy vod ad mish y hirveish: 2Son my obbys oo kied daue goll, as my nee oo ad foast nyn lhiettal. 3Cur-my-ner, ta laue’n Chiarn er dty ollagh ta ’sy vagher, er ny cabbil, er ny assylyn, er ny camelyn, er ny dew, as er ny kirree; bee murran feer dewil. 4As nee’n Chiarn scarrey eddyr maase Israel, as maase Egypt, as cha vow veg baase jeh ooilley ny ta lesh cloan Israel. 5As ren y Chiarn pointeil lheid y traa shen, gra, Mairagh nee’n Chiarn y red shoh ’sy cheer. 6As laa-ny-vairagh ren y Chiarn yn red shen, as hooar ooilley ollagh Egypt baase: agh jeh ollagh chloan Israel cha dooar unnane baase. 7As ren Pharaoh briaght, as cur-my-ner, cha row kione jeh maase ny Israeliteyn marroo. As va cree Pharaoh er ny chreoghey, as cha lhig eh yn raad da’n pobble.

8As dooyrt y Chiarn rish Moses, as rish Aaron, Gow-jee lane nyn ghurn jeh leoie yn choirrey, as lhig da Moses spreih eh seose ’syn aer ayns shilley Pharaoh. 9As hig eh dy ve joan myn ayns ooilley cheer Egypt, as bee eh ny askaid brishey magh ayns mammyn, er dooinney as er baagh, fud ooilley cheer Egypt. 10As ghow ad leoie yn choirrey, as hass ad fenish Pharaoh; as ren Moses shen y spreih seose ’syn aer: as haink eh dy ve ny askaid, brishey magh ayns mammyn, er dooinney as er baagh. 11As cha dod ny fir-obbee shassoo kionfenish Moses, kyndagh rish yn askaid; son va’n askaid er ny fir-obbee, as er ooilley ny Egyptianee. 12As ren y Chiarn cree Pharaoh y chreoghey, as nagh dug eh geill daue, myr va’n Chiarn er hoilshaghey da Moses. 13As dooyrt y Chiarn rish Moses, Irree dy moghey, as shass fenish Pharaoh, as abbyr rish, Shoh myr ta’n Chiarn, Jee ny Hebrewnee, gra, Lhig y raad da my phobble, dy vod ad jannoo shirveish dou. 14Son ver-yms ec y traa shoh ooilley my ghourinyn er dty chree, as er dty harvaantyn, as er dty phobble, dy vod oo toiggal nagh vel my lheid’s ayns ooilley yn seihll. 15Son nish, neem’s my laue y heeyney magh dy woalley uss, as dty phobble lesh y phaitt; as bee oo giarit jeh veih’n thalloo. 16As dy jarroo firrinagh, er yn eer oyr shoh ta mee er dty hroggal seose, dy hoilshaghey aynyd my phooar, as dy vod m’ennym v’er ny ockley magh trooid ooilley’n theihll. 17Myr t’ou foast goaill ort dy yannoo tranlaase er my phobble, nagh lhig oo yn raad daue: 18Cur-my-ner, mysh y traa shoh mairagh, ver-yms neose sniaghtey-garroo trome, lheid as nagh row ayns Egypt, neayr’s ve ny ashoon, derrey’n traa shoh. 19Shen-y-fa nish, cur magh dty haghteryn, as chaggil cooidjagh ooilley dty vaase, as ooilley ny t’ayd ’sy vagher: son dy chooilley ghooinney as baagh vees ry-gheddyn ’sy vagher, as nagh bee er nyn goyrt stiagh, hig y sniaghtey-garroo neose orroo, as yiow ad baase. 20Hug eshyn, ghow aggle roish goo’n Chiarn mastey sharvaantyn Pharaoh, er e vooinjer, as e ollagh dy ghoaill fastee ayns ny thieyn: 21Agh daag eshyn nagh dug geill da goo yn Chiarn e vooinjer as e vaase ’sy vagher.

22As dooyrt y Chiarn rish Moses, Sheeyn magh dty laue lesh niau, dy vod sniaghtey-garroo ve ayns ooilley cheer Egypt, er dooinney, as er baagh, as er ooilley lossreeyn y vagher, fud ooilley cheer Egypt. 23As heeyn Moses magh e lorg lesh niau: as hug y Chiarn taarnagh as sniaghtey-garroo, as roie yn tendreil rish y thalloo; as gheayrt y Chiarn neose sniaghtey-garroo er cheer Egypt. 24Myr shoh va sniaghtey-garroo ayn, yn aile as y sniaghtey-garroo roie fud-y-cheilley, feer atchimagh, cha row rieau y lheid ayns ooilley cheer Egypt neayr’s ve ny ashoon. 25As ren y sniaghtey-garroo stroie trooid magh slane cheer Egypt, ooilley ny va ’sy vagher, chammah dooinney as baagh: as hug y sniaghtey-garroo naardey ooilley glassyraght y thallooin, as vrish eh ooilley biljyn y vagheragh. 26Ny-lomarcan ayns cheer Ghoshen, raad va cloan Israel, cha row veg y sniaghtey-garroo. 27As hug Pharaoh fys er Moses as Aaron, as dooyrt eh roo, Ta mee er n’yannoo peccah yn cheayrt shoh: ta’n Chiarn cairagh, agh ta mish as my phobble mee-chrauee. 28Guee-jee gys y Chiarn, (son s’lioar eh,) nagh bee arragh dy haarneeyn agglagh, as sniaghtey-garroo ayn; as neem’s y raad y lhiggey diu, as cha n’uirree shiu ny sodjey. 29As dooyrt Moses rish, Cha leah’s veem’s er gholl magh ass yn ard-valley, nee’m my laueyn y hroggal seose gys y Chiarn: as nee’n taarnagh scuirr, chamoo vees sniaghtey-garroo arragh ayn; dy vod fys ve ayd dy nee lesh y Chiarn y thalloo. 30Agh er dty hon hene, as dty harvaantyn, ta fys aym, nagh jean shiu foast goaill aggle roish y Chiarn Jee. 31As hie yn lieen as yn oarn naardey; son va’n oarn my-yeish, as y lieen my-rass. 32Agh cha row’n churnagh ny’n shoggyl naardey, son cha row ad foast ass yn oashyr. 33As hie Moses magh ass yn ard-valley veih Pharaoh, as hrog eh seose e laueyn gys y Chiarn; as ghow ny taarneeyn as y sniaghtey-garroo fea, as cha row’n fliaghey er ny gheayrtey neose er y thalloo. 34As tra honnick Pharaoh, dy row’n fliaghey, as yn sniaghtey-garroo, as ny taarneeyn er scuirr, hie eh er e hoshiaght ayns peccah, as ren eh e chree y chreoghey eh hene as e harvaantyn. 35As va cree Pharaoh er ny chreoghey, chamoo lhiggagh eh yn raad da cloan Israel, myr va’n Chiarn er loayrt liorish Moses.