CAB. I

1Nish haink eh gy-kione ayns y jeihoo vleïn as feed, ayns y chiarroo vee, er y wheiggoo laa jeh’n vee, (myr va mee mastey ny cappeeyn, liorish awin Chebar) dy row ny niaughyn foshlit, as honnick mee ashlishyn Yee. 2Er y wheiggoo laa jeh’n vee (shen va’n wheiggoo vleïn jeh cappeeys ree Jehoiachin) 3Haink goo yn Chiarn dy foshlit gys Ezekiel yn ard-saggyrt, mac Vuzi, ayns cheer ny Caldeanee, liorish awin Chebar, as shen y raad va laue yn Chiarn ersyn.

4As yeeagh mee, as cur-my-ner haink geay-chassee ass y twoaie, bodjal vooar, as aile cassee, as soilshean mygeayrt-y-mysh, as ayns y vean echey va myr sollyssid amber ass mean yn aile. 5Myrgeddin ass y vean echey haink co-chaslys kiare cretooryn bio, as shoh va’n cummey oc, va jalloo dooinney orroo. 6As er dagh unnane oc va kiare eddinyn, as er dagh unnane oc kiare skianyn. 7As va ny cassyn oc cassyn jeeragh, as va boyn nyn goshey, myr boyn-coshey lheiy, as va ny fedjagyn oc soilshean myr prash sollys. 8As va laueyn dooinney oc fo nyn skianyn er ny kiare lhiatteeyn oc, as ec y chiare va eddinyn, as skianyn. 9Va ny skianyn oc bentyn ry-cheilley: cha ren ad chyndaa myr v’ad goll, jimmee dagh fer jeu jeeragh roish. 10As er son cummey nyn eddinyn, v’ec y chiare eddin dooinney, as eddin lion er y cheu yesh: as v’ec y chiare eddin dow er y cheu chiare; v’ec y chiare myrgeddin eddin urley. 11Myr shoh va nyn eddinyn: as va ny skianyn oc sheeynt seose, va daa skian dagh fer jeu bentyn ry-cheilley, as jees coodaghey nyn girp. 12As hie dagh fer jeu jeeragh er e hoshiaght: raad va’n spyrryd dy gholl, hie adsyn, as cha ren ad chyndaa ayns nyn immeeaght. 13Er son co-chaslys ny cretooryn bio, va’n cummey oc myr smarageyn loshtee dy aile, as casley rish lampyn: hie eh seose as neose mastey ny cretooryn bio, as va’n aile sollys, as magh veih’n aile haink tendreil. 14As roie ny cretooryn bio, as hyndaa ad goll-rish chentyn-taarnee.

15Nish myr va mee jeeaghyn er ny cretooryn bio, cur-my-ner va un whueeyl er y thalloo liorish ny cretooryn bio, lesh ny kiare eddinyn. 16Va cummey ny queeylyn, as yn obbyr v’orroo, myr cullyr y veryl: as va’n un chummey orroo ny kiare: as va’n co-chaslys oc, as yn obbyr v’orroo myr dy beagh eh queeyl ayns mean queeyl. 17Tra jimmee ad, hie ad er nyn giare lhiatteeyn: as cha ren ad chyndaa ayns nyn immeeaght. 18Er son ny rhollanyn oc v’ad cha ard dy row ad atchimagh, as va nyn rhollanyn lane dy hooillyn mygeayrt-y-moo nyn giare. 19As tra jimmee ny cretooryn bio, jimmee ny queeylyn mâroo, as tra va ny cretooryn bio troggit seose veih’n thalloo, va ny queeylyn troggit seose mâroo. 20Cre-erbee yn raad va’n spyrryd dy gholl, hie adsyn, gys shen va’n spyrryd ocsyn dy gholl; as va ny queeylyn troggit seose chelleeragh mâroo: son va spyrryd yn chretoor bio ayns ny queeylyn. 21Tra jimmee adsyn, jimmee ad shoh, as tra hass adsyn, hass ad shoh; as tra v’adsyn er ny hroggal seose veih’n thalloo, va ny queeylyn troggit seose mâroo: son va spyrryd yn chretoor bio ayns ny queeylyn. 22As va co-chaslys yn aer harrish king ny cretooryn bio, myr cullyr crystal yindyssagh sollys, skeaylit magh harrish nyn ghing er cheu heose. 23As fo yn aer va ny skianyn oc sheeynt magh jeeragh, yn derrey yeh lesh y jeh elley; jees er dagh fer jeu, coodagh yn derrey heu, as jees er dagh fer jeu coodagh cheu elley nyn girp. 24As myr v’ad goll, cheayll mee sheean ny skianyn oc, myr sheean thooillaghyn mooarey, myr coraa yn ooilley-niartal, coraa dy ghlare myr tharmane sheshaght-caggee: tra hass ad, lhig ad sheese nyn skianyn. 25As haink coraa veih yn aer, va harrish nyn ghing, tra hass ad, as tra lhig ad sheese nyn skianyn.

26As erskyn yn aer va harrish nyn ghing, va co-chaslys stoyl-reeoil, goll-rish clagh sapphire, as er co-chaslys yn stoyl-reeoil va myr dy beagh eh jalloo dooinney er-y-skyn. 27As honnick mee myr cullyr amber, ayns shilley myr aile mygeayrt-y-mysh er cheu-sthie, eer seose, veih cummey e veeghyn, as sheese eer veih cummey e veeghyn, honnick mee myr dy beagh eh caslys aile, as ve sollys ooilley mygeayrt. 28Myr co-chaslys y gholl-twoaie, t’ayns y vodjal er laa fliaghee, shen myr va co-chaslys yn sollyssid mygeayrt-y-mysh. Shoh myr v’er ny akin caslys gloyr y Chiarn. As tra honnick mee eh, huitt mee er my eddin, as cheayll mee yn coraa echeysyn va loayrt.