CAB. X

1Eisht yeeagh mee, as cur-my-ner, ayns yn aer va erskyn ny cherubim, v’er ny akin harrystoo myr dy beagh clagh sapphire, ayns cummey myr co-chaslys stoyl-reeoil. 2As loayr eh rish y dooinney ’sy choamrey aanrit, as dooyrt eh, Immee stiagh eddyr ny queeylyn, eer fo yn cherub, as lhieen dty laue lesh smarageyn aile veih eddyr ny cherubim, as spreih ad harrish yn ard-valley. As hie eh stiagh ayns my hilley. 3Nish va ny cherubim ny hassoo er lhiattee yesh y thie, tra hie yn dooinney stiagh, as ren y bodjal lhieeney yn chooyrt sodjey stiagh. 4Eisht hie gloyr y Chiarn seose veih yn cherub, as hass eh harrish dorrys y thie, as va’n thie er ny lhieeney lesh y vodjal, as va’n cooyrt lane dy hollyssid gloyr y Chiarn. 5As va sheean skianyn ny cherubim er ny chlashtyn, gys eer yn chooyrt sodjey magh, myr coraa yn Jee ooilley-niartal, tra t’eh loayrt. 6As haink eh gy-kione, tra hug eh sarey da’n dooinney ’sy choamrey aanrit, gra, Gow aile veih eddyr ny queeylyn, veih eddyr ny cherubim; eisht hie eh stiagh, as hass eh liorish ny queeylyn. 7As heeyn un cherub magh e laue veih eddyr ny cherubim, gys yn aile va eddyr ny cherubim, as ghow eh jeh, as hug eh eh ayns ny laueyn echeysyn va ’sy choamrey aanrit: ren goaill eh, as hie eh magh.

8As va er ny akin, ayns ny cherubim, cummey laue dooinney fo ny skianyn oc. 9As tra yeeagh mee, cur-my-ner kiare queeylyn liorish ny cherubim, un whueeyl liorish un cherub, as queeyl elley liorish cherub elley: as va cummey ny queeylyn myr cullyr clagh-beryl. 10As er son nyn gummey, va’n un chaslys er y chiare, myr queeyl ayns mean queeyl. 11Tra v’ad goll, hie ad er ny kiare lhiatteeyn oc, cha hyndaa ad myr v’ad goll, agh gys y voayl shen, raad va’n kione jeeaghyn, deiyr ad er, hie ad jeeragh er nyn doshiaght. 12As va nyn slane corp, as nyn ghreeym, as nyn laueyn, as nyn skianyn, as ny queeylyn, lane sooillyn ooilley mygeayrt, eer ny queeylyn v’oc nyn giare. 13Er son ny queeylyn, ve er ny eamagh huc, ayns my chlashtyn, O whueeyl. 14As er dagh unnane oc va kiare eddinyn: va’n chied eddin, eddin cherub, as va’n nah eddin, eddin dooinney, as y trass, eddin lion, as y chiarroo, eddin urley. 15As hrog ny cherubim seose: shoh yn cretoor bio honnick mee liorish awin Chebar. 16As tra va ny cherubim goll, va ny queeylyn goll lioroo: as tra hrog ny cherubim seose nyn skianyn, dy etlagh seose veih’n thalloo, cha ren ny queeylyn chyndaa veih nyn lhiattee, 17Tra hass adsyn, hass ad shoh; as tra hrog adsyn seose, hrog ad shoh ad-hene seose myrgeddin: son va spyrryd yn chretoor bio ayndoo. 18Eisht hrog gloyr y Chiarn veih dorrys y thie, as hass eh harrish ny cherubim. 19As hrog ny cherubim seose nyn skianyn, as dettyl ad seose veih’n thalloo ayns my hilley’s: as tra hie ad magh, va ny queeylyn myrgeddin foue, as hass dy chooilley unnane oc ec dorrys giat shiar thie yn Chiarn, as va gloyr Yee Israel er-nyn-skyn. 20Shoh yn cretoor bio honnick mee fo Jee Israel, liorish awin Chebar, as va fys aym, dy nee adsyn va ny cherubim. 21Va ec dagh unnane oc kiare eddinyn y pheesh, as ec dagh unnane oc kiare skianyn, as va cummey laueyn dooinney fo nyn skianyn. 22As va cummey ny eddinyn oc co-chaslys ny eddinyn shen honnick mee liorish awin Chebar, yn tuarystal oc as ad-hene: hie ad dy chooilley unnane jeeragh er nyn doshiaght.