CAB. XI

1Ny-sodjey, hrog y spyrryd mee seose, as hug eh lesh mee gys giat shiar thie yn Chiarn, ta jeeaghyn lesh y niar: as cur-my-ner, ec dorrys y yiat queig deiney as feed; nyn mastey honnick mee Jaazaniah mac Azur, as Pelatiah mac Venaiah, ard-gheiney yn phobble. 2Eisht dooyrt eh rhym, Vac y dooinney, ad shoh ny deiney ta cur olk er y hoshiaght, as dy choyrlaghey drogh-yannoo ayns yn ard-valley shoh: 3Ta gra, Cha vel eh er-gerrey, lhig dooin thieyn y hroggal: ta’n ard-valley shoh yn choirrey, as shinyn yn eill.

4Shen-y-fa jean phadeyrys nyn ’oï, jean phadeyrys, O vac y dooinney. 5As huitt spyrryd y Chiarn orrym, as dooyrt eh rhym, Abbyr, Myr shoh ta’n Chiarn dy ghra, Shoh myr ta shiuish er ghra, O hie Israel: son shione dooys dy chooilley nhee ta cheet ayns nyn aigney, dy chooilley unnane oc. 6Ta shiu er vishaghey nyn merriu ayns yn ard-valley shoh, as ta shiu er lhieeney ny straïdyn eck lesh dunverys. 7Shen-y-fa myr shoh ta’n Chiarn Jee dy ghra, Adsyn ta shiu er varroo ayns y vean eck, ad shen yn eill, as ta’n ard-valley shoh yn choirrey: agh ver-yms lhiam shiuish magh ass y vean eck. 8Ta shiu er ve agglagh roish y chliwe, agh ver-yms lhiam yn cliwe erriu, ta’n Chiarn Jee dy ghra. 9As ver-ym lhiam shiu magh ass y vean eck, as livrey-ym shiu gys laueyn joarree, as cooilleen-yms erriu my vriwnyssyn. 10Nee shiu tuittym liorish foyr y chliwe, neem’s shiu y vriwnys ayns ardjyn Israel, as bee fys eu dy nee mish y Chiarn. 11Cha bee yn ard-valley shoh yn choirrey euish, chamoo vees shiuish yn eill ayns y vean eck; agh neem’s shiuish y vriwnys ayns ardjyn Israel. 12As bee fys eu, dy nee mish yn Chiarn: son cha vel shiu er n’immeeaght ayns my lattyssyn, chamoo ta shiu er chooilleeney my vriwnyssyn, agh ta shiu er n’yannoo lurg cliaghtaghyn ny ashoonee ta mygeayrt-y-miu.

13As haink eh gy-kione, tra va mee er n’yannoo phadeyrys, dy dooar Pelatiah mac Venaiah baase: eisht huitt mee er my eddin, as deïe mee lesh ard-choraa, as dooyrt mee, Ah Hiarn Yee! vel oo jannoo slane jerrey er fooilliagh Israel? 14Reesht haink goo yn Chiarn hym’s, gra? 15Vac y dooinney, ta dty vraaraghyn, eer dty vraaraghyn hene, dty gheiney-mooinjerey, as ooilley slane thie Israel, adsyn, roo ta cummaltee Yerusalem er ghra, Gow-jee reue foddey veih yn Chiarn: dooinyn ta’n cheer shoh er ny choyrt ayns nyn gummal. 16Shen-y-fa, abbyr uss, Myr shoh ta’n Chiarn Jee dy ghra, Ga dy vel mee er nyn imman foddey jeh mastey ny ashoonee, as ga dy vel mee er skeayley ad mastey ny cheeraghyn, ny-yeih ayns traa giare, beem’s dauesyn son kemmyrk, ayns ny cheeraghyn raad hig ad. 17Shen-y-fa, abbyr uss, Myr shoh ta’n Chiarn Jee dy ghra, Ver-yms lhiam shiu dy jarroo veih mastey yn pobble, as neem’s shiu y haglym ass ny cheeraghyn, raad va shiu er nyn skeayley, as ver-yms diu thalloo Israel. 18As hig ad gys shen, as gowee ad ersooyl ooilley ny reddyn eajee t’ayn; as dy chooilley red dwoaiagh ver ad ass. 19As ver-ym daue un chree, as neem’s spyrryd noa y choyrt ayndoo; as goyms ersooyl ass nyn eill yn cree cloaie, as ver-ym daue cree foalley. 20Dy vod ad gimmeeaght ayns my lattyssyn, as freayll my oardaghyn, as ad y chooilleeney: as bee adsyn yn pobble aym’s, as beem’s y Jee ocsyn. 21Agh er y hon ocsyn ta’n cree oc gimmeeaght lurg yeearreeyn nyn nheeghyn eajee, as nyn mee-chraueeaght, neem’s nyn raad y chooilleeney er nyn ghing hene, ta’n Chiarn Jee dy ghra.

22Eisht hrog ny cherubim seose nyn skianyn, as ny queeylyn foue, as va gloyr Yee Israel er-nyn-skyn. 23As hie gloyr y Chiarn seose veih mean yn ard-valley, as hass eh er y clieau, t’er cheu-har yn ard-valley.

24Ny lurg shoh ghow yn spyrryd mee seose, as hrog eh lesh mee ayns ashlish, liorish spyrryd Yee, gys Caldea, hucsyn jeh’n chappeeys: shoh myr hie yn ashlish va mee er vakin seose voym. 25Eisht loayr mee roosyn jeh’n chappeeys, dy chooilley nhee va’n Chiarn er hoilshaghey dou.