CAB. XII

1Haink goo yn Chiarn reesht hym, gra, 2Vac y dooinney, t’ou cummal ayns mean thie mee-viallagh, ta sooillyn oc dy akin, as cha vel ad fakin; as cleayshyn oc dy chlashtyn, as cha vel ad clashtyn: son t’ad thie mee-viallagh. 3Shen-y-fa, uss vac y dooinney, fow dty chooid aarloo son arraghey, as jean scughey ’sy laa ayns nyn shilley, as nee oo scughey veih dty ynnyd-vaghee gys ynnyd elley ayns nyn shilley; hoiggal, dy gow ad gys nyn gree eh, ga dy vel ad thie mee-viallagh. 4Eisht ver oo lhiat magh dty stoo-thie ’sy laa, ayns y chilley oc, myr cooid ry-hoi arraghey: as hed oo magh ec yn astyr ayns nyn shilley, myr adsyn ta dy gholl magh gys cappeeys. 5Cleiy uss baarney trooid y voalley ayns nyn shilley, as cur lhiat magh [dty chooid] er. 6Ayns y chilley oc ver oo lhiat eh er dty gheayltyn, as hed oo magh lesh y cho-leayrtys, as nee oo dty eddin y choodaghey, nagh vaik oo yn thalloo: son ta mee er hoiaghey oo son cowrey da thie Israel. 7As ren mee myr va mee er my harey: hug mee lhiam magh my chooid ’sy laa, myr chooid ry-hoi cappeeys, as ec yn astyr, chleiy mee trooid y voalley lesh my laue, hug mee lhiam magh eh ayns y cho-leayrtys, as dymmyrk mee eh er my gheayltyn ayns y chilley oc.

8As ayns y voghrey haink goo yn Chiarn hym, gra, 9Vac y dooinney, nagh vel thie Israel, yn thie mee-viallagh shen, er ghra rhyt, Cre shoh t’ou mish? 10Abbyr uss roosyn, Myr shoh ta’n Chiarn Jee dy ghra, Ta’n errey shoh bentyn rish y phrince ayns Jerusalem, as ooilley thie Israel ta ny mast’ oc. 11Abbyr roo, Ta mish son cowrey diu; myr ta mish er n’yannoo, shen myr vees eh jeant roosyn: nee ad garraghey, as goll ayns cappeeys. 12As y prince ta ny mast’ oc, nee eh gymmyrkey er e gheaylin ’sy cho-leayrtys, as hed eh magh: nee ad jannoo baarney trooid y voalley, dy chur lhieu magh ny hrooid: nee eh e eddin y choodaghey, nagh vaik eh yn thalloo lesh e hooillyn. 13My lieen myrgeddin neem’s skeayley ersyn, as bee eh goit ayns my ribbey; as ver-ym lhiam eh gys Babylon, cheer ny Caldeanee, ny-yeih cha jean eh fakin eh, ga dy vow eh baase ayns shen. 14As skeayl-yms lesh dy chooilley gheay, ooilley ny ta mygeayrt-y-mysh dy chooney lesh, as ooilley e heshaghtyn-caggee, as tayrn-yms magh yn cliwe er nyn eiyrt’s. 15As bee fys oc dy nee mish y Chiarn, tra ta mee er skeayley ad mastey ny ashoonyn, as er spreih ad fud ny cheeraghyn. 16Agh faag-yms kuse jeu veih’n chliwe, veih’n ghortey, as veih’n phaitt, dy vod adsyn ooilley nyn beccaghyn eajee y ockley magh mastey ny ashoonee, raad hig ad, as bee fys oc dy nee mish y Chiarn.

17Ny-sodjey, haink goo yn Chiarn hym, gra, 18Vac y dooinney, ee dty arran lesh atchim, as iu dty ushtey lesh creau as imnea. 19As abbyr rish pobble y cheer, Myr shoh ta’n Chiarn Jee dy ghra, mychione cummaltee Yerusalem, as thalloo Israel, Nee ad gee nyn arran lesh imnea, as giu nyn ushtey er-creau, dy vod y thalloo eck ve treigit lioroosyn ooilley t’ayn, kyndagh rish yn tranlaase ocsyn ooilley ta cummal ayn. 20As ny ard-valjyn ta cummaltee ayndoo, bee ad er ny chur naardey, as bee yn thalloo treigit as bee fys eu dy nee mish y Chiarn.

21As haink goo yn Chiarn hym’s, gra, 22Vac y dooinney, cre ta’n raa-cadjin shen t’eu ayns cheer Israel, gra, Ta ny laghyn foddey ry-heet, as ta ashlish ny ghaa failleil? 23Insh daue er-y-fa shen, Myr shoh ta’n Chiarn Jee dy ghra, Ver-yms naardey yn raa-cadjin shoh, nagh jean ad imraa sodjey er myr raa-cadjin ayns Israel: agh abbyr roo, Ta ny laghyn er-gerrey, as bun dagh ashlish [dy ve cooilleenit.] 24Son cha bee arragh ayn ashlish erbee fardalagh, chamoo phadeyrys brynneragh ayns thie Israel. 25Son mish y Chiarn: neem’s loayrt, as yn goo loayr-yms, hig eh gy-kione: cha bee eh ny sodjey er ny lhiggey shaghey: son ayns ny laghyn euish, O hie vee-viallagh, neem’s loayrt yn ockle, as jannoo mie jeh, ta’n Chiarn Jee dy ghra.

26Reesht haink goo yn Chiarn hym, gra, 27Vac y dooinney, cur-my-ner, t’adsyn jeh thie Israel dy ghra, Ta’n ashlish t’eh dy akin, son ymmodee laghyn ry-heet, as t’eh phadeyrys jeh ny earishyn foddey jeh. 28Shen-y-fa, abbyr roosyn, Myr shoh ta’n Chiarn Jee dy ghra, Cha bee veg jeh my ghoan’s lhiggit shaghey ny-sodjey, agh bee yn goo, ta mee er loayrt, er ny chooilleeney, ta’n Chiarn Jee dy ghra.